ހަނިމާދޫ އިންޓަނޭޝަނަލް އެއާޕޯޓްގެ ތަރައްގީ ކުރުމުގެ މަސައްކަތް ނިންމައި މިރޭ ހުޅުވިގެންދާއިރު، މިއީ މުޅި ރާއްޖެ އަށް ޚާއްޞަކޮށް އުތުރުގެ ތަރައްގީ ހާސިލްވުމުގެ އެއް ކާމިޔާބީ ކަމަށް ރައީސް ޑރ. މުޙައްމަދު މުޢިއްޒު އާދީއްތަ ދުވަހުގެ ރޭ ވިދާޅުވެއްޖެއެވެ.
ހަނިމާދޫ އިންޓަނޭޝަނަލް އެއާޕޯޓްގެ ތަރައްގީ ކުރުމުގެ މަސައްކަތް ނިންމައި ހުޅުވުމަށް ހަނިމާދޫގައި މިހާރު ކުރިއަށްދާ ރަސްމިއްޔާތުގައި ވާހަކަދައްކަވަމުން ރައީސް ވިދާޅުވީ، ރިޔާސީ އިންތިޚާބުގެ ކެމްޕޭނުގައި އެމަނިކުފާނު އެރަށަށް ވަޑައިގެންނެވުމުން ހަނިމާދޫގައި ތަރައްގީ ކުރުމުގެ މަސައްކަތް ފެށިފައިވާ އެއާޕޯޓާއި ގުޅޭގޮތުން ރައްޔިތުން ސުވާލުކުރިކަމަށެވެ.
އެދުވަހު ވެރިކަން ކަމަށް ވެވަޑައިގެންނެވިއްޖެނަމަ، އެއާޕޯޓްގެ މަސައްކަތް މިހާރަށްވުރެ އަވަސްކޮށް، ހަލުވިކުރާނެކަމަށް ދެންނެވިކަމަށް ރައީސް ވިދާޅުވިއެވެ. އަދި އެ މަސައްކަތް އަވަސްވާނެގޮތަށް ކަންކަން އިންތިޒާމު ކުރާނެކަމަށް ވިދާޅުވިކަމަށް ވެސް ރައީސް ވިދާޅުވިއެވެ.
ރައީސް ވިދާޅުވީ، އެމަނިކުފާނު ވިދާޅުވިގޮތަށް އެ މަސައްކަތް އަވަސްކޮށް، ހަލުވިކޮށް 30 އަކަށް ޕަސެންޓް ނިމިފައި އޮތް އެއާޕޯޓް އެއްކޮށް މިހާރު ނިންމާފައިވާ ކަމަށެވެ.
މިކަމާއެކު އެ ސަރަހައްދަށް އުމްރާނީ، އިޖުތިމާއީ އަދި އިގްތިސޯދީ ބޮޑު ކުރިއެރުމަކާއި ފައިދާތައް ލިބިގެންދާނެކަމަށް ރައީސް ވިދާޅުވިއެވެ.
ރައީސް ވަނީ ރާއްޖޭގެ ވިޔަފާރިވެރިން އެ ސަރަހައްދުގައި އިންވެސްޓްކޮށް، މި ރަނުގެ ފުރުސަތުގެ ބޭނުން ހިފުމަށް ގޮވައިލައްވާފައެވެ. އަދި ބޭރުގެ ވިޔަފާރިވެރިންނަށް ވެސް އެ ސަރަހައްދުގައި އިންވެސްޓް ކުރުމަށް ރައީސް ވަނީ ގޮވައިލައްވާފައެވެ.
