އޭނާ އެހެން ވިދާޅުވީ، ރައީސް މުއިއްޒު ބ. އަތޮޅުގެ 13 ރަށަކަށް މިއަދު ހެނދުނު ފެއްޓެވި ދަތުރުފުޅުގައި އޭދަފުއްޓަށް ވަޑައިގެން ބޭއްވެވި ޖަލްސާގަ އެވެ.
ސަލީމް ވިދާޅުވީ ރާއްޖޭގެ ހުރިހާ ދާއިރާއެއް ވެސް އޮތީ ވަރަށް ނާޒުކު ހާލަތުގައި ކަމަށާއި ހާއްސަކޮށް ރާއްޖޭގެ ދަރަނީގެ ހާލަތުގެ ވާހަކަތައް ރައްޔިތުންނަށް ދޭތެރެދޭތެރެއިން ހަނދާން ކޮށްދޭން ޖެހޭ ކަމަށެވެ.
”އެއީ އަޅުގަނޑުމެންނާ ހަވާލުވިއިރު، ރާއްޖޭގެ ދަރަނި އޮތީ ނުބައްދަލު ހިސާބަށް ގޮސް. ގައުމު އޮތީ ހަވާލުވިއިރު ވެސް ކުންފުނިތައް އޮތީ އެތައް ބިލިއަނަކުން ދަރާފައި. ދިވެހި ދައުލަތް އޮތީ އެތައް ބިލިއަނަކުން ދަރާފައި. މި ހާލަތުގައި އޮތް ގައުމެއްގައި އަޅުގަނޑުމެން މިހާރު މި އުޅެނީ،“ ރައްޔިތުންގެ މަޖިލިހުގައި ވެސް އިގުތިސާދާ ބެހޭ ކޮމިޓީތަކުގައި އިސްވެ ހަރަކާތްތެރިވެވަޑައިގަންނަވާ ސަލީމް ވިދާޅުވި އެވެ.
”އަޅުގަނޑުމެންގެ އެންމެ މާތް މަގުސަދަކަށް ވާނީ ގައުމު ސަލާމަތް ކުރުން. އަޅުގަނޑުމެން މި އަށް ވުރެ ލަސްވިނަމަ [ވެރިކަމާ ހަވާލުވާން] މި ގައުމު ހަލާކުވީސް. ގައުމުގެ އިގްތިސާދީ ހާލަތެއް ނޫން، އިޖްތިމާއީ ހާލަތެއް ނޫން، ހުރިހާ ހާލަތެއް ވެސް އޮތީ އެ ހާލަތުގައި.“
އޭގެ މިސާލެއްގެ ގޮތުން ސަލީމް ދެއްކެވީ އަންނަ އަހަރު އެއް ބިލިއަން ރުފިޔާގެ ދަރަނި ދައްކަން ޖެހިފައި ވުމެވެ. އެއީ މިހާރުގެ ޑޮލަރު ރޭޓުން ބަލާ ނަމަ 20 ބިލިއަން ރުފިޔާ ކަމަށް އޭނާ ވިދާޅުވި އެވެ.
މަޝްރޫއުތައް ކުރިއަށް ދާން ޖެހޭ އެންމެ ބާރު ސްޕީޑުގައި ކުރިއަށް ނުދާކަން ގަބޫލު ކުރައްވާ ކަމަށާއި އެކަމަށް ހުރަސް ތަކެއް ހުރި ކަމަށް ސަލީމް ވިދާޅުވި އެވެ. ނަމަވެސް ރައީސް މުއިއްޒު ގެންދަވަނީ އެއްވެސް ޖެހިލުމެއް ނެތި ހުރިހާ މަސައްކަތެއް ކުރައްވަމުން ކަމަށް ސަލީމް ވިދާޅުވި އެވެ.
މިރޭގެ ޖަލްސާގައި ރައީސް ވިދާޅުވީ މި ސަރުކާރުން ހަވާލުވިއިރު އިގްތިސޯދު އޮތީ ވަރަށް ނާޒުކު ހާލަތުގައި ކަމަށެވެ. އޭރު ރައްޔިތުންގެ މަޖިލީހުގައި ތިއްބެވި އިދިކޮޅު މެމްބަރުން ބަޖެޓު ފާސްކޮށްދިނީ ވެސް މި ސަރުކާރުން ބޭނުންވި ކަންކަން ނުހިމަނައި ކަމަށް އެ މަނިކުފާނު ވިދާޅުވި އެވެ.
