އަންނަ ހުކުރު ދުވަހުގެ ރޭ ޕީއެންސީން މާލޭގައި ބާއްވާ ޖަލްސާ އަކީ ވަރަށް ގިނަ އަދަދެއްހގެ ބަޔަކު ބައިވެރިވާނެ ޖަލްސާއެއް ކަމަށް އެ ޕާޓީގެ ޕީޖީ ގްރޫޕްގެ ލީޑަރު އިބްރާހީމް ފަލާހު ވިދާޅުވެއްޖެ އެވެ.
ރައީސް ޑރ. މުހައްމަދު މުއިއްޒު ވެސް ބައިވެރިވެވަޑައިގަންނަވާ ގޮތަށް އާޓިފިޝަލް ބީޗްގައި ބާއްވަން ނިންމާފައިވާ ޖަލްސާތަކުގެ ތައްޔާރީތައް މިހާރު ވަމުން އަންނަ އިރު، ޖަލްސާ އަށް ތައްޔާރވާން މާލެ ސަރަހައްދުގައި ކުރިއަށް ގެންދާ ހާއްސަ ހަރަކާތްތައް ފެށުމަށް ޕީއެންސީގެ ހަރުގޭގައި މިއަދު ހެނދުނު ބޭއްވި އިވެންޓަކަށް ފަހު ފަލާނު ނޫސްވެރިންނަށް ވިދާޅުވީ ހުކުރު ދުވަހުގެ ރޭ ޖަލްސާ ވާނީ ގިނަ އަދަދެއްގެ ދިވެހި ރައްޔިތުން ބައިވެރިވާނެ ޖަލްސާއަކަށް ކަމަށެވެ.
ފަލާހު ވިދާޅުވީ މި މަހުގެ 17 އަށް ރައީސް މުޢިއްޒުގެ ވެރިކަމަށް ދެ އަހަރުވާ އިރު ފާއިތުވި ދެ އަހަރެއްހާ ދުވަހުގެ ތެރޭގައި ގިނަގުނަ ހިދުމަތްތައް ކޮށްދެއްވާފައިވާ ކަމަށެވެ. އެގޮތުން މީހުން ދިރިއުޅޭ ހުރިހާ ރަށަކަށް ޒިޔާރަތްކުރައްވައި ހުރިހާ ރަށެއްގެ ރައްޔިތުންނާ ބައްދަލު ކުރައްވާފައިވާ ކަމަށެވެ.
އެހެންވެ ޕީއެންސީގެ ސަޕޯޓަރުން އެދެނީ އެއްތަނަކަށް ޖަމާވެ ރައީސަށް ޝުކުރު އަދާކުރަން ކަމަށް ފަލާހު ވިދާޅުވިއެވެ.
”އަޅުގަނޑުމެންގެ ރައީސުލްޖުމްހޫރިއްޔާ މިދިޔަ ދުވަސްތަކުގައި ވަރަށް ގިނަ މަސައްކަތްޕުޅު ކުރައްވަައިފި. މުޅި ރާއްޖޭގައި ތަރައްގީގެ އެތައް މަސައްކަތްތަކެއް ފައްޓަވައިފި މީހުން ދިރިއުޅޭ ހުރިހާ ރަށަކަށް ޒިޔާރަތްކުރައްވައި، ހުރިހާ ރަށެއްގެ ރައްޔިތުންނާ ބައްދަލުކުރައްވައިފި،“ އޭނަ ވިދާޅުވި އެވެ. ”ވަރަށް ގިނަ ކަންކަން ކުރައްވައިފި. އެހެންވީމާ އަޅުގަނޑުމެން ރައްޔިތުން އެބަ ބޭނުންވޭ އެއްތަނަކުން އެއްވެ ރައީސަށް ހާއްސަ ޝުކުރެއް ދަންނަވާލަން.“
ފަލާހު ސިފަ ކުރެއްވި ގޮތުގައި ހުކުރު ދުވަހުގެ ރޭ ބާއްވާ ޖަލްސާ އަކީ ރައްޔިތުންގެ ޝުކުރު ރައީސަށް އަދާކުރުމުގެ ޖަލްސާއެކެވެ
އެހެންވެ އެ ޖަލްސާގައި ރާއްޖޭގެ އެކި ކަންކޮޅުތަކުން ގިނަ އަދަދެއްގެ ރައްޔިތުން ބައިވެރިވާނެ ކަމަށް ވިދާޅުވިއެވެ.
އަންނަ ހުކުރު ދުވަހުގެ ރޭ ޕީއެންސީގެ ހާއްސަ ޖަލްސާއެއް ބާއްވާނެކަން އިއުލާންކުރީ މި މަހުގެ 3 ގަ އެވެ.
