އިސްރާއީލުގެ ނިއުކްލިޔާ މަރުކަޒުތައް ފުނޑާލުމަށް ޓަކައި އީރާނުން އަޑަށްވުރެ 16 ގުނަ ބާރަށް ދަތުރުކުރާ ހާހަކަށް ވުރެ ގިނަ ބެލަސްޓިކް މިސައިލް ތައްޔާރީ ހާލަތުގައި ބަހައްޓާފައިވާކަމުގެ ޖާސޫސީ މައުލޫމާތު ލިބިފައިވާކަމަށް އިސްރާއީލު ބުނެފިއެވެ.
އިސްރާއީލުގެ މަސްއޫލުވެރިއަކާ ހަވާލާދީ ޔަހޫދީ ނޫހެއްކަމަށްވާ ”މައާރީފް“ ބުނިގޮތުގައި އިސްރާއީލުގެ ނިއުކްލިޔާ މަރުކަޒުތަކަށް ހަމަލާދިނުމަށް ހާހަކަށް ވުރެގިނަ މިސައިލް ތައްޔާރީ ހާލަތުގައި ބައްހައްޓާފައިވަނީ އީރާނުގެ ހުޅަނގުގެ ފަރުބަދަތަކުގެ އަޑީގައިވާ ހަތިޔާރުގެ ބިންގަރާހެއްގައި ކަމަށް ބެލެވޭ ކަމުގައެވެ.
މި ހުރިހާ މިސައިލްތަކަކީ ވެސް ރާޑަރަށް ނާރާ އަދި ވައިގެ ދިފާއީ ނިޒާމުތަކުން ވައްޓާ ވެސް ނުލެވޭނެ މިސައިލްތަކެކެވެ. އެއީ ހައިޕާ ސޮނިކް މިސައިލްތަކަށްވާތީއެވެ. އެއްފަހަރާ މީގެ ތިންބައިކުޅަ އެއްބައި މިސައިލުން ހަމަލާދިން ނަމަވެސް އިސްރާއީލުގެ ހުރިހާ ނިއުކްލިޔާ މަރުކަޒުތަކަށް ފުނޑާލައި ބިމާހަމަކޮށްލެވިދާނެ ކަމަށް ވެއެވެ.
އާދައިގެ މިސައިލްތައް ވެސް އެއްފަހަރާ ގިނައިން ފޮނުވައިފިނަމަ އެއްވަގުތަކު އެ ހުރިހާ މިސައިލްތަކެއް ދިފާއުކޮށް މަތަކުރުމަކީ އިސްރާއީލުގެ އަޔަންޑޯމް ފަދަ ވައިގެ ދިފާއީ ނިޒާމުތަކަށް ވެސް ކުޅަދާނަކަމެއް ނޫނެވެ.
ޚާއްސަކޮށް ހައިޕާ ސޮނިކް މިސައިލް ފަދަ ރާޑަރަށް ނާރާ މިސައިލްތަކަކީ ވައިގެ ދިފާއީ ނިޒާމުތަކަށް މަތަކުރެވޭނެ މިސައިލްތަކެއް ނޫނެވެ. ޔަމަންގެ ޙޫޘީން އިސްރާއީލަށް ފޮނުވާ މިސައިލްތަކުގެ ތެރެއިންވެސް ހައިޕާ ސޮނިކް މިސައިލްތައް އިސްރާއީލުގެ ސަރަހައްދުތަކަށް އަރައެވެ.
ނަމަވެސް ހޫޘީންގެ މިސައިލްތަކުގެ އަމާޒު އެހާ އެކުއިރޭޓް އެއްނޫންކަމުން ޕިން ޕޮއިންޓަށް ނުދަނީއެވެ. ޕިންޕޮއިންޓްކޮށް އަމާޒު ހިފުމުގައިވެސް ޙޫޘީންގެ މިސައިލްތަކުގައި ގިނަ މައްސަލަތަކެއް އުޅޭކަމަށް ވެއެވެ.
