މި އަހަރުގެ ސެޕްޓެމްބަރު މަހުގެ ނިޔަލަށް ރާއްޖެއިން މުދާ އެކްސްޕޯޓް ކުރި މިންވަރު އިތުރުވެއްޖެ އެވެ.
މަރުކަޒީ ބޭންކް , މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އާންމުކޮށްފައިވާ ތަފާސްހިސާބުތައް ދައްކާ ގޮތުން މި އަހަރުގެ ޖެނުއަރީ އިން ސެޕްޓެމްބަރުގެ ނިޔަލަށް ރާއްޖެއިން 323.6 މިލިއަން ޑޮލަރުގެ މުދާ އެކްސްޕޯޓްކޮށްފައިވެ އެވެ.
މިއީ މިދިޔަ އަހަރުގެ މި މުއްދަތުގައި އެކްސްޕޯޓްކުރި 284 މިލިއަން ޑޮލަރުގެ މުދަލަށްވުރެ 39.6 މިލިއަން ޑޮލަރު އިތުރު އަދަދެކެވެ. މިއީ 13.9 އިންސައްތައިގެ އިތުރުވުމެކެވެ.
އެމްއެމްއޭގެ ތަފާސްހިސާބުތަކަށް ބަލާއިރު މި އަހަރުގެ އެކްސްޕޯޓްގެ ތެރެއިން 211 މިލިއަން ޑޮލަރަކީ ރި-އެކްސްޕޯޓެވެ. އެ ގޮތުން 167.8 މިލިއަން ޑޮލަރުގެ ޖެޓް ފިއުލް ރި-އެކްސްޕޯޓްކޮށްފައިވެ އެވެ. މީގެ އިތުރުން 104.5 މިލިއަން ޑޮލަރުގެ މަހުގެ ބާވަތް އެކްސްޕޯޓްކޮށްފައިވެއެވެ.
އެމްއެމްއޭއިން ލަފާކޮށްފައިވާ ގޮުތުން، މި އަހަރު އިންފްލޭޝަން ރޭޓް ހުންނާނެ ކަމަށް ބެލެވެނީ 3.9 އިންސައްތައިގައެވެ. އަދި ރާއްޖޭގެ ރަސްމީ ރިޒާވް 705.1 މިލިއަން އެމެރިކާ ޑޮލަރުގައި ހުންނާނެ ކަމަށް އެމްއެމްއޭއިން ލަފާކޮށްފައިވެއެވެ.
