ރާއްޖޭގައި ދުންފަތުގެ އިސްތިއުމާލު ކުރެވޭ އުމުރުފުރާ ކަނޑައެޅުމަށް ތިން ގޮތެއް ހުށަހަޅައި، އާންމުންގެ ހިޔާލު ހޯދުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުޅުވާލައިފިއެވެ.
މިކަމަށްޓަކައި ”ޖެނެރޭޝަން ބޭން“ އެއް މުހިންމު ކަމަށާއި ކަމާބެހޭ ފަރާތްތަކާ މަޝްވަރާކޮށް، ދިރާސާކުރުމަށްފަހު ކެބިނެޓް ކަރުދާހެއް ތައްޔާރުކުރެއްވުމަށް ހެލްތު މިނިސްޓަރަށް އިރުޝާދު ދެއްވާފައިވާނެ ކަމަށްވެސް ރައީސް ވިދާޅުވެފައިވެއެވެ.
ދުންފަތުގެ އިސްތިއުމާލުކުރުން ހުއްޓުވުމަކީ ރައީސް މުއިއްޒު ނުހަނު ބޭނުންފުޅުވާ ކަމެއްކަމަށް ވެސް ވިދާޅުވެފައިވެއެވެ.
ރައީސް ހުށަހަޅުއްވާފައިވާ ތިން ގޮތަކީ 2000ވަނަ އަހަރުން ފެށިގެން އުފަންވެފައިވާ ކުދިންނަށް (25 އަހަރުން ދަށުގެ އުމުރުފުރާ) ނުވަތަ 2004ވަނަ އަހަރުން ފެށިގެން އުފަންވެފައިވާ ކުދިންނަށް (21 އަހަރުން ދަށުގެ އުމުރުފުރާ) ނުވަތަ 2007 ވަނަ އަހަރުން ފެށިގެން އުފަންވެފައިވާ ކުދިންނަށް (18 އަހަރުން ދަށުގެ އުމުރުފުރާ) ދުންފަތް މަނާކުރާގޮތަށް ކަނޑައެޅުމެވެ.
މިއީ ކުރިއަށް އޮތް ޖީލު ދުންފަތުން ސަލާމަތް ކުރުމަށް ގާނޫނެއް ހެދުމަށް ރައީސް ވިސްނަވާ ގޮތްތަކެވެ.
ރައީސް މުއިއްޒު ވަނީ ދުންފަތުގެ އިސްތިއުމާލުކުރާ އެހެނިހެން އުމުރުފުރާތަކުގެ މީހުންވެސް އެ އާދަ ދޫކޮށްލުމަށް އިލްތިމާސްކުރައްވާފައެވެ. އަދި ރާއްޖެއަށް ދުންފަތުގެ ބާވަތްތައް އެތެރެކޮށް، ވިޔަފާރި ކުރާ ފަރާތްތަކުން އެކަން ހުއްޓާލުމަށް ރައީސް މުއިއްޒު ވަނީ އިލްތިމާސް ކުރައްވާފައެވެ.
