އާރްޑީސީގެ 2021 ވަނަ އަހަރުގެ އޮޑިޓް ރިޕޯޓުން ބޮޑެތި މައްސަލަތަކެއް ހުރިކަމަށް އެޓާނީ ޖެނެރަލްގެ އޮފީހުން ހާމަކޮށްފިއެވެ.
އާރްޑީސީގެ އޮޑިޓް ރިޕޯޓުން ފާހަގަކޮށްފައިވާކަންތައްތަކުގެ ތެރޭގައި، ކުންފުނީގެ މުހިންމު މާލީ މުއާމަލާތްތަކުގެ ލިޔެކިޔުންތައް ނެތުމާއި، އެކައުންޓިން ސްޓޭންޑަޑްތަކާ ހިލާފު ކަންތައްތަކެއް ހުރިކަން ފާހަގަކޮށްފައިވެއެވެ.
އޮޑިޓުން ފާހަގަކުރެވުނު އެންމެ މުހިންމު މައްސަލަތަކުގެ ތެރޭގައި 8.9 މިލިއަން ރުފިޔާގެ ވިޔަފާރީގެ މުއާމަލާތްތަކުގައި ލިޔެކިޔުންތައް ނެތުމާއި، 83.4 މިލިއަން ރުފިޔާގެ މުއާމަލާތުގެ އަގުގެ ތަފްސީލްތައް ނެތުން ހިމެނެއެވެ. މީގެއިތުރުން 117.4 މިލިއަން ރުފިޔާގެ އިދާރީ ހަރަދުތަކުގެ ލިޔެކިޔުންތައްވެސް ފުރިހަމައަށް ނެތްކަން ފާހަގަކޮށްފައިވެއެވެ.
އޮޑިޓުން ދައްކާގޮތުގައި ކުންފުނީގެ މުދަލާއި، އިކުއިޕްމަންޓް، އިންވެންޓްރީ، ލިބެންހުރި ފައިސާ އަދި ދައްކަންޖެހޭ ފައިސާގެ ރެކޯޑުތައް ފުރިހަމައަށް ބަލަހައްޓާފައި ނުވެއެވެ. އަދި މޯލްޑިވްސް ނޭޝަނަލް ޝިޕިންގ ލިމިޓެޑާއެކު ވެފައިވާ ކުލީގެ އެއްބަސްވުންތަކުގެ ލިޔެކިޔުންތައްވެސް ނެތްކަން ފާހަގަކޮށްފައިވެއެވެ.
ގުޅުންހުރި ފަރާތްތަކާއެކު ކުރެވިފައިވާ މުއާމަލާތްތައް އައިއޭއެސް 24 އާ އެއްގޮތަށް ހާމަކޮށްފައި ނުވާކަމާއި، ގާނޫނީ މައްސަލަތަކާއި ފުލުހުންގެ ތަހުގީގުތަކާ ގުޅޭ ލިޔެކިޔުންތައް ފުރިހަމައަށް ނެތްކަންވެސް ވަނީ ފާހަގަކޮށްފައެވެ. އަދި ބޭންކް ރީކޮންސިލިއޭޝަންތައް ފުރިހަމަނުކުރުމުގެ ސަބަބުން ރެކޯޑު ނުކުރެވި ހުރި ދަރަނިތަކެއް ހުރުމުގެ ފުރުސަތު އޮތްކަމަށްވެސް އޮޑިޓުން ދައްކައެވެ.
މެނޭޖްމަންޓުގެ ޒިންމާ އަދާނުކުރުން ފާހަގަކޮށް، އައިއެފްއާރްއެސް އަދި އޮޑިޓިންގ ސްޓޭންޑަޑްތަކުން ލާޒިމްކުރާ ލިޔެކިޔުންތަކާއި ހާމަކުރަންޖެހޭ މައުލޫމާތުތައް ފުރިހަމައަށް ހާމަކޮށްފައި ނުވާކަން އޮޑިޓުން ވަނީ ފާހަގަކޮށްފައެވެ. އަދި ކުންފުނީގެ ހިންގުމުގެ ދާއިރާގައި ތިބި ފަރާތްތަކުންވެސް އެކަށީގެންވާ ބެލެހެއްޓުމެއް ނެތްކަން ވެސް ވަނީ ފާހަގަކޮށްފައެވެ.
ނިމިދިޔަ ސަރުކާރުގެ ފަހު ކޮޅު އާރްޑިސީގެ ކޮރަޕްޝަނުގެ މައްސަލަތަކެއް ފެންމަތިވިއެވެ.
