އެންސްޕާގެ ދަށުން ބޭސްފަރުވާއަށް ރާއްޖެއިން ބޭރަށް ދަތުރުކުރާ ބަލި މީހުނަށް 2000 ޑޮލަރާ ހަމައަށް ޑޮލަރު ލިބޭނެ ގޮތް ބޭންކް އޮފް މޯލްޑިވްސް އިން ހަމަޖައްސައިފިއެވެ.
ބޭންކުތަކުން މީގެ ކުރިން 2000 ޑޮލަރު ދޫކުރަނީ އާސަންދަ މެދުވެރިކޮށް ރާއްޖެއިން ބޭރަށް ބޭސްފަރުވާއަށް ދަތުރުކުރާ ބަލި މީހުންނަށް އެކަންޏެވެ.
ބީއެމްއެލުން މިއަދު ބުނީ މިއަދުން ފެށިގެން އެންސްޕާ އެހީ ލިބޭ ބަލި މީހުންނަށް 2000 ޑޮލަރާ ހަމައަށް ޑޮލަރު ދޫކުރާނެ ކަމަށެވެ. ނަމަވެސް އަދަދު ކަނޑައަޅާނީ އެންސްޕާއިން ކަމަށެވެ.
މީގެ އިތުރުން އަމިއްލަ ހަރަދުގައި ބޭސްފަރުވާއަށް ރާއްޖެއިން ބޭރަށް ދަތުރުކުރާ ބަލި މީހުންނަށްވެސް 1000 ޑޮލަރު ލިބޭނެ އިންތިޒާމު މިއަދުން ފެށިގެން ހަމަޖައްސާފައިވާ ކަމަށް ބީއެމްއެލުން ބުންޏެވެ.
ބީއެމްއެލުން މިގޮތަށް ހަމަޖައްސާފައި މިވަނީ ރައީސް ޑރ. މުހައްމަދު މުއިއްޒު އެދިވަޑައިގަތުމާ ގުޅިގެންނެވެ.
މިދިޔަ މަހުގެ 21 ވަނަ ދުވަހު ރައީސް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ރާއްޖެއިން ބޭރަށް ބޭސް ފަރުވާއަށްދާ ފަރާތްތަކަށް ޑޮލަރު ހޯދުމުގައި ލުއިފަސޭހަކޮށްދިނުމުގެ ގޮތުން، މިހާރުވެސް އާސަންދަ ބަލިމީހުނަށް ބޭންކު މެދުވެރިކޮށް 2000 ޑޮލަރާ ހަމައަށް ލިބޭ ފަދައިން، މިމަހުގެ އެއްވަނަ ދުވަހުން ފެށިގެން ބޭސްފަރުވާއަށް ރާއްޖެއިން ބޭރަށް ދާ އެހެން ފަރާތްތަކަށް ވެސް ޑޮލަރު ލިބޭނެ ގޮތް ހަމަޖައްސައިދެއްވަން ދަންނަވާފައިވާނެ ކަމަށެވެ.
މިއަދުން ފެށިގެން އެންސްޕާ ބަލިމީހުނަށްވެސް ބޭންކުތަކުން 2000 ޑޮލަރާ ހަމައަށް ޑޮލަރު ލިބޭނެ ގޮތް ހަމަޖެއްސުމަށާއި އަމިއްލަ ހަރަދުގައި ރާއްޖެއިން ބޭރަށް ބޭސް ފަރުވާއަށް ދާ ފަރާތްތަކަށް އެ ތާރީހުން ފެށިގެން 1000 ޑޮލަރު ބޭންކުތައް މެދުވެރިކޮށް ހަމަޖެއްސުމަށް ކަމާބެހޭ ފަރާތްތަކަށް ދަންނަވާފައިވާނެ ކަމަށް ރައީސް ވިދާޅުވެފައިވެއެވެ.
