ތިމާއަށް އެންމެ ބޮޑަށް ހެޔޮ އެދޭ އެކުވެރިންނަކީ ކޮން ބައެއްކަން ކަނޑައެޅުމުގައި ވިސްނޭ ގޮތާއިމެދު އިތުރަށް ވިސްނަން މިވަނީ ޖެހިފައެވެ. އެކަމަށް ވަރަށް ރަނގަޅަށް ވިސްނައި ފަރުވާތެރި ނުވާނަމަ ޝައިޠޯނާގެ ދަންތުރައިގައި ޖެހެވުން އޮންނާނީ ދާދި ގާތުގައެވެ.
މީސްތަކުންގެ ވިސްނުމަށް އައިސްފައިވާ ބޮޑެތި ބަދަލުތަކުގެ ސަބަބުން މިއަދު އެންމެ ގާތް މިތުރުންގެ ގޮތުގައި ބަލައިގަންނަނީ ތިމާއަށް އެންމެ ގިނަ ފައިސާދޭ ނުވަތަ އެންމެ ބޮޑަށް ތިމާގެ ހިތް އުފާކޮށްދޭ މީހުންނެވެ. އެމީހުން ހުރިހާ ކަންކަން މިނަނީ ފޫނެތް ނާޅިއަކުންނެވެ. އެނާޅީގައި އެއްވެސް އެއްޗެއް ހަރެއް ނުލާނެއެވެ.
ކިތަންމެ ގިނަ ފައިސާއަތަށްދިން ނަމަވެސް ކިތަންމެ ބޮޑަށް އުފާކޮށްދިންނަމަވެސް ތިމާ އާއި ﷲ ތަޢާލާ އާއި އިތުރަށް ކުއްތަންކުރުވަން މަސައްކަތްނުކުރާ ކޮންމެ މީހަކީ ވެސް ތިބާގެ ޢަދާވާތްތެރިއެކެވެ. މިތުރެއް ކީއްކުރަން އެއީ ރައްޓެއްސެއްވެސް ނޫނެވެ. އެއީ ކަނޑައެޅިގެން ހުރި ހަތުރެކެވެ.
ކޮންމެ މުސްލިމަކަށްވެސް ތިމާ ދުނިޔެއަށް ފޮނުއްވެވި މަޤްޞަދު ވަރަށް ރަނގަޅަށް އެނގޭނެއެވެ. އެއީ ﷲ ތަޢާލާއަށް އަޅުކަންކުރުންކަންވެސް އެނގޭނެއެވެ. އަދި ކުރާ ކޮންމެ ކަމަކީ އަޅުކަމަކަސް ހެދޭނެމަގުވެސް ﷲ ތަޢަލާ ވަނީ ދައްކަވައިފައެވެ. އެއީ ކުރަން މާބޮޑުކަމެއް ނޫނެވެ. ހަމައެކަނި ކުރަންޖެހޭ ކަމަކީ ކުރާ ކޮންމެ ކަމަކީވެސް ﷲ ތަޢާލާ ރުހިވޮޑިގަންނަވާ މަގުގައި ކުރާ ކަމަކަށް ހެދުމެވެ.
ލޮބުވެތި އަޚުންނާ އުޚުތުންނޭވެ! ކިތަންމެ ގާތް މީހަކުކަމުގައި ދެކޭ މީހާވެސް ﷲ ތަޢާލާ ރުހިވޮޑިނުގަންނަވާތަނަކަށް ތިބާ ގެންދަން އުޅޭނަމަ، ރުހިވޮޑިނުގަންނަވާ ޢަމަލެއް ތިބާ ލައްވައި ކުރުވަން އުޅޭނަމަ އެކަމަށް ފައުޅުގައި ދެކޮޅުހަދާށެވެ! އަދި އެކަމެއް ނުކުރުމުގެ އިތުރުން އެކަން ނުކުރުމަށް އޭނާއަށްވެސް ނަޞޭޙަތްދޭށެވެ! ނަޞޭޙަތްދިނުމުން އޭނާ ޤަބޫލުނުކޮށްފިނަމަ އަވަހަށް އެމީހަކާއި ދުރުހެލިވާށެވެ!
އެމީހެއްގެ ސަބަބުން ތިބާ އާއި ﷲ ތަޢާލާ އާއި ދެމެދުގައި އޮންނަން ޖެހޭ ގުޅުން އިތުރުނުވިނަމަވެސް ﷲ ތަޢާލާ އާއި ދުރަށް ނުޖައްސުވާނަމަ އެމީހަކާއިއެކު ގުޅުން ބޭއްވުމަކުން ލިބޭނެ ގެއްލުމެއް ނެތެވެ. ނަމަވެސް އެމީހެއްގެ ސަބަބުން ﷲ ތަޢާލާ އާއި ތިބާ އާއި ދެމެދުގައި އޮންނަންޖެހޭ ގުޅުމަށް ހުރަސްއެޅޭނަމަ އެންމެ ހިނދުކޮޅަކަށްވެސް އެފަދަ މީހަކާއި އެކުވެރިކަން ނުބާއްވާށެވެ! އާޚިރަތް ދުވަހު ސަލާމަތްކަމެއް ލިބުންއޮތީ އެއިރުންނެވެ!
–މުފްތީ މެންކްގެ ދަރުސަކުން
