އިދިކޮޅު އެމްޑީޕީން އުޅެނީ އެ ޕާޓީ އުފެދުމުގައި ވެސް ގެންގުޅުނު ބޯދާ މިންގަނޑުތައް އަލުން ދިރުވަން ކަމަށް، ސަރުކާރު ހިންގާ ޕީއެންސީން ބުނެފި އެވެ.
އެމްޑީޕީން މިދިޔަ ބުދަ ދުވަހުގެ ރޭ ބޭއްވި މުޒާހަރާގައި އެ ޕާޓީގެ އެކްޓިވިސްޓެއް ކަމަށްވާ މަރިޔަމް ޒުބެއިރު (މަންދީ) ވަނީ ރައީސް ޑރ. މުހައްމަދު މުއިއްޒުގެ ދަރިކަލަކަށް ނިސްބަތްކޮށް ވާހަކަތަކެއް ދައްކައިފަ އެވެ.
އެ ވާހަކަތަކާ ގުޅިގެން އެމްޑީޕީއަށް ފާޑުކިޔުން އަމާޒުވެފައިވާ އިރު، ޕީއެންސީން ނެރުނު ބަޔާނެއްގައި ބުނީ މިފަދަ ނާތަހުޒީބު އަމަލުތައް ހިންގުމަކީ އެއްވެސް ހާލެއްގައި ސިޔާސީ ހަރަކާތެއް ކަމަށް މިނިވަން ދިމިގްރާތީ އެއްވެސް މުޖުތަމައެއްގައި ބަލައިގަނެވޭނެ ހަމައެއް ނެތް ކަމަށާއި އަދި އެމްޑީޕީ އާއި އެ ޕާޓީގެ އިސްވެރިން އެފަދަ ކަންކަމަށް ހިތްވަރު ލިބޭ ގޮތަށް ސޯޝަލް މީޑިއާގައި ބަސް ބުނެ އެ ކަންކަން ދިފާއުކުރުމުން ދޭހަކޮށްދެނީ، އެބައި މީހުންނަކީ ގާނޫނަކަށް ގަވާއިދަކަށް އަދި އިންސާނީ ކަރާމާތަކަށް ބެލުމެއް ނެތި އަމިއްލަ މަންފާ އިސްކުރާ ބައެއް ކަމަށެވެ.
ގިނަ ޕާޓީ އެކުލެވޭ ސިޔާސީ ހަރަކާތް ރާއްޖެއަށް ތައާރަފް ކުރެވުނު ދުވަސްވަރު ވެސް އެމްޑީޕީން ދިވެހިންނަށް ސިޔާސީ ހަރަކާތް ހިންގަން ދަސްކޮށްދިނީ މިފަދަ ހުތުރު އަމަލުތަކުގެ ތެރެއިން ކަމަށްވީ ނަމަވެސް، ދިވެހިން މިއަދު ވަނީ މިފަދަ ނާތަހުޒީބު އަމަލުތަކާއި ދުރުވެތިބެ ހިންގާ ބިނާކުރަނިވި ސިޔާސީ ހަރަކާތްތަކަށް އަހުލުވެރިވެފައި ކަމަށް ޕީއެންސީން ބުނެ އެވެ.
”އަދިވެސް އެމްޑީޕީން އެ ޕާޓީގެ އުފެދުމުގައިވެސް ގެންގުޅުނު ބޯދާ މިންގަނޑުތައް އަލުން ދިރުވަން މަސައްކަތް ކުރާކަމީ ހިތާމަވެރި އަދި އެހާމެ ފިނޑި ސިޔާސަތެއް ކަމަށްވެސް މި ޕާޓީން ދެކެމެވެ،“ ޕީއެންސީގެ ބަޔާނުގައިވެ އެވެ.
ޕީއެންސީން ވަނީ އެއްވެސް ކުށެއް ނެތި އެއްވެސް މީހެއްގެ ހައްގަކަށް އަރައިގަނެ، ހަގީގަތާ ހިލާފު ދޮގު ވާހަކަތައް ދައްކާ ރައްޔިތުންނަށް އޮޅުވާލުން ބަލައިނުގަނެވޭނެ ކަމަށާއި ވަކިން ހާއްސަކޮށް މީހުންގެ އަނބިދަރީންގެ ހައްގުތަކަށް އަރައިގަނެ، ކަންކަން އޮޅޭ ގޮތަށް ވާހަކަ ދެއްކުމަކީ ވަރަށް ނާތަހުޒީބު ދަށުދަރަޖައިގެ އަމަލެއް ކަމަށްވެސް ބުނެފަ އެވެ.
މިފަދަ އަމަލުތަކަކީ ބައިނަލްއަގުވާމީ ގާނޫނުތަކާއި ހިލާފު އަމަލުތައް ކަމަށްވެފައި، ސިޔާސީ އިމުގެ ބޭރުން ކުރެވޭ ކަންކަން ކަމުގައިވާތީ، ކަމާބެހޭ މުއައްސަސާތަކުން މި މައްސަލަތައް ބަލައި ފިޔަވަޅު އަޅަން ޕީއެންސީން ވަނީ ގޮވާލައިފަ އެވެ.
