ރައީސުލްޖުމުހޫރިއްޔާ ޑރ. މުހައްމަދު މުއިއްޒުގެ ވައުދާއި އެއްގޮތަށް ގެދޮރު އެޅުމަށް އިންޓްރެސްޓް ކުޑަކޮށް ލޯނު ދިނުމަށް ތައާރަފްކުރި ”ހިޔާވަހި ފައިނޭންސް ސްކީމް“ އިން ލޯނު ހޯދުމުގެ ކަންތައްތައް އިތުރަށް ލުއިފަސޭހަކޮށްދިނުމަށް ބޭންކް އޮފް މޯލްޑިވްސް (ބީއެމްއެލް) ގައި އެދިވަޑައިގެންފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ މާފަންނުގެ ރައްޔިތުންނާ ބައްދަލުކުރެއްވުމަށް ތާޖުއްދީން ސްކޫލްގައި ރޭ ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށް މި ސަރުކާރުން ކުރަމުން އަންނަ މަސައްކަތްތަކަށް އަލިއަޅުއްވާލައްވަމުން ރައީސް ވިދާޅުވީ ހިޔާވަހި ސްކީމްގެ ދަށުން މިއަހަރު ދޫކުރި ލޯނަށް ޝަރުތުހަމަވާން ބައެއް ފަރާތްތަކަށް އުނދަގޫ ކަންތައްތަކެއް އެބަހުންނެވި ކަމަށެވެ. އެގޮތުން ދެވަނަ ފަހަރަށް އެ ލޯނަށް ކުރިމަތިލުމަށް އެދި ހުޅުވާލާއިރު، ޝަރުތުތަކަށް ލުއިތަކެއް ދިނުމަށް ބީއެމްއެލްގައި އެދިވަޑައިގެންފައިވާ ކަމަށް ރައީސް ވިދާޅުވިއެވެ.
”އަޅުގަނޑުމެން ނިންމާފައި އޮތް ގޮތް އެއީ ހަމަ، އިތުރަށް އޭގައި ހަމަ، ވަރަށް ބޮޑަށް ހަމަ އެފޯޑެބިލިޓީ އިތުރުކުރެވިގެން ދާގޮތަށް ހަމަ އެ ލޯނު ސްކީމްވެސް ބަދަލުވާނެ ހަމަ ކުރިއަށް އޮތް އަހަރު ހުޅުވާލާއިރުގައި.“ ރައީސް ވިދާޅުވިއެވެ.
މި ލޯނުތައް ދޫކުރާނީ ދެ ކެޓަގަރީ އަކަށް ބަހާލައިގެންނެވެ. އެއީ މާލެ ސަރަހައްދާއި ރައީސް ކަނޑައަޅުއްވާ އާބަން ސެންޓަރުތަކަށް ހާއްސަ ލޯނު ސްކީމަކާއި، އެނޫން ސަރަހައްދުތަކުގައި ދިރިއުޅޭ ފަރާތްތަކަށް ދޫކުރާ ލޯނެކެވެ. މާލެ ސަރަހައްދާއި އާބަން ސެންޓަރުތަކަށް ލޯން ދޫކުރަނީ ތިން މިލިއަން ރުފިޔާއާއި ހަމައަށެވެ. އަދި މި ލޯނު އަނބުރާ ދެއްކުމުގެ މުއްދަތު 25 އަހަރަށް ދައްމާލެވޭނެއެވެ. އެނޫން ސަރަހައްދުތަކަށް އެއް މިލިއަން ރުފިޔާއާއި ހަމައަށް ލޯނު ދޫކުރާއިރު އެ ފަރާތްތަކަށްވެސް 25 އަހަރަށް ބަހާލައިގެން ލޯނު ދެއްކުމުގެ އިންތިޒާމު ހަމަޖޭހެނެއެވެ.
ބިން ލިބި ގެދޮރު އެޅުމަށް ގިނަ ފަރާތްތަކަށް ދަތިތަކާއި ކުރިމަތިވެފައިވާއިރު، މިކަމަށް ލުޔެއް ހޯއްދަވައިދެއްވުމަކީ ރައީސްގެ ރިޔާސީ ވައުދުފުޅެކެވެ.
ރައީސް ވިދާޅުވީ ލޯނު ސްކީމްތަކުގެ ތެރެއިންނާއި ފްލެޓު އަދި ގޯތި ދީގެންވެސް ބޯހިޔާވަހިކަމުގެ މައްސަލަ ހައްލުކޮށްދެއްވާނެ ކަމަށެވެ.