ނަމަވެސް ރިޕޯޓްތައް ބުނާގޮތުން އީރާނުގެ މަތީފެންވަރުގެ ޓެކްނޮލޮޖީގެ މިސައިލްތަކަކީ ޕިން ޕޮއިންޓް އެކިއުރެސީ ގެ ފެންވަރު ވަރަށް މަތީ މިސައިލްތަކެކެވެ. އިސްރާއީލުގެ ނޫހެއްކަމަށްވާ ”މައާރީފް“ ބުނާގޮތުން އެމެރިކާ ނޫނީ އިސްރާއީލުން އީރާނަށް ހަމަލާ ދީފި ހާލަތެއްގައި އީރާނުން ފުރަތަމަ ރައްދު ދޭން ރާވާފައިވަނީ އިސްރާއީލުގެ ނިއުކްލިޔާ މަރުކަޒުތަކަށެވެ.
އިސްރާއީލުގެ މައި ނިއުކްލިޔާ މަރުކަޒުކަމަށްވާ ދައިމޫނާ ނިއުކްލިޔާ ރިއެކްޓަރު ހުންނަނީ ބިމުއަޑީގައެއް ނޫނެވެ. އެތަން ހުންނަނީ އިސްރާއީލު ވެރިވެގަނެގެން އުޅޭ ފަލަސްތީނުގެ ނަގަބް ސަހަރާގެ ހަނަފަސް ހިސާބެއްގައެވެ. އިސްރާއީލަކީ ކުޑަ ގައުމެއްކަމުން އިސްރާއީލުގެ ނިއުކްލިޔާ މަރުކަޒުތައް ހުންނަނީވެސް ވަރަށް ކައިރިކައިރީގައެވެ.
މިއީ މިތަންތަނަށް ހަމަލާދޭން އީރާނަށް ފަސޭހަވެގެންދާނެ ކަމެއްގެ ގޮތުގައި ތަޖުރިބާކާރުން ދެކޭ ކަމެކެވެ.
އިސްރާއީލުގެ ނިއުކްލިޔާ މަރުކަޒުތައް ހުންނަ ނަގަބް ސަރަހައްދުގައި އިސްރާއީލުވަނީ ވަރަށް ވަރުގަދައަށް ވައިގެ ދިފާއީ ނިޒާމުތައް ރުކުރުވާލާފައެވެ. ނަމަވެސް މިދިޔަ އަހަރު އީރާނުން އާދައިގެ މިސައިލް ބޭނުންކޮށްގެން އިސްރާއީލަށް ދިން ހަމަލާއެއްވެސް އިސްރާއީލުގެ ނިއުކްލިޔާ މަރުކަޒެއްގެ ކައިރިއަށް އަރާފައިވެއެވެ.
އެމެރިކާގެ ހަރުކަށި ރައީސް ޓްރަމްޕް ވަނީ އީރާނަށް ހަމަލާދޭނެކަމުގެ އިންޒާރު ދިނުމަށްފަހު އީރާނުގެ ކައިރިއަށް ހަނގުރާމައިގެ މަނަވަރުތައް ފޮނުވައި އީރާނަށް ބިރުދައްކަން ފަށާފައެވެ.
އީރާނުންވަނީ އެމެރިކާ ހަމަލާއެއް ދީފިނަމަ ރައްދުގައި އިންޑިއާ ކަނޑުގައިވާ އެމެރިކާގެ އަސްކަރީ މަރުކަޒު ޑިއެގޯ ގާސިޔާ ހިމެނޭގޮތަށް ސަރަހައްދުގައިވާ އެމެރިކާގެ ހުރިހާ އަސްކަރީ މަރުކަޒުތަކަށް ހަމަލާދޭނެކަމުގެ އިންޒާރު ދީފައެވެ.
އަދި ގަލްފުގެ ސަރަހައްދު އެއްކޮށް ބަންދުކޮށް ގަލްފުގައިވާ އެމެރިކާގެ މަސްލަހަތުތަކަށް ހަމަލާދޭނެކަމަށް އީރާން ބުނެއެވެ. މީގެއިތުރުން ގަލްފުގެ އެއްވެސް ގައުމެއް ގެ ސަރަހައްދެއް ބޭނުންކޮށްގެން އީރާނަށް ހަމަލާދީފިނަމަ ގަލްފުގެ ގައުމުތަކުގެ ތެލުގެ މަރުކަޒުތައް ހަލާކުކޮށްލާނެކަމުގެ އިންޒާރުވެސް އީރާނުންވަނީ ދީފައެވެ.
