ތަނަވަސްކަން ހުރި ޢުމުރުން ދޮށި ފިރިހެނުންނާއި ކައިވެނިކޮށްގެން އުޅޭ ޒުވާން އަންހެންކުދިންގެ ތެރެއިން އަހުރެންގެ ގާތަށް ލަފާ ހޯދަން އަންނަ ގިނަ ކުދިންގެ ކިބައިން އެނގޭ ގޮތުގައި އެކުދިން އެމީހުންނާއި ކައިވެނިކުރަނީ އެކުދިންނަށް ލިބޭ ނުރަނގަޅު މެސެޖްތަކެއްގެ ސަބަބުންނެވެ.
އެއިގެ ތެރޭގައި އަމިއްލަ ގޭތެރެއިން އިވޭ އަޑުތައްވެސް ހިމެނެއެވެ. އެއީ ލިބޭ މިންވަރުން ދެކޮޅު ނުޖެހިގެން އުޅެންޖެހޭ ކަމުގެ ވާހަކަތައް ފަދަ އަޑުތަކެވެ. އެހިސާބުން އެކުދިންނަށް ވިސްނެން ފަށަނީ އުފާވެރި ދިރިއުޅުމެއް ލިބޭނީ ހަމައެކަނި ތަނަވަސްކަމުން ކަމަށެވެ.
މީގެ އިތުރުން ތަނަވަސް މީހުންނާއި ކައިވެނިކޮށްގެން ތިބޭ އެކުވެރި އަންހެނުން އެމީހުން ފައިސާގެމަތީގައި އުދުހޭކަމުގެ ވާހަކަތައް ފަޤީރުކުދިންގެ ގާތުގައި ދެއްކުމުން އެފަދަ ތަނަވަސްކަމެއް އޭނާއަށް ލިބެންވެސް ބޭނުންވެވެނީއެވެ.
ޙަޤީޤަތުގައި މިފަދަ ވާހަކަތައް ގިނަފަހަރު ދައްކަނީ އެމީހުން ހިތްހަމަޖެހިގެން އުފަލުގަ ތިބެގެނެއްވެސް ނޫނެވެ. އެމީހުން ތިބީ ހިތްހަމަނުޖެހިކަން ނުއަންގަންވެގެންނެވެ.
މީގެ އެންމެ ދެރަކަމަކީ ނުކުންނަ ނުރަނގަޅު ނަތީޖާއެވެ. ފިރިމީހާގެ ކިބައިން ލިބޭ ހަމައެކަނި އުފަލަކީ އޭނާގެ ތަނަވަސްކަން ކަމަށްވެއްޖެނަމަ ކުޑަ ދުވަސްކޮޅެއްގެ ތެރޭގައި ފިރިމީހާގެ މަތިން ފޫހިވެ އެހެން ގޮތެއް ހޯދައެވެ. އެއީ އެކަމުން ހިތްހަމަޖެހުން ނުލިބޭކަން ތަޖުރިބާ ކުރެވުމުމުންނެވެ. އެހިސާބުން ގިނަ އަންހެން ކުދިން ތަނަވަސް ފިރިމީހާ އާއި ވަކިވެ އާދައިގެ ފެންވަރުގެ ފިރިހެނުންނާއި ކައިވެނިކުރެއެވެ. އަދި މާ އުފަލުގައިވެސް ދިރިއުޅެއެވެ.
އެހެންވީމާ ތަނަވަސްކަން ހުންނަ ތަނަވަސް ދޮށީ ޢުމުރުގެ ފިރިހެނުންނާ ކައިވެނިކުރާ ޒުވާން އަންހެން ކުދިން ކުށްވެރި ކުރެވޭކަށް ނެތެވެ. އެމީހުންނަކީ ފައިސާއަށް ވިކިގެން ކައިވެނިކުރާ ބައެއް ނަމަ ހަޤީޤަތް ވިސްނުމުން އަމިއްލައަށް އެދިގެން ތަނަވަސް ފިރިންނާއި ވަކިވާންވީ ކީއްވެގެން ހެއްޔެވެ؟
