އެމެރިކާއިން އީރާނަށް ހަމަލާދޭން ބޭނުން ނުވާކަމަށް އެމެރިކާގެ އިސް އޮފިޝަލަކު ވިދާޅުވެއްޖެކަމުގެ ހަބަރުތަކެއް ވަނީ ފެތުރިފައެވެ.
މިހާރު އެމެރިކާ އިން ބޭނުންވަނީ ނުސީދާކޮށް ވިޔަސް އީރާނާ އެކު ނިއުކްލިއާ މުއާހަދާގެ އެއްބަސްވުމަކަށް އައުމަށް ކަމަށް ވަނީ ވިދާޅުވެފައެވެ. އީރާނަށް ހަމަލާ ދީފިނަމަ އެމެރިކާއަށްވެސް އޭގެ ނޭދެވޭ އަސަރުތައް ވަރަށް ބޮޑަށް ކުރާނެކަމަށް ލަފާކޮށް މިގޮތަށް ވަނީ ނިންމާފައި ކަމުގައި މީޑިޔާ ރިޕޯޓްތަކުން ބުނެއެވެ.
އީރާން އެމެރިކާ ހަނގުރާމަ ފެށިއްޖެ ނަމަ އެމެރިކާ އަށް 1 ޓުރިލިއަން ޑޮލަރުގެ ގެއްލުން ވާނެކަމަށް ވަނީ ލަފާކޮށްފައެވެ. އެންމެ ބޮޑަށް އެމެރިކާއިން ޖެހިލުންވާ ކަމަކީ އީރާނުން ނިއުކްލިޔާ ބޮމެއް އުފައްދާނެ ކަމުގެ އިންޒާރު ދިނުމާއި ގުޅިގެން އީރާނު ނިއުކްލިއާ ބާރަކަށް ވެދާނެ ކަމުގެ ބޮޑު ބިރެވެ. އެހިސާބުން، އެމެރިކާ އަށްވެސް ދެން ކުރެވޭނެ އެއްވެސް ކަމެއް ނޯންނާނެ ކަމަށް އެމެރިކާގެ އިސް ގިނަ ފަރާތްތަކުން ވަނީ އެއްބަސްވެފައި ކަމުގައި ވެސް ހަބަރުތައް ބުނެ އެވެ.
އުތުރު ކޮރެއާ ވެސް ވަނީ ނިއުކްލިއާ ބާރަކަށް ވެ ހަމަ އެމޭރުމުން އެމެރިކާގެ ދަތިކުރުމުގެ ފިޔަވަޅުތަކުގައި އޮންނަ ނަމަވެސް އެމެރިކާ އަށް ކުޅެލަން ނުކެރޭ ގައުމަކަށް ވެފައެވެ. އުތުރު ކޮރެއާއިން މިސައިލް ޓެސްޓުތަށް ހަދަނީ ފުލު ފުލުގައެވެ. ނަމަވެސް އެމެރިކާ، އުތުރު ކޮރެއާ އަށް އިންޒާރުތަށް ދީ ދީ ތިބެނީއެވެ. އިތުރަކަށް އާ ކަންތައްތަކެއް ނުކުރެވެ އެވެ. އުތުރު ކޮރެއާ ވެސް ނިއުކްލިއާ ބޮން އުފެއްދީ އަމިއްލަ ނަފްސުގެ ދިފާއުގައެވެ. ހަމަ އެގޮތަށް އީރާނުން ވެސް އެމެރިކާ އަށް ވަނީ އިންޒާރު ދީފައެވެ.
މިހާރު ވެސް އީރާނުގައި ނިއުކްލިއާ ހަތިޔާރު ހުރިކަން ނުވަތަ ނެތް ކަމާއި މެދުގައި ވަނީ ވަރަށް ބޮޑެތި ޝައްކުތަކެއް ކުރެވެން ފަށާފަ އެވެ. ގިނަ ފަރާތްތަކުން ބުރަވާގޮތުގައި 5 ނޫނީ 3 ނިއުކްލިއާ ވޯހެޑް އީރާނުގެ އަތުގައި އޮންނާނެއެވެ. ނޫނީ އަދި އުޅޭނީ އުފެއްދުމުގެ މަގުމަތީގައެވެ.
އީރާނަކީ އަދުގެ ދުނިޔޭގައި ވަރުގަދަ ބާރެއް ގޮތުގައި ގިނަ ފަރާތްތަކުން ވަނީ ފާހަގަ ކޮށްފައެވެ. ރޭގައި އެމެރިކާގެ އަސްކަރިއްޔާގެ ޖޮއިންޓް ޗީފް ވިދާޅުވިގޮތުގައި އީރާނަށް ވައިގެ މަގުން ހަމަލާދީ އަދި ބަލި ނުކުރެވޭނެކަމުގައެވެ. އެމެރިކާގެ އަސްކަރިއްޔާ ބައި ބައި ނުވެ އެކަތިގަނޑަކަށް އޮވެއްޖެނަމަ އީރާނު ބަލިކުރެވިދާނެ ކަމުގައެވެ. ނަމަވެސް އީރާނުގެ އަސްކަރިއްޔާގެ ގާބިލްކަމާއި މެދު އެމެރިކާ އަށްވެސް އަދި އިޒްރޭލަށްވެސް ނޭނގޭ އެތަށް ކަމެއް ވާ ކަން އެފަރާތްތަކުން ވަނީ އެއްބަސްވެފައެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ ހަރުކަށި ކޮށް އީރާނަށް ބޮން އަޅާނެކަމަށް އިންޒާރުދީފައެވެ. ނަމަވެސް އީރާނުން ބުނެފައިވަނީ ހަމަލާ ދީފިނަމަ ރައްދު ހަމަލާ ވަގުތުން ދޭނެ ކަމުގައެވެ. މިހާރު ދުނިޔޭގަަި އެންމެ ބާރަށް އެންމެ އަޑުގަދަކޮށް އިވޭ ހަބަރަކީ އެމެރިކާއިން އީރާނަށް ބޮން އަޅާނެކަމުގެ ހަބަރުތަކެވެ. މި ހަނގުރާމަ ފެށިއްޖެ ނަމަ މުޅި ދުނިޔެއަށް ވެސް އެކަމުގެ ނޭދެވޭ އަސަރުތައް ކުރާނެ ކަމީ ޔަގީންކަމެކެވެ.
