ޒަވާޖީ ޙަޔާތެއް ފެށި ނަމަވެސް ނެށުމާއި ޕާފޯމިންގެ ދާއިރާއިން ނުގެއްލޭނެ ކަމަށް ރާއްޖޭގެ މަޝްހޫރު ފަންނާނު ސުނީތާ ބުނެފިއެވެ. ސުނީތާ މިހެން ބުނެފައި ވަނީ ބޮޑު އީދާއި ގުޅިގެން އޭނާ އުފަން ރަށް ކަމަށްވާ އއ. އުކުޅަހުގައި ރޭ ބޭއްވި އީދު ސްޓޭޖް ޝޯގައި ވާހަކަދައްކަމުންނެވެ.
ފާއިތުވި ދުވަސްތަކުގައި ސުނީތާގެ ލޯބިވެރިޔާ ކަމަށް ބެލެވޭ މީހަކާއެކު ނަގާފައިވާ ފޮޓޯތަކެއް ވަނީ އާންމުވެފައެވެ. މި ފޮޓޯތަކުގައި ސުނީތާ އާއިއެކު ފެންނަނީ މިސްރަށް ނިސްބަތްވާ، މީހެކެވެ. ރޭގެ ޝޯގައި ވާހަކަދައްކަމުން ސުނީތާ ބުނެފައި ވަނީ، ކުރިމަގުގައި ފިރިމީހާ ވެސް ނެށުން މަނާ ނުކުރާނެ ކަމަށެވެ. އަދި ކައިވެނިކުރި ނަމަވެސް ނެށުމުގެ ދާއިރާ ދޫކޮށްނުލާނެ ކަމުގެ ޔަގީންކަން ސުނީތާ ވަނީ ދީފައެވެ.
”ސުނީ މީހަކާ އިނަސް އަބަދުވެސް ނެށުމުގެ ދާއިރާއިން ފެންނާނެ، މައި ފިއުޗާ ހަސްބެންޑުވެސް މިކަން މަނާ ނުކުރާނެ. އަބަދުވެސް ފޭނުންނާއެކީ ސުނީ ފެނިގެންދާނެ.“ ސުނީތާ ބުންޏެވެ.
