ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން، ސިންގަޕޫރުގެ މެރީނާ ބޭ ސޭންޑްސްގައި އޮކްޓޯބަރު 15 އިން 17 އަށް ކުރިއަށްދިޔަ އޭޝިއާގެ އެންމެ ބޮޑު ޓްރެވަލް ޓްރޭޑް އެގްޒިބިޝަން، އައިޓީބީ އޭޝިއާ 2025 ގައި ބައިވެރިވެ، ދުނިޔޭގެ ފަތުރުވެރިންނަށް ރާއްޖޭގެ ހިތްގައިމު މަންޒަރުތައް ދައްކާލައިފިއެވެ.
މި ބޮޑު ފެއަރގައި، ވީއެމްސީގެ ބެނަރގެ ދަށުން 20 ކުންފުންޏަކުން 32 މަންދޫބުން ބައިވެރިވެ، ރާއްޖޭގައި ފަތުރުވެރިންނަށް ލިބިގެންވާ ތަފާތު އުފެއްދުންތަކާއި ފުރުސަތުތައް ވަރަށް ފުރިހަމައަށް ހުށަހަޅާފައިވެއެވެ. ރާއްޖޭގެ ގުދުރަތީ ރީތިކަމާއި ފަތުރުވެރިކަމުގެ ތަފާތުކަން ދައްކުވައިދޭ ގޮތަށް ހާއްސަކޮށް ފަރުމާކުރެވިފައިވާ 99 އަކަފޫޓުގެ ސްޓޭންޑެއް މި ފެއަރގައި ގާއިމްކުރެވުނު ކަމަށް ވީއެމްސީން ހާމަކުރެއެވެ.
ފެއަރގެ ތެރެއިން، ރާއްޖޭގައި ފަތުރުވެރިންނަށް ހުރި ފުރުސަތުތައް އިޝްތިހާރުކުރުމުގެ އިތުރުން، ދެމެހެއްޓެނިވި ފަތުރުވެރިކަމެއް ތަރައްގީކުރުމަށް ކުރަމުންދާ މަސައްކަތްތައް ވެސް ވަނީ ދައްކާލާފައެވެ. ރާއްޖޭގެ ސްޓޭންޑަށް ރާއްޖެއިން ސިންގަޕޫރަށް ކަނޑައަޅުއްވާފައި ހުންނަވާ ހައި ކޮމިޝަނަރު މުހައްމަދު ލުވެއިޒް ޒިޔާރަތްކުރައްވައި، ރާއްޖެ އިޝްތިހާރުކުރުމަށް ކުރެވެމުންދާ މަސައްކަތްތައް ބައްލަވާލެއްވިއެވެ.
އޭޝިއާ އަދި ޕެސިފިކް މާކެޓަކީ ރާއްޖޭގެ ފަތުރުވެރިކަމުގެ ސިނާއަތަށް ވަރަށް މުހިންމު މާކެޓެކެވެ. މިއަހަރުގެ ޖޫން މަހުގެ ނިޔަލަށް ރާއްޖެއަށް ޒިޔާރަތްކުރި 477,623 ފަތުރުވެރިންގެ ތެރެއިން 39.1 އިންސައްތަ ހިއްސާވަނީ މި މާކެޓުންނެވެ.
ވީއެމްސީން ވިދާޅުވި ގޮތުގައި، އައިޓީބީ އޭޝިއާ 2025 ގައި ބައިވެރިވުމަކީ، އޭޝިއާ ޕެސިފިކް މާކެޓް ފުޅާކޮށް، ހުރިހާ ކެޓަގަރީއަކުން ވެސް ފަތުރުވެރިން ރާއްޖެއަށް ޒިޔާރަތްކުރާ މިންވަރު އިތުރުކުރުމަށް ކުރަމުންދާ މަސައްކަތްތަކަށް ލިބޭނެ ވަރަށް ބޮޑު ކުރިއެރުމެކެވެ.
