އިސްރާއީލްގެ ރައްޔިތުން ބިންގަރާސްތައް ކައިރީގައި ތިބުމަށް އެ ގައުމުގެ އަސްކަރިއްޔާ އިން ދެންމެ އަންގައިފިއެވެ.
އިސްރާއީލް އާއި އީރާންއާ ދެމެދުގައި ވަރުގަދަ ހަމަލާތަކެއް މިހާރު ދަނީ ދެމުންނެވެ.
އިސްރާއީލްގެ އަސްކަރިއްޔާގެ ތަރުޖަމާނު ބްރިގޭޑިއާ ޖެނެރަލް އެފީ ޑެފްރިން ބުނީ ކުރިއަށް އޮތް ދުވަސްތަކުގައި އީރާނުން އިސްރާއީލަށް އަމާޒުކޮށް އިތުރު ބެލިސްޓިކް މިސައިލް އައުން އެކަށީގެންވާތީ އިސްރާއީލްގެ ރައްޔިތުން ރައްކާތެރިވެ ތިބުން ވަރަށް މުހިންމު ކަމަށެވެ.
”ކުރިއަށް އޮތީ ގޮންޖެހުން ބޮޑު ދުވަސްތަކެއް. ކުރިއަށް އޮތް ދުވަސްތަކުގައި އިތުރު ހަމަލާތައް އަމާޒުވާނެ،“ ތަރުޖަމާނު ބުންޏެވެ.
ތަރުޖަމާނު ބުނީ އިސްރާއީލްގެ ވައިގެ އަސްކަރިއްޔާ އިން އީރާނަށް ދޭ ހަމަލާތަކަށް ހުއްޓުމެއް ނާންނާނެ ކަމަށާއި އީރާނަށް މިހާރު ވެސް ހަމަލާތައް ދެމުން އަންނަ ކަމަށެވެ.
”މި ގަޑިއިރުގެ ތެރޭގައި ވެސް ތެހްރާނަށް އެތައް ހަމަލާއެއް މި ދެނީ ދެމުން. އެމީހުންގެ ނިއުކްލިއާ ޕްރޮގްރާމްތަކާއި އަސްކަރީ ގާބިލްކަން ހީނަރު ކުރުމަށް ކުރެވެން ހުރި ހުރިހާ ކަމެއް މި ދަނީ ކުރަމުން،“ އިސްރާއީލްގެ އަސްކަރިއްޔާގެ ތަރުޖަމާނު ބުންޏެވެ.
