އިސްރާއީލްގެ އަޔަން ޑޯމްގެ ދިފާއީ މިސައިލްތައް ހުސަވުމަށް ގާތްވެފައިވާ ކަމަށް ރިޕޯޓްކޮށްފިއެވެ.
”ޓައިމްސް އޮފް އިސްރާއީލް“ ގައި އެ ގައުމުގެ ޑިފެންސް ފޯސްއާއި ހަވާލާދީ ރިޕޯޓްކޮށްފައިވާ ގޮތުގައި ފާއިތުވެދިޔަ ދުވަސްތަކުގައި އީރާނުން އިސްރާއީލަށް ދެމުންދާ ހަމަލާތަކާއި ގުޅިގެން އެ ގައުމުގެ ދިފާއީ މިސައިލްތައް ވަނީ ހުސްވުމާއި ގާތްވެފައެވެ.
އެގޮތުން 2024 ވަނަ އަހަރު އީރާނުން ދީފައިވާ ހަމަލާތަކުން ދިފާއުވުމަށް މިސައިލް ބޭނުންކުރި ވަރަށް މިދިޔަ ފަސް ދުވަސްތެރޭގައި ދިފާއީ މިސައިލް ބޭނުންކޮށްފައިވާ ކަމަށް ބުނެފައި ވެއެވެ.
ދިފާއީ މިސައިލްތައް ހުސްވުމާއި ގާތްވެފައިވާތީ އެކަމުގެ ކަންބޮޑުވުން އިސްރާއީލުން އެމެރިކާއާއި ހިއްސާކޮށްފައިވާ ކަމަށް ވެސް ރިޕޯޓްކޮށްފައިވެއެވެ.
ބޮޑުވަޒީރު ބެންޖަމިން ނަތަންޔާހޫގެ އޮފީހުން ބުނާގޮތުގައި އިސްރާއީލުން މިދިޔަ ހުކުރު ދުވަހު އީރާނަށް ވައިގެ ހަމަލާތައް ދޭން ފެށި ފަހުން އީރާނުން އިސްރާއީލަށް އަމާޒުކޮށް 400 އަށް ވުރެ ގިނަ މިސައިލާއި ގިނަ ޑްރޯންތަކެއް ފޮނުވާލައިފައެވެ.
މި ހަމަލާތަކުގެ ސަބަބުން އިސްރާއީލުގެ 40 ތަނަކަށް އަސަރުކޮށްފައިވާއިރު، ޓެކްސް އޮތޯރިޓީއަށް 19،000 އެއްހާ ގެއްލުމުގެ މައްސަލަ ވަނީ ހުށަހަޅާފައިވާ ކަމަށްވެސް ބުނެފައި ވެއެވެ.
އެ އޮފީހުން ބުނީ މިހާތަނަށް އިސްރާއީލުގެ 24 މީހުން މަރުވެ، 800 އަށް ވުރެ ގިނަ މީހުން ޒަހަމްވެފައިވާ އިރު، 3،800 އަށް ވުރެ ގިނަ މީހުން އެ މީހުން ދިރިއުޅޭ ގެއިން ނުކުންނަން ޖެހިފައިވާ ކަމަށެވެ.
އިސްރާއީލާއި އީރާނާއި ދެމެދު ވަރުގަދަ ހަމަލާތައް ބަދަލު ކުރަން ފެށީ މިދިޔަ ހުކުރު ދުވަހު އިސްރާއީލުން އިސްވެ، އީރާނަށް ދިން ހަމަލާތަކާއި ގުޅިގެންނެވެ.
އެގޮތުން އިސްރާއީލުން ވަނީ އީރާނުގެ ނިއުކްލިއާ މަރުކަޒުތަކަށާއި އަސްކަރީ މަރުކަޒުތަކަށް އަމާޒުކޮށް، ގިނަ ހަމަލާތަކެއް ދީފައެވެ. އެއާއެކު އީރާނުން ވެސް ވަނީ ރައްދު ހަމަލާގެ ގޮތުން އިސްރާއީލާ ދެކޮޅަށް ވަރުގަދަ ހަމަލާތަކެއް ދޭން ފަށައިފައެވެ
