ދިވެހިންގެ ސަގާފަތުގެ ތެރޭގައި ފަސްވަގުތު ނަމާދަށް ދިޔުމާއި ވެރީންނަށް އިހްތިރާމުކުރުމާއި އަމާނާތްތެރިކަން އާންމުވާންޖެހޭކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ. މުހައްމަދު މުއިއްޒު މިިހެން ވިދާޅުވީ ގައުމީ ފެންވަރުގައި މިއަދު ފާހަގަކުރާ ދިވެހި ގައުމިއްޔަތު ދިރުވައި އާލާކުރާ ދުވަހުގެ މުނާސަބަތުގައި ދެއްވި ހިތާބުގައެވެ.
ރައީސްގެ ހިތާބުގައި ވިދާޅުވީ ގައުމިއްޔަތު ދިރުވައި އާލާކުރާ ދުވަހާ މި ފަހަރު ބައްދަލުކުރީ ރޯދަ މަހުގެ ތެރޭގައި ކަމީ ހެޔޮ އިއްތިފާގެއްކަމަށާއި އެކަމާއި މެދު ވިސްނާލުމުގެ ބޭނުން ވަރަށް މުހިންމުކަމަށެވެ. އެގޮތުން ދިވެހި ގައުމިއްޔަތުގައި އިސްލާމްދީނުގެ ދައުރަކީ، ދިވެހީން ދިރިއުޅޭ ގޮތްތަކާއި އާދަކާދަތަކާއި ދިވެހިންގެ ސަގާފަތް އިސްލާމްދީނުގެ އިންތަކަށް ފެތޭހެން އިސްލާހުކުރުން ކަމުގައި ރައީސް މުއިއްޒު ވިދާޅުވިއެވެ. ދިވެހީން އިސްލާމްދީން ބަލައިގަތުމުން، ދިވެހީން ދިރިއުޅޭ ގޮތްތަކަށް އެ ދީން ގެނުވި ހެޔޮ ބަދަލުތަކަށް ވިސްނާލަންޖެހޭކަމަށް ރައީސް ވިދާޅުވިއެވެ.
“ އިންސާނިއްޔަތަށް ބަލާއިރު، އެކިއެކި ނަންނަމުގައި އިންސާނުން ޤުރުބާންކުރުން ނިމުމަކަށް ގެނެސް، އިންސާނީ ކަރާމާތް ދިފާއުކޮށް މަތިވެރިކުރި. އިމާރާތްކުރުމަށް ބަލާއިރު، ހިރިގަލުގެ ރީތި ފަންނީ މިސްކިތްތައް ބިނާކުރި. އަހްލާގަށް ބަލާއިރު، ފަސްވަގުތު ނަމާދަށް ދިޔުމާއި، ވެރީންނަށް އިހްތިރާމުކުރުމާއި، އަމާނާތްތެރިކަން އާންމުވި.“ ރައީސްގެ ހިތާބުގައިވެއެވެ.
މިއަދު ދިވެހީންގެ ތެރޭގައި ދިވެހި ޤައުމިއްޔަތުގެ މާނަތައް އަލުން ހަރުލައްވަން މަސައްކަތްތަކެއް ކުރަން ޖެހިފައިވާކަމަށް ރައީސް ވިދާޅުވިއެވެ. އަދި އެކަމަށް ޓަކައި މި ޒަމާނުގައި ބޭނުންވަނީ އިލްމީ ހަމަތައްކަން ފާހަގަކުރައްވަމުން ރައީސް ވިދާޅުވީ އެމަނިކުފާނާއި މަގާމުގެ މަސްއޫލިއްޔަތު ހަވާލުކުރެއްވި ފުރަތަމަ ދުވަހުން ފެށިގެން އެ މަސައްކަތް ކުރައްވަމުން ގެންދަވާކަމަށެވެ.
“ އިރާދަކުރެއްވިއްޔާ ދިވެހި ޤައުމިއްޔަތު އިލްމީ ހަމަތަކުގެ މަތިން އުނގަންނައިދެވެމުންދާނެ. ދިވެހީންގެ ތަޖުރިބާތަކާއި ހުނަރުތައް ފަހަށް ރައްކާކުރެވެމުންދާނެ. ދިވެހީންގެ ތަރިކަތައް، ޒަމާނީ ޓެކްނޯލޮޖީއާއި، އިގްތިސާދީ ވިސްނުން ޝާމިލުކޮށްގެން ދެމެހެއްޓެމުން ބެލެހެއްޓެމުންދާނެ.“ ރައީސްގެ ހިތާބުގައިވެއެވެ.
މީގެ އިތުރަށް، މާތްވެގެންވާ އިސްލާމްދީން މެދުވެރިކޮށް، ދިވެހީންގެ ސަގާފަތް އަބަދުވެސް އިސްލާހްކުރެވެމުން، ނުރަނގަޅު ދޮރުތައް ބަންދުކުރެވެމުން ރަނގަޅު ކަންކަމަށް ތަރުޙީބުދެމުން ކުރިޔަށް ދާނެކަމަށްވެސް ރައީސް ވިދާޅުވިއެވެ.
