ސިންގަޕޫރަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން، ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާއި އެމަނިކުފާނުގެ އަނބިކަނބަލުން މެޑަމް ސާޖިދާ މުހައްމަދު، ސިންގަޕޫރުގައި ދިރިއުޅޭ ދިވެހި އާއިލާތަކާ މިއަދު ބައްދަލުކުރައްވައިފިއެވެ.
މި ބައްދަލުކުރެއްވުން އޮތީ ސިންގަޕޫރުގައި ހުންނަ މަޝްހޫރު ރިޓްސް ކާލްޓަންގެ ގާޑަން ޕެވީލިއަންގައެވެ.
މި ބައްދަލުކުރެއްވުމުގައި ރައީސް މުއިއްޒު ވަނީ ސިންގަޕޫރުގައި ދިރިއުޅޭ ކޮންމެ އާއިލާއަކާ ވަކިވަކިން ބައްދަލުކުރައްވާ، އެ އާއިލާތަކާއެކު ވަގުތުކޮޅެއް ހޭދަކުރައްވާފައެވެ. އަދި ދިވެހިންގެ ޝަކުވާތައް އަޑުއައްސަވައި ބޭރު ގައުމުތަކުގައި ދިރިއުޅޭއިރު ދިމާވާ ގޮންޖެހުންތައް ރައީސްއާ ހިއްސާކުރެވުނެވެ.
ދިވެހި އާއިލާތަކާއެކު ރައީސުލްޖުމްހޫރިއްޔާގެ ދެކަނބަލުން ވަނީ ހަނދާނީ ފޮޓޯ ވެސް ނަންގަވާފައެވެ.
ދިވެހި އާއިލާތަކާ ބައްދަލުކުރެއްވުމަށް ބޭއްވި ބައްދަލުވުމުގައި ވާހަކަފުޅުދައްކަވަމުން ޚާރިޖީ ވަޒީރު ޑރ. އަބްދުﷲ ޚަލީލް ވަނީ، ރައީސް މުއިއްޒު ބޭރު ގައުމުތަކުގައި ދިރިއުޅޭ ދިވެހިންނާ ބައްދަލުކޮށް، އެމީހުންގެ ހާލުއަހުވާލު އޮޅުންފިލުވުމަށް ހާއްސަ އިސްކަމެއް ދެއްވާކަން ފާހަގަކުރައްވާފައެވެ. ވަޒީރު ވިދާޅުވީ، ރައީސް ވެސް އެދިވަޑައިގަންނަވަނީ އެކި ބޭނުންތަކަށް ދިވެހިން އެކި ގައުމުތަކަށް ދިރިއުޅުން ބަދަލުކުރި ނަމަވެސް، ދިވެހިންގެ އަހުލާގާއި ރާއްޖޭގެ ރީތި ނަން ދެމެހެއްޓުމަށް ހާއްސަ އިސްކަމެއް ދިނުމަށް ކަމަށެވެ.
”ދުނިޔެ ތަރައްގީވަމުން އަންނައިރު ދިވެހި މުޖުތަމައުގެ ވެސް ވިސްނުމާއި ފިކުރު ބަދަލުވެގެންދޭ. ދަރިންނަށް ކިޔަވައިދިނުމަށާއި، އަމިއްލައަށް ތައުލީމް ލިބިގަތުމަށާއި ވަޒީފާގެ ގޮތުން ވެސް ތަންތަނަށް ބަދަލުވަނީ އަމާން މާހައުލެއްގައި އަމާން ދިރިއުޅުމަށް. ބައެއް ފަހަރު ބައެއް ދަތިތައް ދިމާވޭ. ނަމަަވެސް ކޮންމެ މީހަކީ ވެސް ދިވެހީންގެ ރީތި ސިފަތަކާއި އަހުލާގު އަދި ދިވެހިންގެ ރީތި ނަން ހިފެހެއްޓުމަކީ މުހިއްމުކަމެއް،“ ޚަލީލް ވިދާޅުވިއެވެ.
ސިންގަޕޫރަށް ރައީސް ކުރައްވާ ދަތުރުފުޅަކީ ކާމިޔާބު ދަތުރުފުޅެއްކަން ފާހަގަކުރައްވާ، ދިވެހީންނަށް ފައިދާވާނެ ގިނަ ކަންކަން ހާސިލް ކުރުމަށް މަޝްވަރާކޮށް އެއްބަސްވުންތަކުގައި ސޮއިކުރެއްވިކަން ވެސް ވަޒީރުގެ ވާހަކަފުޅުގައި ފާހަގަކުރެއްވިއެވެ.
ރައީސްގެ ދެކަނބަލުން ސިންގަޕޫރަށް ކުރައްވާ ރަސްމީ ދަތުރުފުޅަކީ، އެ ގައުމުގެ ރައީސްގެ ހާއްސަ ދައުވަތަކަށް ކުރެއްވި ދަތުރުފުޅެކެވެ. ރައީސުލްޖުމްހޫރިއްޔާ އަންނަނީ އެމަނިކުފާނު ރާއްޖެއިން ބޭރަށް ކުރައްވާ ރަސްމީ ދަތުރުފުޅުތަކުގައި، އެ ގައުމުތަކުގައި ދިރިއުޅޭ ދިވެހީންނާ ބައްދަލުކުރައްވަމުންނެވެ.
