މޯލްޑިވްސް މީޑިއާ ކައުންސިލްގެ ބައި އިލެކްޝަނަށް ކުރިމަތިލުމަށް މިނިސްޓްރީ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސްއިން ހުޅުވާލައިފިއެވެ.
މިނިސްޓްރީން ބުނީ، ޤާނޫނު ނަންބަރު 2008/15 (މޯލްޑިވްސް މީޑިއާ ކައުންސިލުގެ ޤާނޫނު) ގެ ދަށުން އެކުލަވާލާފައިވާ މީޑިއާ ކައުންސިލުގެ މީޑިއާތައް ތަމްޘީލްކުރާ މެންބަރެއްގެ މަގާމު ހުސްވާ ކަމަށާއި، އެހެންކަމުން މީޑިއާ ތަމްސީލު ކުރާނެ މެމްބަރަކަށް ކުރިމަތިލުމަށް ހުޅުވާލެވިފައިވާ ކަމަށެވެ.
މޯލްޑިވްސް މީޑިއާ ކައުންސިލްގެ މެންބަރުންގެ މުއްދަތަކީ މީލާދީ 2 އަހަރެވެ. އެއްވެސް ފަރާތަކަށް ކައުންސިލުގެ މެންބަރުކަމުގައި ވިދިވިދިގެން 2 ދައުރު އަދާ ނުކުރެވޭނެއެވެ.
ހަމައެއާއެކު، މޯލްޑިވްސް މީޑިއާ ކައުންސިލްގެ ގާނޫނު ގެ 7 ވަނަ މާއްދާގައިވާ ގޮތުން ކައުންސިލްގެ މެންބަރުންގެ ކިބާގައި ވަކި ޝަރުތުތައް ހުންނަންޖެހެއެވެ. އޭގެ ތެރޭގައި ދިވެހި ރައްޔިތެއް ކަމުގައިވުމާއި، އުމުރުން 18 (އަށާރަ) އަހަރު ފުރިފައިވުމާއި، އިސްލާމް ދީނުގައި ހައްދެއް ކަނޑައެޅިފައިވާ ކުށެއް ކުރިކަން ޝަރީއަތަށް ސާބިތުވެފައިވާ މީހަކު ކަމުގައި ނުވުމާއި، މަސްތުވާ ތަކެތީގެ ވިޔަފާރި ކުރުމުގެ ކުށް ސާބިތުވެފައިވާ މީހެއްކަމުގައި ނުވުމާއި، ކުޑަކުދިންނަށް ޖިންސީ ގޯނާ ކުރުމުގެ ކުށް ޝަރީއަތަށް ސާބިތުވެފައިވާ މީހެއްކަމުގައި ނުވުން ހިމެނެއެވެ.
މީގެ އިތުރުން، ވޭތުވެދިޔަ 2 އަހަރު ތެރޭގައި ޖިނާއީ ކުށެއް ކުރިކަން ޝަރީއަތަށް ސާބިތުވެފައިވާ މީހެއްކަމުގައި ނުވުމާއި، ޚިޔާނާތުގެ ނުވަތަ ރިޝްވަތުގެ ކުށެއް ކުރިކަން ޝަރީއަތަށް ސާބިތުވެފައިވާ މީހެއްކަމުގައި ނުވުމައި، މުޖްތަމައު ގަބޫލުކުރާ މިންގަނޑުތަކުން އަބުރުވެރި، އަޚުލާގު ރަނގަނޅު މީހެއް ކަމުގައިވުމަކީވެސް ޝަރުތެކެވެ،
ހަމައެއާއެކު، ފާއިތުވެދިޔަ 12 މަސްދުވަހުގެ ތެރޭގައި ނޫސް މަޖައްލާ އެއްގައި އެމީހަކު ލިޔުނު އެއްޗަކާބެހޭގޮތުން ޝަރީއަތަށް ކުށެއް ސާބިތުވެފައިވާ މީހެއްކަމުގައި ނުވުމަކީވެސް މެމްބަރުންގެ ކިބައިގައި ފުރިހަމަވާންޖެހޭ ޝަރުތެކެވެ.
އެހެންކަމުން މޯލްޑިވްސް މީޑިއާ ކައުންސިލުގެ، މީޑިއާތަކުން އިންތިޚާބުކުރާ މެންބަރުކަމަށް ވާދަކުރަން އެދޭ ފަރާތްތަކުން 18 މާޗް 2025 ވާ އަންގާރަ ދުވަހުގެ 14:00 ގެ ކުރިން ކުރިމަތިލުމަށް ވަނީ އެދިފައެވެ.
