ދަޢުލަތުގެ ބަޖެޓުން ކައުންސިލްތަކަށް ދޫކުރާ ބްލޮކް ގްރާންޓްގައި ތަޖުރިބާ ދަތުރުގެ ނަމުގައި، ކައުންސިލްތަކުންދަނީ ބެންކޮކަށާއި އެހެނިހެން ތަންތަނަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ރައްޔިތުންނާއެކު ޕޮޑްކާސްޓްގައި މިއަދު ވާހަކަފުޅު ދައްކަވަމުން ރައީސް ޑރ. މުޢިއްޒު ވިދާޅުވީ، ކައުންސިލްތައް ބާރުވެރިކުރުވާ ވާހަކަ ދައްކާއިރު ކައުންސިލްތައްވެސް ޒިންމާދާރު ކަމާއެކު މަސައްކަތް ކުރާ މަންޒަރު ރައްޔިތުންނަށް ފެންނަންވާނެ ކަމަށެވެ.
އެގޮތުން ކައުންސިލްތަކަށް ބްލޮކް ގްރާންޓްގެ ގޮތުގައި ލިބޭ ފައިސާ ހޭދަކުރަނީ ރައްޔިތުންނަށް އެންމެ ފައިދާހުރި ގޮތަށްތޯ ބެލޭނެ ނިޒާމެއް ފިނޭންސް މިނިސްޓްރީގެ ދައުރެއް އޮންނަ ގޮތަށް ގެނައުމަށް ވިސްނަވާ ކަމަށްވެސް ރައީސް ވިދާޅުވިއެވެ.
“މިހާރު ވާގޮތަކީ، ބްލޮކް ގްރާންޓް ނަގައިގެން ދަނީ ތަޖުރިބާ ދަތުރު ކިޔާފައި، ބެންކޮކަށާއި ތަންތަނަށް. މުޅި ކައުންސިލް އޮތްގޮތަށް އިނގޭތޯ. ރައްޔިތުންނަށް ކޮން ފައިދާއެއްތޯ އެއިން ކުރަނީ؟ އެއީއެއް ނޫނޭ ބްލޮކް ގްރާންޓް ބޭނުންކުރަން އޮންނަ ކަމަކީ.” ރައީސް މިއަދު ވިދާޅުވިއެވެ.
ހަމައެއާއެކު ރައީސް ވަނީ، ބައެއް ކައުންސިލްތަކުގެ ވިސްނުން ހުންނަ ގޮތް ބަދަލު ކުރެއްވުމަށްވެސް އިލްތިމާސް ކުރަށްވާފައެވެ.
“ދައުރު ނިމޭއިރުގައި، ބްލޮކް ގްރާންޓް ސޭވްކުރަން އެބަ ބޭނުންވޭ. ޚަރަދުނުކޮށް ބަހައްޓަން. ބްލޮކް ގްރާންޓް މިއީ، ޤާނޫނުގައި، ލާމަރުކަޒީ ޤާނޫނުގައި، ކައުންސިލްތަކުގެ މައްޗަށް މަތިކޮށްފައި އޮތް ހުރިހާ ޒިންމާއެއް އަދާކުރަން ދޭ ފައިސާ. ވަރަށްގިނަ ޒިންމާތައް ހުންނާނެ. އެކަންކަން ކުރަންދޭ ފައިސާވެސް ޚަރަދުނުކޮށް، ބެންކޮކަށް ދިޔުމާއި، ސޭވްކުރުން.” ރައީސް މިއަދު ވިދާޅުވިއެވެ.
އެހެންކަމުން ބްލޮކް ގްރާންޓް ސޭވިންގ އެކައުންޓަކަށް ނުލެވޭނެ ގޮތަށް ކަންކަން ބައްޓަން ކުރެއްވުމަށް މަސައްކަތް ކުރަށްވާނެ ކަމަށް ރައީސް މިއަދު ވިދާޅުވެފައިވެއެވެ.
