ބައިވެރިޔާގެ އަނގައަށް ތިމާގެ އަތުން ސުވަލެއް ލައްވައިދޭން ފަކުރުގަންނަމުން ގޮސް މިހާރު އެކަކު ކާސަމުސަލުން އެއްޗެއް ކާލަންވެސް މިއޮތީ ބޮޑުކަމަކަށްވެފައެވެ. ފަކުރު ގަންނަކަމަކަށްވެފައެވެ. ހިތްހަމަޖެހޭ ކަމަށްވަނީ ބައިވެރިޔާގެ ސަމުސާ ސައިބޯނިލައިގެން ދޮވުމުގެ އިތުރަށް ހޫނުފެނަށްވެސް ލުމުންނެވެ.
ދެމަފިރިންގެ މެދުގައި ކަންކަން މިގޮތަށް އޮތުމަކީ އިސްލާމް ދީން ދަންނަ ކަމެއް ނޫނެވެ. ޢާއިޝަތުގެފާނު ކިރުފޮދު ހިއްޕެވުމުން ތުންފަތްޕުޅު ކަންވާރުގައި ޖެއްސެވި ދިމާ ބައްލަވައި އެތަނުގައި ރަސޫލް ޞައްލަﷲ ޢަލައިހި ވަސައްލަމަ ތުންފަތްފުޅު ޖައްސަވައި ކިރުފޮދު ހިއްޕެވިއެވެ. އެއީ އުލާ ސަމުސަލުން ކައި އުޅުނު އިރެއް ނޫންކަމުން އެއިގެ ވާހަކަ ދެއްކެން ނެތަސް މިހުރީ ފެންނަހުރި ކަންކަމެވެ.
އަދި ކީއްހެއްޔެވެ؟ އަނބިމީހާގެ ގާތުގައި އޭނާ ދެކެ ލޯބިވާކަމަށް ބުނަންނުޖެހޭނެ ކަމަށް ޤަބޫލުކުރާ ބައަކުވެސް އުޅެއެވެ. މިއީ ކޮންތަނަކުން ނެރުނު ކަމެއް ހެއްޔެވެ؟ ހަމަޔަޤީނުންވެސް ރަސޫލް ޞައްލަﷲ ޢަލައިހި ވަސައްލަމަ އެފަދައިން ޙަދީޘްފުޅުކުރެއްވަވައި އަނބިކަނބަލުން ދެކެ ލޯބިފޫލުވެވަޑައިގަންނަވާކަން ހާމަކުރެއްވެވިއެވެ.
ބުނަންހެއްޔެވެ؟ ޒަވާޖީ ޙަޔާތް އުފާވެރިކުރެވޭނީ ސުންނަތަށް ޢަމަލުކުރިވަރަކުންނެވެ. ކައިވެނި ދެމެހެއްޓޭނީވެސް ސުންނަތަށް ޢަމަލުކުރިވަރަކުންނެވެ. އަދި ލޯބިވެވޭނީވެސް ސުންނަތަށް ޢަމަލުކުރިވަރަކުންނެވެ.
ޒަމާނީވި ވަރަކަށް ކުރިމަތިވާނީ މައްސަލަތަކެވެ. ޒަމާނީވާނަމަ އެކަންކުރަންވާނީވެސް ސުންނަތަށް ޢަމަލުކުރަމުންނެވެ. ކާމިޔާބާއި އުފާވެރިކަން ލިބުން އޮތީ އެއިރުންނެވެ. އިން ޝާ ﷲ
