ސްރީ ލަންކާގެ ނުވަރަލިޔާއަށް ގޮސް އުޅެނިކޮށް، ހަބަރެއް ނުވެގެން ހޯދަމުންދިޔަ ދިވެހި އާއިލާ ފެނިއްޖެއެވެ.
ހަބަރެއް ނުވުމުގެ ސަބަބުން ގެއްލިގެން ހޯދަމުންދިޔަ ދިވެހި އާއިލާ ނުވަރަލިޔާއަށް ދިޔައީ ޗުއްޓީއަށެވެ. އެއީ ދިވެހި ފިރިހެނަކާއި ލަންކާއަށް ނިސްބަތްވާ އަންހެނަކާއި އެ ދެ މީހުންގެ ކުޑަ ދަރިފުޅެވެ.
އެނގިފައިވާ ގޮތުގައި އެ މީހުންނާ ނުގުޅުމުގެ ސަބަބުން ގެއްލިގެން ކަމަށްބުނެ ރިޕޯޓުކުރިއެވެ. އެ އާއިލާ ގެއްލިފައިވަނީ ކަރަންޓު ކެނޑުމުގެ ސަބަބުން މުއާސަލާތު ނުކުރެވުމުގެ ސަބަބުންކަންވެސް އެނގިފައިވެއެވެ.
މިހާރު އެ އާއިލާ ތިބީ ލަންކާ އަންހެން މީހާގެ އާއިލާގެ ބައެއްގެ ގޭގައެވެ.
ލަންކާ ކައިރީގައި އުފެދުނު ކޮޅިގަނޑު ތޫފާނަކަށް ބަދަލުވެ، އެ ގައުމުގެ ބައެއް ސަރަހައްދުތަކުން ވަނީ ކަރަންޓު ވެސް ކެނޑިފައެވެ. “ޑިޓްވާ“ ނަމުން ނަންދީފައިވާ އެ ތޫފާނުގައި މިހާތަނަށް 65 އަށްވުރެ ގިނަ މީހުން މަރުވެފައިވާ ކަމަށް ރިޕޯޓުތައް ބުނެއެވެ.
