ކޮންމެ ގައުމެއްގައިވެސް އެގައުމެއްގެ އެންމެ މަތީ ވެރިމީހާއަކީ ޙާއްސަ އިމްތިޔާޒުތަކަކާއި އިހްތިރާމެއް ލިބިގެންވާ ބޭފުޅެކެވެ. ފާޑުކިޔާ މީހުންވެސް އެބޭފުޅުންނާމެދު އިނގިލި ދިއްކުރަންވާނީ އެބޭބޭފުޅުންގެ ޒާތީ ދިރިއުޅުއްވުމަށް ޖާގަ ދީގެންނެވެ. ރައީސް ނުވަތަ ވެރިމީހާގެ ހައިސިއްޔަތާއި އަމިއްލަ ހައިސިއްޔަތު އޮޅުވާލައިގެންނުވާނެއެވެ.
ރާއްޖެއިންވެސް މިހާރު ފެންނަނީ މިމަންޒަރެވެ. ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވި ފަހުން ސީދާ އެމަނިކުފާނުގެ ޒާތީ ކަންކަމާއި އާއިލާއަށް ކުޑައިމީސްކުރަމުން ގެންދެއެވެ. އެއީ ގޯހެކެވެ. އެއީ އެމްޑީޕީން މައުމޫނުގެ ވެރިކަމާ ދެކޮޅަށް ފެށި ކެމްޕޭނުގެ ވައްތަރެކެވެ. މީހާއަށް ޒާތީ ގޮތުން ދިމާކޮށް ހަޖޫކިޔުމެވެ.
ޑރ. މުޢިއްޒަކީ ހުލްގު ހެޔޮ ރައީސެކެވެ. އެހެން މީހުންނަށް ކުޑައިމީސްކޮށް ނުހައްދަވައެވެ. އަނެކުންގެ ޒާތީ ކަންކަމާ ބެހިވަޑައެއް ނުގަންނަވައެވެ. އަބަދުވެސް ފެންނަނީ މަޑުކައިތި މިޒާޖެވެ.
ގައުމެއްގެ ރައީސަކަށް ދޭން ޖެހޭ އިހްތިރާމް ކުޑަވާ ގޮތަށް އަމަލުކުރުމާއި ބަސްބުނުން ފަދަ ކަންތައްތަކުން ދައްކުވައިދެނީ އެގައުމެއް އިޖުތިމާއީ ގޮތުން ވެއްޓިފައިވާ ދަށް ފެންވަރެވެ. ރައީސެއްގެ ޒާތީ ކަންކަމާ ބެހުމަކީ މޮޅުކަމެއް ނޫނެވެ. ގަޓުކަމެއް ނޫނެވެ. އެއީ ބައްޔެކެވެ. އިޖުތިމާއީ އެބަލި ރަނގަޅު ކުރުމަށްޓަކައި ރާއްޖޭގައި ގިނަ މަސައްކަތްތަކެއް ކުރަން ޖެހިފައިވާކަން ފާހަގަ ކުރެވެއެވެ.
”ރައީސުލްޖުމްހޫރިއްޔާގެ ޒާތީ ކަންކަމާއި އަމިއްލަފުޅު ދިރިއުޅުއްވުމުގެ ތެރެއަށް އާންމު ރައްޔިތުން ވަދެ ހެދުމަކީ އަހުލާގީ ގޮތުން ދަށް ކަމެއް. އެއީ ރައީސް ނޫނަސް އެއްވެސް މީހެއްގެ ޒާތީ ކަންކަމާ އަނެކާ ބެހި ހެދުން ގޯސް. އެކަމަކު ރާއްޖޭގައި ބައެއް ފަހަރު ފެންނަތީ ދިމާ އިކޮޅު މަންޒަރު. އެންމެން ގުޅިގެން އެކަން ރަނގަޅުކުރަން ޖެހޭ،“ އުމުރުން ދުވަސްވީ މީހަކާ ސުވާލު ކުރުމުން އޭނާ ކިޔައިދިނެވެ.
ރައީސުލްޖުމްހޫރިއްޔާއަކަށް މީހަކު އިންތިހާބުވުމަކީ އެމީހަކު ޒާތީ ގޮތުން ރޮލާ ކާލަން ޖެހޭ ސަބަބެއް ނޫނެވެ. އޭގެ ބަދަލުގައި އެމަނިކުފާނުގެ ޒާތީ ދިރިއުޅުއްވުމަށް ޖާގަ ދިނުމަކީ ތަހުޒީބު މުޖުތަމައުގައި ކަންހިނގާގޮތެވެ. ރާއްޖޭގައި މިއާދަ އަދި އަށަގެންފައި ނެތުމުން ރައީސުލްޖުމްހޫރިއްޔާގެ ވަރަށް ޒާތީ ކަންކަމާ އާންމުން އެބަ ބެހެއެވެ. އަމިއްލަފުޅު ދިރިއުޅުއްވުމުގެ ކަންކަމާ ހަޖޫޖަހައެވެ. އެއީ ގޯހެކެވެ. އެކަން އެކުރަނީ ބަޔަކު ރުއްސަން ކަމުގައިވާނަމަ އެއީ އިޖުތިމާއީ ބަލިމަޑުކަމެކެވެ. ރާއްޖޭގައި މި ބަލި މަޑުކަން އޮތީ މޫލާފައެވެ.
ރައީސް ޑރ. މުޢިއްޒުއަކީ ވަރަށް ސާދާ ދިރިއުޅުއްވުމެއްގެ ވެރި ބޭފުޅެކެވެ. އާއިލީ ބޭފުޅެކެވެ. ބުރަކޮށް އުޅުއްވަމުންވެސް އާއިލާއަށް ވަގުތު ދެއްވައެވެ. އެހެންކަމުން އެއީ ނަމޫނާ ވެރިއެކެވެ. ނަމޫނާ ފިރިއެކެވެ. ނަމޫނާ ބައްޕައެކެވެ.
ނިންމާލަމުންވެސް ބުނެލަން އޮތީ އެންމެ ވާހަކައެކެވެ؛ ރައީސުލްޖުމްހޫރިއްޔާގެ ވެސް ޒާތީ ކަންކަމާއި އަމިއްލަފުޅު ދިރިއުޅުއްވުން އޮންނާނެއެވެ. އިހްތިރާމް ކުރަން ދަސްކުރާށެވެ.
