ބޮއެގެން ޕައްޓިތަޅަމުން ގޮސް މާލޭގެ އިމާރާތަކުން ވެއްޓުނު ހައްވާ ޔުމްނު ރަޝީދަށް އިންސާފު ހޯދަން ގޮވާލައި، ކުރި މުޒާހަރާގައި އިސްކޮށް އުޅުނު އައިޝަތު ޝިމަން އާއި އަބްދުﷲ މަހްޒޫމް މާޖިދުގެ ގައުމުގެ އަމަން ނަނގާލާފައި ވީ ނަމަވެސް އެމީހުންްގެ މައްޗަށް ކުރަނީ ސިޔާސީ ދައުވާއެއް ކަމަށް ވިދާޅުވެ އެމްޑީޕީގެ ޗެއާޕާސަން ބަގުރޫޓު ފައްޔާޒު އިސްމާއިލް އެމީހުންގެ ދިފާއުގައި ކޮށިކޮށްގެން ނިކުމެއްޖެ އެވެ.
މިދިޔަ އޭޕްރީލް މަހުގެ 18 ވަނަ ދުވަހުގެ ރޭ ހ. ފެންޓެނޯއީގެއިން ހ. މިޓާޒްގޭގެ ފުރާޅު މައްޗަށް ޔުމްނު ވެއްޓުނު މައްސަލައިގެ ތަހުގީގުގައި ފުލުހުންގެ އިހުމާލު އޮތް ކަމަށް ބުނެ، އޭރު ކޮންމެ ރެއަކުން ޒުވާނުންތަކެއް ވަނީ ފުލުހުންގެ އިދާރާ ދޮށުގައި މުޒާހަރާކޮށްފަ އެވެ. އެ މުޒާހަރާގެ ރޫޅާލުމަށް ފަހު ޝިމަން އާއި މަހްޒޫމް އޭރު ހައްޔަރުކޮށް، ބަންދުގެ މުއްދަތު ވެސް ކޯޓުން ޖެހިޔަސް ފަހުން އެމީހުން ދޫކޮށްލީ އެވެ.
އެ މައްސަލާގައި ޝިމަންގެ މައްޗަށް ކުރަނީ ގާނޫނު ތަންފީޒުކުރާ މުވައްޒަފަކަށް ހުރަސް އެޅުމުގެ ދައުވާ އެވެ. މަހްޒޫމުގެ މައްޗަށް ކުރަނީ އަނިޔާކުރުމުގެ ދައުވާ އެވެ.
