ކާން ބޭނުން ކުރެވޭ އެއްޗެއްސަކީ ޙަލާލްތަކެތިކަން ޔަޤިންކުރަން ޖެހެއެވެ. އެއީ މިޒަމާނުގައި އުނދަގޫ ކަމެއް ނޫނެވެ. އެއެއްޗެއް އުފައްދަނީ ކޮން އެއްޗަކުން ކަން ނުވަތަ އިންގްރިޑިއަންޓްސް އަކީ ކޮބައިކަން ބަލައިލެވޭނެއެވެ. އިންޓަރނެޓުން ސާޗްކޮށްލެވޭނެއެވެ. އެއީ އަދާކުރަންޖެހޭ ފަރުދީ ޒިންމާއެކެވެ.
އެގޮތަށް ހޯދާ ހޯދުމުގެ ތެރެއިން އެނގޭ ކަންކަން އެހެން މީހުންނަށް ހާމަކޮށްލުމަކީވެސް ކުރަން ރަނގަޅު ކަމެކެވެ. ގިނަ މީހުންނަކީ ކަންކަން ހޯދައި ބެލުމަށް އެހާބޮޑަށް ސަމާލުކަންދޭ ބައަކަށް ނުވާތީއެވެ.
މިފަދަ ކަންކަން ފާހަގަކޮށް ހަނދާންކޮށްދޭންޖެހެނީ އޫރުގެ ބައިތައް ބޭނުންކޮށްގެން އުފައްދާފައިވާ އެއްޗެއްކަން ނޭނގި ވަރަށް ފަހުންވެސް އެފަދަ އުފެއްދުމެއް ބާޒާރު ފިހާރައަކުން ވިއްކުނު މައްސަލައެއް ފެންމަތިވެފައިވާތީއެވެ. އެކަންވެސް ފާހަގަކުރެވުނީ ގަތް މީހަކު އެއިގެ ތަފްޞީލް ހޯދުމުންނެވެ.
އަހަރެމެންނަށް މީރުވެގެން މިކެވޭ ބައެއް ބާވަތްތަކާއި ލޯބިން ދަރިންނަށް ކާންދެވޭ ތަކެތި ޙަލާލުކަމާއިމެދު ވިސްނަވާލައްވަމުތޯއެވެ. ބައެއް ކުންފުނިތަކުން އުފައްދާ ޖެލެޓިން އުފައްދަން އޫރުގެ ހަން ބޭނުންކުރެއެވެ. އަދި އެޖެލަޓިން ބޭނުންކޮށްގެން މީރު ކާބޯތަކެތިވެސް އުފައްދައެވެ.
ވިސްނަވައިލައްވާށެވެ! ޖެލަޓިން ކެޔަސް ކިތަންމެ ރީތި އެހެން ނަމެއް ކިޔަސް އޫރުގެ ހަން ބޭނުން ކޮށްގެން އުފައްދާތަކެތި މުސްލިމުންނަށް ޙަރާމްވާނެއެވެ.
މުސްލިމުންނަށް ޙަރާމް އެއްޗެއް ބޭނުންކޮށްގެން އުފައްދާ އެއްޗެއް ނުކައި ވާންއޮއްވައި ކާންވީ ކީއްކުރަން ހެއްޔެވެ؟
”ކިތަންމެ ހައިޖީނިކްކޮށް އުފައްދާފައިވީނަމަވެސް އޫރުގެ އެއްވެސް ބާވަތެއް ބޭނުންކޮށްގެން އުފައްދާފައިވާ އެއްވެސް އެއްޗެއް މުސްލިމުންނަށް ހުއްދައެއް ނުވާނެއެވެ. އެއިގެ ޙުކުމަކީ ޙަރާމެވެ.“
