ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބާއްވަން ތައްޔާރުވެފައިވާ އެޓޯލް ޗެމްޕިއަންޝިޕަށް ފީފާއިން 4.1 މިލިއަން ރުފިޔާގެ އެހީއެއް ދޭން ނިންމާފައިވާ ކަމަށް އެ އިދާރާއިން ބުނެފިއެވެ.
އެފްއޭއެމްއިން އަލަށް އެކުލަވާލި ރާއްޖޭގެ ފުޓުބޯޅަ ލީގުގެ އޮނިގަނޑުގެ ދަށުން ރާއްޖޭގެ ތިން ރީޖަނެއްގައި މިއަހަރު ފަށާ އެޓޯލް ޗެމްޕިއަންޝިޕްގައި ޖުމުލަ 49 ޓީމަކުން ވާދަކުރާނެއެވެ.
އެފްއޭމްއިން ތިން ރީޖަނަލް ލީގުގެ ތާރީހުތައް އިއުލާނު ކޮށްފައިވާ އިރު، އެންމެ ފުރަތަމަ ފަށާނީ ނޯތު ރީޖަންގެ ކުޅުމެވެ. އެ މުބާރާތަށް މިހާރު ވަނީ ތައްޔާރުވެފައެވެ. އޭގެފަހުން އަންނަ މަހު ފެށުމަށް ސެންޓްރަލް ރީޖަންގެ މުބާރާތްތައް ތާވަލުކޮށްފައިވާ އިރު، ސައުތު ރީޖަންވެސް ޑިސެމްބަރު މަހު ފަށާނެއެވެ.
އެއާއެކު މާލޭ ރީޖަންގެ މުބާރާތެއްވެސް ކުޅޭ އިރު، އެއީ ދެވަނަ ޑިވިޝަނެވެ. އަތޮޅު ތެރޭގައި އެޓޯލް ޗެމްޕިއަންޝިޕަކީ ތިންވަނަ ޑިވިޝަނުގެ ގޮތުގައި ފުޓުބޯޅަ ޕިރަމިޑުން ކަނޑައަޅާފައިވާ އިރު، ރީޖަނަލް ލީގަށް ދާނީ ޒޯން ބުރަށްފަހުއެވެ. ރީޖަނަލް ލީގަކީ ދެވަނަ ޑިވިޝަނެވެ.
އިއްޔެ ފީފާގެ ރައީސް ޖިއާނީ އިންފަންޓީނޯ ރާއްޖެއަށް ރަސްމީ ދަތުރުފުޅެއް ކުރައްވާފައިވާ އިރު، އެ ދަތުރުފުޅުގެ ތެރެއިން އިންފަންޓީނޯ ވަނީ ރީޖަނަލް ފުޓުބޯޅަ ފުޅާކުރުމަށް ތައުރީފް ކުރައްވައިފައެވެ.
ފީފާގެ ވެބްސައިޓްގައި ބުނެފައި ވަނީ 18 ދަނޑެއްގައި މެޗުތައް ކުޅުމަށް ރާވާފައިވާ އަތޮޅު މުބާރާތަށް އެހީގެ ގޮތުގައި 266،000 ޑޮލަރު (4.1 މިލިއަން ރުފިޔާ) ދޭން ފީފާއިން ނިންމާފައިވާ ކަމަށެވެ. އެއީ ފީފާ ފޯވަޑް ޕްރޮޖެކްޓްގެ ދަށުން ދޭން ނިންމާފައިވާ އެހީތެރިކަމެކެވެ.
ފީފާއިން ބުނީ ފީފާ ފޯވަޑް ޕްރޮޖެކްޓްގެ ދަށުން ރާއްޖޭގެ ފުޓުބޯޅަ ލާމަރުކަޒު ކުރުމަށް އެހީތެރިކަން ދެމުންދާނެ ކަމަށެވެ. އޭގެ އިތުރުން ފީފާއިން މުޅި ރާއްޖޭގައި ގައުމީ ފެންވަރުގެ އަންހެން ފުޓުބޯޅަ ލީގެއް ފަށަން އެހީތެރިވެދޭން ނިންމާފައިވާ ކަމަށްވެސް ބުނެފައިވެއެވެ،
އިންފަންޓީނޯއަކީ މިދިޔަ 19 އަހަރު ތެރޭގައި ރާއްޖެއަށް ވަޑައިގެންނެވި ފުރަތަމަ ފީފާ ރައީސެވެ. މީގެ ކުރިން 2006 ވަނަ އަހަރު ސެޕް ބްލެޓާ ރާއްޖެ ވަޑައިގެންފައިވާ އިރު، އެފަހަރު ކުރެއްވި ދަތުރުފުޅަކީ ސުނާމީ ކާރިސާގައި ގެއްލުން ލިބުނު ގައުމުތަކަށް ކުރެއްވި ދަތުރުފުޅެކެވެ.
އިންފަންޓީނޯ ވަނީ ރާއްޖޭގެ ރައީސް ޑރ. މުހައްމަދު މުއިއްޒާ ބައްދަލުކުރައްވައި، ރައީސާއެކު ފުޓްބޯލް ފެސްޓިވަލެއްގައިވެސް ބައިވެރިވެ ވަޑައިގެންފައެވެ.
