ތިމާއަށް ﷲ ތަޢާލާ ދެއްވަވާ މިންވަރަށް ހިތްހަމަޖެހި އެވަރުން ހިތްފުރައިނުލެވޭ މީހަކަށް ދުވަހަކުވެސް ހަމަޖެހުމެއް ނުލިބޭނެއެވެ. އަބަދުވެސް އުޅެންޖެހޭނީ މަދުވެގެންނެވެ. ނުކުރެވިހުރި ކަންކަން ގިނަވެ އެކަމުގެ ކަންބޮޑުވުމުގައެވެ.
އެންމެ ކުޑަމިނުން މިތަނަށް ޙާޒިރުވެ މިތިބަ މީހުންނަށް ވިސްނައިލާށެވެ! ގިނަ ބައަކު ތިބޭނީ ބޭނުންވާ ކޮންމެވެސް ކަންތައްތަކެއް ޙާޞިލުނުކުރެވިގެން ފިކުރުބޮޑުވުމުގެ ސަބަބުން ހަށިގަނޑުން އޮއްދާ ހިއްލާ ޙާލަތުގައެވެ.
އެމީހުންނަށް ޙާޞިލުކުރެވިފައިވާ ނިޢްމަތްތަކާއިމެދު ހިނދުކޮޅަކަށް ވިސްނައިލިނަމަވެސް ހިތްހަމަޖެހުން ލިބި އިތުރުވެސްވާނެއެވެ. ނަމަވެސް އެހެން މީހުންނަށް ދެއްވަވާ ނިޢްމަތްތައް ބޭނުންވާ މީހާއަށް ދުވަހަކުވެސް ހިތްހަމަޖެހުމެއް ނުލިބޭނެއެވެ. އަބަދުވެސް އުޅެން ޖެހޭނީ ހާސްކަމާއި ނުތަނަވަސްކަމުގެތެރޭގައެވެ.
މީސްތަކުން މިއަދު ހަލާކުގެތެރެއަށް ވެއްޓެމުން މިދަނީ ދުނިޔޭގެ އެދުންތައް ފަހަތުން ދުވެވޭތީއެވެ. ފެންނަ ހުރިހާ ކަންކަން ބޭނުންވާތީއެވެ. އެންމެ ބޮޑަށް ތަނަވަސްކަން ދެއްވެވި މީހާ އާއި އެއްފެންވަރުގައި ދިރިއުޅެން ބޭނުންވާތީއެވެ. އެންމެ މުއްސަނދިމީހާ ލާހެދުންލައި އޭނާ ގެންގުޅޭ ފެންވަރުގެ ފޯނު ގެންގުޅެން ބޭނުންވާތީއެވެ. މިއީ ކިހިނަކުން ކުރެވޭނެ ކަންކަން ހެއްޔެވެ؟
ނަތީޖާއަކީ ކޮބައިހެއްޔެވެ؟ އެންމެންނަށްވެސް ތިބެންޖެހިފައިމިވަނީ ބޮޑު ކަންބޮޑުވުމެއްގައެވެ. ޙާޞިލުނުވެ ހުރި ކަންކަމަށް ވިސްނަން ހަދައިގެން ޙާޞިލުކުރެވިފައިވާ، ﷲ ތަޢާލާ ދެއްވަވާފައިވާ ނިޢްމަތްތައް މަތިން މިވަނީ ހަނދާންނެތިފައެވެ. ޙާޞިލުނުކުރެވި ހުރި ކަންކަން ޙާޞިލުކުރަން މަސައްކަތްކުރަން ހަދައިގެން ޙާޞިލުކުރެވިފައިވާ، ﷲ ތައާލާ ދެއްވަވާފައިވާ ނިޢްމަތްތަކަށް ޝުކުރުވެރިވާނެ ވަގުތުވެސް މިއޮންނަނީ ނުލިބިފައެވެ.
ހަނދާންކުރަންވީ އަހަރެމެންގެ މައިންބަފައިން، ކާފައިން ދުނިޔޭގައި އަޅުނު ޙާލެވެ. އަހަރެމެން ބަލައި ބޮޑުކުރަން މައިން ކުރި ބުރަ މަސައްކަތެވެ. މިހާރު މިއުޅެނީ އެންމެ ދަރިއަކު ލިބުމުންވެސް ތާހިރުކޮށްލަން ބުރަވެ ދަރިފުޅުގެ ހަމަށްލިބޭ ގެއްލުމަށް ނުބަލައި ނެޕީ ޖައްސައިގެން ނޫނީ ނުގެންގުޅެވިގެންނެވެ. އަހަރެމެންގެ މައިން 10 ދަރިން ލިބުމުންވެސް ނުހަނު ސާފުތާހިރުކޮށް ގެންގުޅުނީ ދޮންނަ މެޝިނެއްވެސް ނެތްޙާލުގައެވެ.
–މުފްތީ މެންކުގެ ދަރުސަކުން
