ބަނގުރާ ގެންގުޅެ، ބޭނުންކޮށް އެތަކެތީގެ ވިޔަފާރި ކުރާކަމަށް ތުހުމަތުކުރެވޭ މައްސަލައެއްގައި އަންހެން ފުލުހަކު ވަޒީފާއިން ވަކިކުރަން ލަފާދީފިއެވެ.
އެ މައްސަލައިގައި ފުލުހުން ބުނި ގޮތުގައި، މިހާރު މަގާމުން ސަސްޕެންޑްކޮށްފައިވާ އަދި އެ މަގާމުން ވަކިކުރުމަށް ލަފާދީފައިވަނީ ކޮންސްޓަބަލް އަންހެން ފުލުހެކެވެ. އޭނާ އެ މަގާމުން ވަކިކުރުމަށް ލަފާދީފައިވަނީ އޭނާގެ މައްސަލަ ޕްރޮފެޝަނަލް ސްޓޭންޑަޑް ކޮމާންޑުން ބެލުމަށްފަހު ޑިސިޕްލިނަރީ ބޯޑަށް ހުށަހެޅުމުން އެ ބޯޑުންނެވެ.
އެ މައްސަލައަކީ ބަނގުރާ ގެންގުޅެ، ބޭނުންކޮށް އެތަކެތީގެ ވިޔަފާރި ކުރާކަމަށް ފުލުހުންނަށް ލިބުނު މައުލޫމާތަކާއި ގުޅިގެން މިދިޔަ މަހުގެ 17 ވަނަ ދުވަހު ހިންގި އޮޕަރޭޝަނެއްގެ ތެރެއިން ހައްޔަރުކުރި ފުލުހަކާއި ދެކޮޅަށް ބަލަމުންދާ މައްސަލައެއް ކަމަށް ފުލުހުން ބުންޏެވެ.
ފުލުހުން ބުނި ގޮތުގައި އެ މައްސަލައިގައި ހައްޔަރުކޮށްފައިވަނީ ވަނީ 23 އަހަރުގެ ތިން ފިރިހެނަކާއި 27 އަހަރުގެ ފިރިހެނަކާއި 23 އަހަރުގެ އަންހެނަކާއި 26 އަހަރުގެ އަންހެނަކާއި 20 އަހަރުގެ އަންހެނެކެވެ. މި އެންމެންނަކީ ވެސް ދިވެހީން ކަމަށް ފުލުހުން ބުންޏެވެ.
އެ މީހުން ހައްޔަރުކުރީ ފުލުހުން ކުރިޔަށް ގެންދިޔަ އޮޕަރޭޝަނުގެ ތެރެއިން ބަނގުރާކަމަށް ބެލެވޭ އެއްޗެއް ހުރި 500 މިލިލީޓަރުގެ ދެ ފުޅިއާއި ތައްޓެއް ފެނުނު މައްސަލައިގާ ކަމަށް ވެސް ފުލުހުން ބުންޏެވެ.
އެހެން ނަމަވެސް އެމީހުންގެ ކުޑަކަމުދާތަކެތި ތަހުލީލުކުރިއިރު މަސްތުވާތަކެއްޗަށް ނެގަޓިވް ވުމުން، ކޯޓަށް ހާޟިރުނުކޮށް ދޫކޮށްލައިފައިވާ ކަމަށް ވެސް ފުލުހުން ބުނެފައިވެއެވެ.
