އެމެރިކާގެ ޕްރެސިޑެންޓް ޑޮނަލްޑް ޓްރަމްޕްގެ އަމުރަކާ ގުޅިގެން، އެމެރިކާގެ ސިފައިން ޔަމަނުގެ ހޫތީން ބާރު ހިންގާ ސަރަހައްދުތަކަށް ވައިގެ ހަމަލާތަކެއް ދީފިއެވެ.
މި ހަމަލާތައް ދީފައިވަނީ ރެޑް ސީގައި ދަތުރުކުރާ އުޅަނދުތަކަށް ހޫތީން ދެމުންދާ ހަމަލާތަކަށް ރައްދު ދިނުމުގެ ގޮތުންނެވެ. ހަމައެއާއެކު، ހޫތީންނަށް އެހީތެރިވާ އީރާނަށް ޓްރަމްޕް ހަރުކަށި އިންޒާރެއްވެސް ދެއްވާފައިވެއެވެ.
ޔަމަނުގެ ވެރިރަށް ސަނައާއާއި އެހެނިހެން ހޫތީން ކޮންޓްރޯލް ކުރާ ސަރަހައްދުތަކަށް ދިން މި ހަމަލާގައި ހޫތީންގެ މިސައިލް ސިސްޓަމްތަކާއި، އެއާ ޑިފެންސްތަކާއި، އަދި ކޮމާންޑް ސެންޓަރުތައް އަމާޒު ކުރެވުނެވެ. ޓްރަމްޕް ސޯޝަލް މީޑިއާގައި ޕޯސްޓް ކުރައްވައި ވިދާޅުވީ، މި ކަމަކީ ”އަވަސް އަދި ބާރުގަދަ“ ހަމަލާއެއް ކަމަށާއި، އެމެރިކާގެ ކަނޑުމަގުން ދަތުރުކުރާ އިސްކަރީ އަދި ވިޔަފާރި އުޅަނދުފަހަރު ހިމާޔަތްކުރުމަށްޓަކައި ”ފުރިހަމަ ލީތަލް ފޯސް“ ބޭނުންކުރަމުންދާ ކަމަށެވެ. މި އޮޕަރޭޝަންގައި ޔޫއެސްއެސް ހެރީ އެސް. ޓްރޫމަން ކެރިއަރ ސްޓްރައިކް ގްރޫޕާއި ޔޫއެސްއެސް ޖޯޖިއާ ސަބްމެރިން ބައިވެރިވާކަމަށް އެމެރިކާގެ ޑިފެންސް މިނިސްޓްރީން ބުނެފައިވެއެވެ.
ހޫތީންގެ މައިގަނޑު ސްޕޮންސަރު ކަމަށްވާ އީރާނަށް ޓްރަމްޕް ވަރަށް ސީދާ އިންޒާރެއް ދެއްވިއެވެ. އީރާނުން ހޫތީންނަށް ދެމުންގެންދާ އެހީތެރިކަން ވަގުތުން ހުއްޓާލުމަށް ޓްރަމްޕް އެދިލައްވާފައިވެއެވެ.
މި ބަސްތަކުން ދޭހަވަނީ އީރާނުން ހޫތީންނަށް އެހީތެރިކަން ދިނުން ކުރިއަށް ގެންދާނަމަ، ސީރިއަސް ނަތީޖާއެއް ތަހައްމަލުކުރަންޖެހިދާނެކަމެވެ.
ހޫތީންގެ މީޑިއާއިން ބުނާގޮތުގައި، މި ހަމަލާތަކުގައި ސަނައާގައި 9 މީހުން މަރުވެފައިވެއެވެ.
ހޫތީންގެ ލީޑަރުން މި ހަމަލާއަށް ބަދަލުހިފުމަށް ހުވާކޮށް، މިއީ އެމެރިކާގެ ”އަނިޔާވެރި ހަމަލާއެއް“ ކަމަށް ބުނެފައިވެއެވެ. އަދި މި ހަމަލާތައް ގައްޒާގައި ހިނގަމުންދާ ހަނގުރާމައާ ގުޅުން ހުރިކަމަށްވެސް ތުހުމަތުކޮށްފައިވެއެވެ.
