2023 ވަނަ އަހަރު ގދ. އަތޮޅު ކައުންސިލްގެ މެންބަރުން ތަޖުރިބާ ހޯދުމުގެ ނަމުގައި ތައިލެންޑަށް ކުރި 10 ދުވަހުގެ ދަތުރަކީ ދައުލަތުގެ ހަރަދުތަކާބެހޭ މާލީ ގަވާއިދުތަކާ އެއްގޮތްނުވާ ދަތުރެއް ކަމަށް އޮޑިޓާ ޖެނެރަލްގެ އޮފީހުން ބުނެފިއެވެ.
އޮޑިޓް ރިޕޯޓްގައި ފާހަގަކޮށްފައިވާ ގޮތުގައި މި ދަތުރަށް ޖުމްލަ 559,168ރ. ހޭދަކޮށްފައި ވެއެވެ. މި ހަރަދަކީ ދައުލަތަށް ބުރަބޮޑުވެފައިވާ ހަރަދެއް ކަަމަށްވެސް ރިޕޯޓްކޮށްފައި ވެއެވެ.
އޮޑިޓާ ޖެނެރަލްގެ އޮފީހުން ނެރެފައިވާ އެ އޮޑިޓް ރިޕޯޓްގައި ބުނެފައިވަނީ، މި ހަރަދަކީ ފިނޭންސް މިނިސްޓްރީން ދައުލަތުގެ ހަރަދުތައް ކޮންޓްރޯލްކޮށް، އެސިޝަންސީ އިތުރުކުރުމަށް މާލީ ވުޒާރާއިން ދައުލަތުގެ އެންމެހާ އިދާރާތަކަށް މާލިއްޔަތާ ބެހޭ ސާކިއުލާ އިން އަންގާފައިވާ އެންގުމާ އެއްގޮތަށް ކޮށްފައިވާ ހަރަދެއް ކަމަށް ނުބެލެވޭނެ ކަމަށެވެ. އެ ސާކިއުލާގެ 4 ވަނަ ނަމްބަރުގައި ވަނީ ރާއްޖެއިން ބޭރުން ހުރިހާ ހަރަދެއް ލިބޭ ކުރު މުއްދަތުގެ ކޯސްތަކާއި ޓްރެއިނިންތައް ފިޔަވައި އިތުރު އެއްވެސް ޓްރެއިނިން ޕްރޮގްރާމެއް ކުރިއަށް ނުގެންދިއުމަށް އަންގާފައެވެ. އަދި މި ދަތުރުކޮށްފައިވަނީ ދަތުރަށް ހަރަދުވާ ފައިސާ ލިބޭނެ ގޮތެއް ނުހޯދައި ކަމަށްވެސް ރިޕޯޓްގައި ފާހަގަކޮށްފައިވެއެވެ.
އަދި އެ ކައުންސިލުން ތައިލެންޑަށް ކުރި މި ދަތުރުގައި ނުވަ ކައުންސިލް މެމްބަރުންނާއި ސެކްރެޓަރީ ޖެނެރަލް ހިމެނޭހެން ޖުމްލަ 10 މެމްބަރުން ބައިވެރިވެފައިވެއެވެ. މިއީ 10 ދުވަހުގެ ދަތުރެކެވެ.
ކައުންސިލުން ބުނެފައިވާ ގޮތުގައި، މި ދަތުރުގައި އެބޭފުޅުން ވަނީ ތައިލެންޑްގައި ހުންނަ ރާއްޖޭގެ އެމްބަސީއާ ބައްދަލުކޮށް މަޝްވަރާކޮށްފައެވެ. އަދި ގދ. އަތޮޅުގެ ލޯކަލް ޓޫރިޒަމް ކުރިއެރުވުމަށްޓަކައި ތައިލެންޑްގެ ފުކެޓްގެ ޓޫރިޒަމް ޕްރޮމޯޝަނާއެކު މަޝްވަރާކުރުމުގެ އިތުރުން، ޕަތާޔާގެ ލޯކަލް ޓޫރިޒަމް ކަލްޗާ ކުރިއެރުވުމަށް އެފަރާތްތަކުގެ ކަލްޗާ އާއި ހޮސްޕިޓާލިޓީ ބޭނުންކުރާގޮތާ މެދު މަޝްވަރާކުރެވިފައިވާ ކަމަށްވެސް ކައުންސިލުން ބަޔާންކޮށްފައިވެއެވެ.
ނަމަވެސް، އޮޑިޓާ ޖެނެރަލްގެ ރިޕޯޓްގައި ފާހަގަކޮށްފައިވަނީ، ރާއްޖޭގެ ފަތުރުވެރިކަން ޕްރޮމޯޓްކުރުމަށްޓަކައި އެމްއެމްޕީއާރުސީ (މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން) އޮންނައިރު، ކައުންސިލުން މިބާވަތުގެ ކަންކަން ކުރުމުގެ ބަދަލުގައި އެ ކުންފުނިން މިކަންކަން ކުރުމުން ހަގީގީ މަގްސަދު ފުރިހަމަވުމަށް މަގުފަހިވެގެންދާނެ ކަމަށެވެ. އެގޮތުން، މިކަމާބެހޭގޮތުން ކައުންސިލުން އެމްއެމްޕީއާރުސީއާ މަޝްވަރާކޮށްފައިނުވާކަންވެސް ރިޕޯޓުގައި ފާހަގަކޮށްފައިވެއެވެ.
