ރައްޔިތުންނަށް ވެވަޑައިގެންނެވި ވައުދުތައް ރަނުން ރަނަށް ފުއްދަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ޅ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ނައިފަރުގެ ރައްޔިތުންނާ މިރޭ ބައްދަލުކުރައްވާ ވާހަކަފުޅުދައްކަވަމުން ރައީސް ވިދާޅުވީ ރާއްޖޭގެ އެކި ކަންކޮޅުތަކަށް ވެފައިވާ ވައުދުތަކަކީ ދެ އަހަރަށް ބަހާލައިގެން ކުރިއަށްގެންދަން ނިންމާފައިވާ ކަންތައްތަކެއް ކަމަށާއި އެގޮތުން ނައިފަރަށް ވެފައިވާ ގިނަ ވައުދުތައް މިއަހަރު ފެށިގެންދާނެ ކަމަށެވެ.
އަދި ބާކީ ހުރީ ނައިފަރުގެ ބިން ހިއްކައި، ބިން އިތުރުވުމުން ކުރިއަށްދާނެ ކަންކަން ކަމަށާއި ކުރިއަށް އޮތީ މިފަދަ އެތައް ކަމަކަށް މަގުފަހިވެގެންދާނެ ދުވަސްތަކެއް ކަމަށް ރައީސް ވިދާޅުވި އެވެ. އެގޮތުން ނައިފަރުގައި ހިއްކުމަށް ހަމަޖެހިފައިވާ 45 ހެކްޓަރުގެ ބިން ވެގެންދާނީ ނައިފަރުގެ ތަރައްގީގެ އާ ސޮފްހާއެއް އެއްލިގެންދާނެ މަޝްރޫއަކަށް ކަމަށާއި އޭގެ ސަބަބުން އިތުރުވާ ޖާގައަކީ ބޯހިޔާވަހިކަމާއި އިގްތިސާދީ އެކި މަސައްކަތްތައް ކުރުމުގެ އިތުރުން ނައިފަރުގެ ތަރައްގީ ރައްޔިތުންނަށް ފެނިގެންދާނެ ވަސީލަތަކަށް ކަމަށްވެސް ވިދާޅުވި އެވެ.
ރައީސް ވިދާޅުވީ ނައިފަރުގައި ފެށިގެންދާ ހުރިހާ މަޝްރޫއެއްގެ ތެރެއިން ވެސް އެންމެ އިސްކަމެއް ދޭނީ ބިން ހިއްކުމުގެ މަސައްކަތަށް ކަމަށާއި އޭގެ އިތުރުން ހައުސިން މަޝްރޫއު އާއި ހޮސްޕިޓަލް އަދި ސްކޫލް އަދި ބަނދަރުގެ މަޝްރޫއު ފަދަ މަސައްކަތްތައް ކުރިއަށްގެންދާނެ ކަމަށެވެ.
”ހަމަ ރަނުން ރަނަށް އަޅުގަނޑު ވީ ހުރިހާ ވައުދެއް ފުއްދާނަމޭ. ނައިފަރުގެ ތަރައްގީ ހަގީގަތަކަށް ހެދުމަކީ އަޅުގަނޑުމެންނަށް ލިބިގެންދާ އުފަލެއް، އަޅުގަނޑުގެ ޒިންމާއެއް، މަސްއޫލިއްޔަތެއް. އެކަން އަޅުގަނޑު ކޮށްދޭނަން،“ ރައީސް ވިދާޅުވި އެވެ.
