އެމެރިކާއިން އީރާނަށް ހަމަލާދީފި ނަމަ، ބަދަލުގައި އެމެރިކާއަށް ނުރައްކާތެރި ހަމަލާތަކެއް ދޭނެ ކަމަށް ވިދާޅުވެ، އީރާނުގެ ރޫޙީ ލީޑަރު އާޔަތުالله ޢަލީ ޚާމަނާޢީ ވަރުގަދަ އިންޒާރެއް ދެއްވައިފިއެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ ނިއުކްލިޔަރ ޕްރޮގުރާމާ ގުޅޭ އެއްބަސްވުމެއް އެކުލަވައިލުމަށް އެމެރިކާއިން ހުށަހަޅާފައިވާ ހުށަހެޅުމަށް އީރާނުން ދެކޮޅު ހަދަމުންދާ ނަމަ އެގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުކަށި ކޮށް އެ ގައުމަށް ބޮން އަޅާނެކަމަށް ބުނެފައެވެ.
ހާމަނާއީ ވަނީ އެމެރިކާއާއި އިސްރާއީލުގެ އަދާވާތްތެރި ކަމާއި އަބަދުވެސް އީރާނުން ކުރިމަތިލާންޖެހޭކަމަށް ވިދާޅުވެ އެމެރިކާއާ އިސްރާއީލުން އީރާނަށް ހަމަލާ ދޭނެ ކަމަށް އިންޒާރު ދެމުންއައިނަމަވެސް އެއީ ކުރެވިދާނެ ކަމެއް ކަމާ މެދު ޝައްކު އުފައްދަވާފައެވެ.
ނަމަވެސް އެކަހަލަ ހަމަލާއެއް ދީފިނަމަ ރައްދު ހަމަލާ ވަރުގަދަވާނެކަަމަށް ހާމަނާއީ ވިދާޅުވިއެވެ. އަދި އެމެރިކާއިން އީރާނުގެ އެތެރޭގައި ހަމަނުޖެހުން އުފައްދަން މަސައްކަތް ކޮށްފި ނަމަ، އެ ކަމާ ދެކޮޅަށް އީރާނުގެ ރައްޔިތުން ތެދުވެ، ފިޔަވަޅު އަޅާނެކަމަށްވެސް ހާމަނާއީ ވަނީ ވިދާޅުވެފައެވެ.
އީރާނުގެ ސިޔާސަތަކީ އަދިވެސް ފިއްތުންތަކާއި ބިރުދެއްކުމުގެ ދަށުން ސީދާ މަޝްވަރާތަކުގައި ބައިވެރިނުވުންކަން ހާމަކުރުމާއެކު އެމެރިކާއާ އެކު ނުސީދާ މަޝްވަރާތަކެއް ކުރަން ތައްޔާރުކަމަށް އީރާނުންވަނީ ބުނެފައެވެ. ނަމަވެސް ޓްރަމްޕް ބޭނުންވަނީ ގަދަބާރުން އީރާނަށް މަޖުބޫރުކޮށްގެން އެމެރިކާ ބޭނުންވާގޮތަށް އެއްބަސްވުންތައް އެކުލަވާލައި އީރާނުގެ ނިއުކްލިއާ ޕުރޮގުރާމަށް ބާރާއި ނުފޫޒު ފޯރުވައި، އެ ޕުރޮގުރާމު ކޮންޓްރޯލުކުރުމަށެވެ.
މިކަމާ ގުޅިގެން އީރާނުގެ އަސްކަރިއްޔާގެ އިސް އޮފިޝަލަކުވެސްވަނީ އެމެރިކާއިން އީރާނަށް ހަމަލާއެއް ދީފިނަމަ ރައްދުގައި ފޯޅަވަހީގައި އެމެރިކާއާއި އިނގިރޭސިވިލާތުން ހިންގަމުން އަންނަ އަސްކަރީ މަރުކަޒަށް ހަމަލާދޭނެކަމަށް ވިދާޅުވެފައެވެ.
އީރާނުގެ އިންޒާރަށް ބިރުން އެމެރިކާއިން މިހާރުވަނީ އެ ގައުމުގެ އެންމެ ވަރުގަދަ ބޮން އަޅާ މަތިންދާބޯޓު ބީ-20 ސްޕިރިޓުގެ ތިން މަތިންދާބޯޓާއި ހަތިޔާރު އުފުލާ 10 ސީ-17 ޓްރާންސްޕޯޓު މަތިންދާބޯޓު ފޯޅަވައްސަށް ގެންގޮސްފައެވެ.
އެމެރިކާގެ ބީ-20 ސްޕިރިޓް މަތިންދާބޯޓުތަކަކީ ރާޑަރަށް ނާރައި ދަތުރުކުރުމުގެ ގާބިލުކަން ހުންނަ މަތިންދާބޯޓުތަކެކެވެ. އެފަަދަ މަތިންދާބޯޓުތަކުގައި ނިއުކްލިއާ ބޮން ގިނަ އަދަދަކަށް އުފުއްލޭނެއެވެ.
މިހާރު ވެސް 200 އެއްހާ މަތިންދާބޯޓާއެކު އެމެރިކާގެ މަނަވަރުތައްވެސް ދަނީ ޔަމަން ކައިރީގައި ހަރަކާތްތެރިވަމުންނެވެ. މީގެ އިތުރުން ހުޅަނގު ޕެސިފިކް ކަނޑުގައި ހަރަކާތްތެރިވަމުން ދިޔަ އަސްކަރީ މަނަވަރުތައް މެދުއިރުމައްޗަށް ފޮނުވުމަށްވެސް އެމެރިޚާ ސަރުކާރުން ވަނީ ނިންމާފައެވެ.
މިއީ އިރާނާ ދެކޮޅަށް އެމެރިކާއިން ހަނގުރާމައެއް ފަށަން ތައްޔާރުވާކަމުގެ ހެއްކެއްކަމަށް މަސްރަހު ދިރާސާ ކުރާ ފަރާތްތަކުން ދެކެއެވެ.
