އިސްރާއީލުން އަނެއްކާވެސް އިރާނަށް ހަމަލާދީފާނެ ކަމުގެ އިންޒާރެއް ދީފިއެވެ.
މި އިންޒާރު ދީފައިވަނީ އިސްރާއީލުގެ ދިފާއީ ވަޒީރު އިސްރާއީލް ކާތްޒްއެވެ. އޭނާ ބުނީ އިސްރާއީލަށް ނުރައްކަލެއް ކުރިމަތިވެއްޖެނަމަ، އެއްވެސް ފަސްޖެހުމެއްނެތި އިރާނަށް ހަމަލާދޭން ފަސްނުޖެހޭނެ ކަމަށެވެ.
ކާތްޒްގެ އޮފީހުން ނެރުނު ބަޔާނެއްގައި، އޭނާ ބުނެފައިވަނީ ތެހެރާނާއި، ތަބްރީޒްއާއި، އިސްފަހާން އަށްވެސް އިސްރާއީލުގެ އަތް ފޯރާނެ ކަމަށާއި، އިސްރާއީލަށް ބިރު ދެއްކުމަށް ނުވަތަ ގެއްލުމެއް ދިނުމަށް މަސައްކަތްކުރާ ކޮންމެ ތަނަކަށް ވެސް އެ އަތް ފޯރާނެ ކަމަށެވެ.
މިދިޔަ ޖޫން މަހު އިސްރާއީލުން އިރާނާ ދެކޮޅަށް 12 ދުވަހުގެ ވައިގެ ހަނގުރާމައެއް ކޮށްފައިވާއިރު، މިކަމުގެ ސަބަބުން މުޅި ސަރަހައްދީ ހަނގުރާމައެއް ފެށިދާނެ ކަމުގެ ބިރު އުފެދިގެންދިޔައެވެ. ދެ ގައުމުގެ ދެމެދުގައި ހަނގުރާމަ ހުއްޓާލުމަށް އެއްބަސްވެފައިވަނީ އެމެރިކާގެ މެދުވެރިކޮށް، އެމެރިކާގެ ރައީސް ޑޮނަލްޑް ޓްރަމްޕް ޖޫން 23 ގައި އިއުލާން ކުރެއްވި ހަނގުރާމަ ހުއްޓާލުމުގެ އެއްބަސްވުމެއްގެ ދަށުންނެވެ.
އިސްރާއީލުން ބުނެފައިވަނީ އިރާނުން ނިއުކްލިއަާ ހަތިޔާރު އުފެއްދުމާ ކައިރިވަމުންދާ ކަމުގެ ކަންބޮޑުވުންތަކެއް ހުރި ކަމަށާއި، އެހެންކަމުން ހަނގުރާމައިގެ ތެރޭގައި އިރާނުގެ ނިއުކްލިއާ ސައިޓުތަކަށް ހަމަލާދީފައިވާނެ ކަމަށެވެ. ނަމަވެސް އިރާނުން ވަނީ މިކަން ދޮގުކޮށްފައެވެ. މި ހަމަލާތަކުގައި އެމެރިކާއިން ވެސް ބައިވެރިވެ، އިރާނުގެ ނިއުކްލިއާ ސައިޓުތަކަށް ހަމަލާދީފައިވެއެވެ.
މި ހަމަނުޖެހުމުގެ ތެރޭގައި އިރާނުން އިސްރާއީލަށް ފޮނުވާލި ގާތްގަނޑަކަށް 40 މިސައިލްތަކުގެ ތެރެއިން ބައެއް މިސައިިލުތައް ވަނީ ތެލް އަވީވް، ހައިފާ، ބީރުޝަބާ އަދި ގުދުސްގެ އަމާޒުތަކަށްވެސް އަރާފައެވެ.
އިސްރާއީލުގެ ހަމަލާތައް ހުއްޓާާނުލައިފިނަމަ އިރާނުންވެސް ހަމަލާތައް ދޭނެ ކަމަށް ބުނެފައިވަނިކޮށް ޓްރަމްޕް މެދުވެރިވެގެން މި ހަމަނުޖެހުން ވަނީ މެދުކެނޑިފައެވެ. ނަމަވެސް އަދިވެސް އިސްރާއީލުން ދަނީ އިރާނަށް ބަހުގެ ހަމަލާތައް އަމާޒުކުރަމުންނެވެ. އަދި ގޮތްދޫކޮށް ފަހަތަށް ނުޖެހެންޏާ އަދިވެސް އިރާނަށް އިސްރާއީލުން ހަމަލާ ދޭނެ ކަމުގެ އިންޒާރު މިއަދު ވަނީ ދީފައެވެ.
