ޗައިނާގެ ވެރިރަށް ބެއިޖިންގައި ބޭއްވުމަށް ހަމަޖެހިފައިވާ އަސްކަރީ ޕެރޭޑުގައި ބައިވެރިވެވަޑައިގަތުމަށް އުތުރު ކޮރެއާގެ ލީޑަރު ކިމް ޖޮން އުން ހަތިޔާރު އެޅި ރޭލެއްގައި ބޯޑަރު ހުރަސްކޮށް ޗައިނާއަށް ވަދެވަޑައިގެންފި އެވެ.
މާދަމާ ބާއްވާ ’ވިކްޓްރީ ޑޭ’ގެ ޕެރޭޑުގައި ކިމް ޗައިނާގެ ރައީސް ޝީ ޖިންޕިން އާއި ރަޝިއާގެ ވްލަޑިމިއާ ޕޫޓިންގެ އިތުރުން ދުނިޔޭގެ އެހެން ލީޑަރުންނާ ބައްދަލުކުރައްވާނެ އެވެ.
ކިމް މިއަދު ޗައިނާއަށް ވަދެވަޑައިގަތީ އޭނާގެ ހަތިޔާރު އެޅި ރޭލުގަ އެވެ. އެ ރޭލުގައި ފްރާންސްގެ މަޝްހޫރު ރަލާއި ތާޒާ އިހި ފަދަ ކެއުންތައް ލިބޭ ރެސްޓޯރެންޓެއް ހުރި ކަމަށް ރިޕޯޓްތައް ބުނެ އެވެ.
ރޭލުގައި ހަރުކޮށްފައި ހުރި ބަރު ހަތިޔާރުގެ ސަބަބުން އެ ރޭލަށް ދަތުރުކުރެވޭނީ މަޑު ސްޕީޑެއްގަ އެވެ. އޭނާގެ ދަތުރަށް 24 ގަޑިއިރު ނަގާނެ ކަމަށް ބެލެވޭ ކަމަށް ދެކުނު ކޮރެއާގެ ޔޮންހަޕް އެޖެންސީން ބުނެ އެވެ.
މިއީ 1959 ވަނަ އަހަރުގެ ފަހުން އުތުރު ކޮރެއާގެ ލީޑަރަކު ޗައިނާގައި ބާއްވާ އަސްކަރީ ޕެރޭޑެއްގައި ބައިވެރިވެވަޑައިގަންނަވާ ފުރަތަމަ ފަހަރެވެ. ކިމް އެ ބައްދަލުވުމުގައި ބައިވެރިވެވަޑައިގަންނަވާނީ 26 ގައުމެއްގެ ލީޑަރުންނާ އެކުގަ އެވެ.
ކިމް އެ ބައްދަލުވުމުގައި ބައިވެރިވުމަކީ 2015 ވަނަ އަހަރު ޗައިނާއިން ބޭއްވި ނަސްރުގެ ދުވަހުގެ ޕެރޭޑާ އަޅާބަލާއިރު ކުރިއެރުމެކެވެ.
އެކަހެރިކޮށް އުޅުއްވާ ލީޑަރު ގައުމުން ބޭރަށް ވަޑައިގަންނަވަނީ ވަރަށް މަދުންނެވެ. ބޭރުގެ ލީޑަރުންނާ އެކު އޭނާގެ އޮންނަނީ ވަރަށް ހަނި ގުޅުމެކެވެ. ނަމަވެސް ރަޝިޔާއިން ޔޫކްރެއިނަށް އަރައިގަތް ފަހުން ދެ ފަހަރެއްގެ މަތިން އޭނާ ވަނީ ޕޫޓިންއާ ބައްދަލު ކުރައްވައިފަ އެވެ.
އެންމެ ފަހުން 2019 ވަނަ އަހަރު ކިމް ބެއިޖިންއަށް ވަޑައިގެންނެވީ ދެ ގައުމުގެ ސިޔާސީ ގުޅުމަށް 70 އަހަރު ފުރުމުގެ މުނާސަބަތުގައި ބޭއްވި ހަރަކާތެއްގައި ބައިވެރިވެވަޑައިގަތުމަށެވެ. އެ ދަތުރު ކުރެއްވީ ވެސް ރޭލުގަ އެވެ.
ރޭލުގައި ދަތުރުކުރެއްވުމުގެ އާދަ ފުރަތަމަ ފެއްޓެވީ ކިމްގެ ކާފަ، ކިމް އިލް ސަންގްގެ ވެރިކަމުގަ އެވެ. ވިއެޓްނާމާއި އިރުމަތީ ޔޫރަޕަށް ދަތުރުކުރެއްވީ އަމިއްލަ ރޭލު ދަތުރުތައް ބޭނުންކޮށްގެންނެވެ.
ކިމްގެ ބައްޕާފުޅު ކިމް ޖޮންގް އިލް ރޭލުގައި ދަތުރުކުރެއްވީ އުދުހުމަށް ބިރުގަންނަތީ ކަމަށް ރިޕޯޓްތައް ބުނެ އެވެ.
ދެކުނު ކޮރެއާގެ ނޫހަކުން ބުނި ގޮތުގައި، އާމާޑް ރޭލުގައި ގާތްގަނޑަކަށް 90 ކެރެޖް ހުންނައިރު އޭގެ ތެރޭގައި ކޮންފަރެންސް ރޫމްތަކާއި އޯޑިއަންސް ޗެމްބަރުތަކާއި ބެޑްރޫމްތައް ހިމެނެ އެވެ.
