އަނބިމީހާގެ ކިބައިން އުނިސިފައެއް ފެންނައިރަށް ދޫކޮށްނުލާށެވެ! އަދި ފިރިމީހާގެ ކިބައިން އުނިސިފައެއް ފެންނައިރަށް ވަރިނުވާށެވެ! ވިސްނައިދީގެން އިޞްލާޙްކުރުވޭތޯ މަސައްކަތްކުރާށެވެ! އެކަން ކާމިޔާބުވިޔަސް ނުވިޔަސް އެކަމަށް މަސައްކަތްކުރާ މީހަކަށްވެސް ﷲ ތަޢާލާ ރަޙްމަތް ލައްވަވާނެތެވެ. ހެޔޮ ގޮތްތައް މިންވަރުކުރައްވަވާނެތެވެ.
ހަމައެއާއިއެކު ބުނެލަން އޮތީ ބައިވެރިޔާގެ ކިބައިން އުނިސިފައެއް ފެންނައިރަށް ޢޭނާއަކީ ރަނގަޅު ނޫން މީހެއްގެ ގޮތުގައި މީސްތަކުންނަށް އަންގައި ފަޟީޙަތް ނުކުރާށެވެ!
ތިބާއަށް ތިބާގެ ބައިވެރިޔާގެ ކުށްތަށް ފަޟީޙަތް ކުރެވިދާނެއެވެ. އެކަމުގައި ވިސްނަން އޮތްކަމަކީ ކޮންމެ މީހެއްގެ ކިބައިގައިވެސް އުނި ކަންތައްތަކެއް ހުންނާނެ ކަމެވެ. އެހެނީ އެއްވެސް މީހަކީ ހުރިހާ ކަމެއް ފުރިހަމަ މީހެއް ނޫނެވެ. ހުރިހާ ކަމެއް ފުރިހަމަ ހަމައެކަކުވެސް ނުހުންނާނެއެވެ!
ފެހި ހެދުން ގައަށް އެންމެ ހެޔޮވަރު ނުވި ނަމަވެސް ފޭރާން ރީތިނަމަ ހެދުން ރީތިވާނެއެވެ. އަގުބޮޑު ފޭރާމުގެ ހެދުމެއްނަމަ ވަކިންބޮޑަށް ލޯބިވާނެއެވެ. ލައިގެން ހުންނައިރު ހަމަ ތިމާއަށްވެސް އެހެދުމުގެ ރީތިކަން އިޙްޞާޞްކުރެވި އުފާވެސްވާނެއެވެ.. އެހެން މީހުންގެ ތަޢްރީފް ލިބުމުން ފަޚުރުވެރިވެސްވާނެއެވެ. އަދި ބައެއް ފަހަރު ރީތި ހެދުމެއް ފެނިގެންބަލާއިރު ގައަށް ހެޔޮވަރު ނޫންނަމަވެސް އެބަ ގަންނަމުއެވެ. ގަނެގެން ފަހާތަނަކަށް ގެންގޮސް އިތުރަށް ފައިސާދީގެންވެސް އެހެދުން އެބަ ހެޔޮވަރުކުރުވަމުއެވެ. ނިކަން ބުނެބަލާށެވެ! މިހެންނަކުން ނުވޭހެއްޔެވެ؟ ދެން ބަލައިލަންވީ ޙަޔާތުގެ އެންމެ އަގުބޮޑު ”ހެދުމަށެވެ.“ އެއީ ޙަޔާތުގެ ބައިވެރިޔާ ނޫން ހެއްޔެވެ؟
ކައިވެނީގައިވެސް އޮތީ ހަމަ މިގޮތެވެ. އަނބިމީހާއަކީ ނުވަތަ ފިރިމީހާއަކީ ތިބާއަށް އެންމެ ފުރިހަމަ ނޫން ބައެއް ސިފަތައް ހުރި މީހަކަށް ވެދާނެއެވެ. އެފަދަ ކަމެއް ފެނިއްޖެނަމަ އެކަމެއް އިޞްލާޙްކޮށްލަން މަސައްކަތްކުރާށެވެ. މާތްﷲ ވާގިފުޅާއިއެކު ކަންކަން ދާނީ ރަނގަޅުވަމުންނެވެ. އިޞްލާޙްވަމުންނެވެ. އެކަމުގެ ހިތްހަމަޖެހުން ދާނީ ލިބެމުންނެވެ.
ކިތަންމެ ބޮޑު އަގުގައި ފޮތި ގަނެގެން ފަހަން ކިތަންމެ މޮޅު މީހަކު ލައްވައި ފެހި ނަމަވެސް އަޅުގަނޑުމެން ފަހާ ކޮންމެ ހެދުމެއް ގައަށް ހެޔޮވަރު ނުވެދާނެއެވެ. ފަތިޖަހާލަން ޖެހިދާނެއެވެ. އަދި ތަންކޮޅެއް މޮހެލާފައި ދޫކޮށްލަންވެސް ޖެހިދާނެއެވެ. ނަމަވެސް އޮތީ ހެދުން އެއްލައިލުމެއް ނޫނެވެ. ފަތިޖަހައި ހެޔޮވަރުކޮށްލުމެވެ. ކަންކުރަނީވެސް އެމަގުންނެވެ. ވީމާ އޮތީ ކުޑަ މަސައްކަތެއް ކޮށްލައިގެން ގައަށް ހެޔޮވަރުކޮށްލުމެވެ.
ގައަށް އެންމެ ހެޔޮވަރު ނޫން ހެދުމެއް ލިބުމުން އަމަލުކުރިގޮތް މިސާލަކަށް ބަލާށެވެ. އެކަން އެގޮތަށް ބަލަންޖެހެނީ ކީރިތި ޤްރްއާނުގައިވާ މި އެންގެވުމުންނެވެ. ”ދެމަފިރިންނަކީ ވެސް އެކަކު އަނެކަކަށް ހުރި ލިބާހެއް“ ކަމަށް މާތްﷲ ބަޔާންކުރައްވަވާފައިވަނީ މުހިންމު ސަބަބުތަކެއް ހުރުމުންނެވެ. އެކެއް އަނެއްކެއްގެ އުނިސިފަތައް ފޮރުވައިދީ އިޞްލާޙްކުރަން މަސައްކަތްކުރަން ޖެހޭނެތީއެވެ. އެކަމުގައި ދެމީހުންވެސް އެކަކު އަނެކަކަށް އެހީތެރިވެދޭން ޖެހޭނެތީއެވެ.
”އެކަނބަލުންނީ (އަނބިންނަކީ) ތިއަބައިމީހުންނަށް ފޭރާމެކެވެ. އަދި ތިއަބައިމީހުންނީ އެކަނބަލުންނަށް ފޭރާމެކެވެ.“ (ސޫރަތުލްބަޤަރާ- 18)
— އިސްލާމީ ތިލަފަތުގެ ދަރުސަކުން
