ރާއްޖޭގެ ސިނގިރޭޓްގެ ވިޔަފާރި ކުރަމުންދާ ފަރާތްތަކުން ސަރުކާރާއި ދެކޮޅަށް އިދިކޮޅު ފަރާތްތަކަށް ފަންޑު ކުރަމުންދާ ކަމަށް ރައީސްް ޑރ. މުހައްމަދު މުއިއްޒު ވިދާޅުވެއްޖެއެވެ.
”ރައްޔިތުންނާ އެކު“ މި ނަމުގައި ރައީސް ކުރިއަށްގެންދަވާ ޕޮޑްކާސްޓުގެ ދެވަނަ އެޕިސޯޑުގައި ވާހަކަ ދައްކަވަމުން ރައީސް މުއިއްޒު ވިދާޅުވީ ސިނގިރޭޓް ވިއްކުމުގައި އުޅެނީކޮން ބައެއްތޯ ބަލާލިއިރު އެކަމުގައި އުޅެނީ ސަރުކާރާއި އިދިކޮޅު ފިކިރުގެ މީހުންކަމަށެވެ. އަދި އެކަން ކުރާ މީހުން ކަންކަން ސިޔާސީ ކުރަން ހިންގާ މުޒާހަރާތަކަށް ފަނޑުކުރާކަމަށްވެސް ރައީސް މުއިއްޒު ވިދާޅުވިއެވެ.
“ އެމީހުން އެބަ މުޒާހަރާތަކަށްވެސް އެބަ އެހީދޭ. ދެން އަޅުގަނޑަށް މައުލޫމާތު ލިބޭނެ ނޫންތޯ. އެމީހުން ބޭނުންވާނީ މަނާކޮށްފައި އޮތް އޮތުން ނިމުމަކަށް ގެންނަން ނޫންތޯ.“ ރައީސް މުއިއްޒު ވިދާޅުވިއެވެ.
މި މޭރުމުން ވާހަކަ ދައްކަވަމުން ރައީސް މުއިއްޒު ވަނީ ރައްޔިތުންގެ ސިއްގަތު ސިޔާސީ ނުކުރުމަށް ސިނގިރޭތްގެ ވިޔަފާރި ކުރާ ފަރާތަކަށް ގޮވާލާފައެވެ. އަދި ރާއްޖޭގައި ސިންގިރޭޓް ވިއްކުން ހުއްޓާލާ ކޮންމެވެސް އެހެން ވިޔަފާރިއަކަށް އެނބުރެންވެސް ރައީސް މުއިއްޒު ވަނީ ގޮވާލައްވާފައެވެ.
“ އަޅުގަނޑު އެދެން، ސިނގިރޭޓް އެތެރެކޮށް، ސިނގިރޭޓް ވިޔަފާރިކުރާ މީހުން، އެ ވިޔަފާރި ދޫކޮށްލަން. އެހެން ކަމަކާއިގެން އުޅެން. މިއީކީ ކުރާވަރުގެ ކަމެއް ނޫނޭ. ދެން މިއީ ކުޑަކުޑަ ގައުމެއް. މިއީކީ މިލިއަނުން، މިލިއަނުން މީހުން އުޅޭ ތަނެއް ނޫން. ކީއްކުރަން މިތާނގައި އެކަން ކުރަންވީކީ. އަޅުގަނޑުމެންގެ މި ކުޑަ މުޖުތަމައު ސަލާމަތްކުރިއްޔާ މާރަނގަޅެއްނު މިކަމުން.“ ރައީސް މުއިއްޒު ވިދާޅުވިއެވެ.
ރައީސް ވިދާޅުވީ ސިނގިރޭޓް ޓެކްސް ބޮޑުކުރީ ފަހަރަކު އެތިކޮޅެއް ބޮޑުކުރުމުން އެކަމުގެ ފައިދާ ވިޔަފާރުވެރިން ނަގާނެތީ އެ ފުރުސަތު ނުދެއްވުމަށްކަމަށެވެ.
“ އެކަމަކު މިކަހަލަ ކަމަކުން ދުރުކުރާކަށް ފަހަރަކު ފަހަރަކު ތަންކޮޅެއް ޓެކްސް ބޮޑުކޮށްގެނެއް މިކަމެއް ނުވާނެ. އެހެންވީމާ، ސިނގިރޭޓް އެތެރެކުރާ މީހުންނަށް އެ ދެވެނީ ފުރުސަތެއް. އެ މީހުން އެތަންކޮޅު އެޖަސްޓްކޮށްގެން ހަމަ ވިއްކަމުން ދާން އެ ވިޔަފާރި.“ ރައީސް ވިދާޅުވިއެވެ.
ރާއްޖޭގެ ޒުވާނުންނަށް ސިނގިރޭޓް މަނާކުރަން ކަނޑައަޅާ ޖެނެރޭޝަން ބޭން ކަނޑައެޅުމުގައި ގެންގުޢްލާ ވިސްނެވުންވެސް މިއަދު ރައީސް ޑރ. މުއިއްޒު ވަނީ އާއްމުކުރައްވާފައެވެ.
