ދިވެހިރާއްޖޭގެ ގައުމީ އެއާލައިން، މޯލްޑިވިއަން އިން އިންޑިއާގެ ގައުމީ އެއާލައިން، އެއާ އިންޑިއާއާ އެކު މުހިންމު އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގެ ބޭނުމަކީ ދެ ގައުމުގެ ދެމެދުގައިވާ ކަނެކްޓިވިޓީ އިތުރުކޮށް، ރާއްޖޭގެ ޓޫރިޒަމް ދާއިރާ އިތުރަށް ފުޅާކުރުމެވެ.
މިކަމުގެ ސަބަބުން ދިވެހިރާއްޖެއަށް އަންނަ ފަތުރުވެރިންނަށް ޑޮމެސްޓިކް ދަތުރުތައް ފަސޭހަވެ، ރާއްޖޭގެ އެކި ކަންކޮޅުތަކަށް ދަތުރުކުރުމުގެ ފުރުސަތު ބޮޑުވެގެންދާނެއެވެ.
މޯލްޑިވިއަނުން ހާމަކުރެއްވި ގޮތުގައި، މި އެއްބަސްވުމުގެ ސަބަބުން ދެ ގައުމުގެ ދެމެދުގައި ކުރާ ދަތުރުތަކާއި ރާއްޖޭގެ ތެރޭގައި ކުރާ ޑޮމެސްޓިކް ދަތުރުތައް ފަސޭހަވެގެންދާނެއެވެ. ޚާއްސަކޮށް، އެއާ އިންޑިއާ މެދުވެރިކޮށް އިންޑިއާގެ ނިއުދިއްލީ އާއި މުމްބާއީ ފަދަ ބޮޑެތި ޝަހަރުތަކުން ރާއްޖެއަށް އަންނަ ފަސިންޖަރުންނަށް، މާލޭގައި ގިނަ ވަގުތު މަޑުކުރަން ނުޖެހި، މޯލްޑިވިއަންގެ ޑޮމެސްޓިކް ފްލައިޓްތަކާ ގުޅުވައިގެން ސީދާ ރާއްޖޭގެ އެކި ރިސޯޓުތަކަށާއި ރަށްރަށަށް ދަތުރުކުރުމުގެ ފުރުސަތު މިހާރު ވަނީ ފަހިވެފައެވެ.
މޯލްޑިވިއަނުން މިހާރުވެސް ރާއްޖޭގެ 16 މަންޒިލަކަށް ދަތުރުކުރަމުން އަންނައިރު، މި އެގްރީމެންޓާއެކު މި ހިދުމަތްތައް ބޭނުންކުރަން ފަސޭހަވާނެ ކަމަށް މޯލްޑިވިއަނުން ފާހަގަކުރެއެވެ. މޯލްޑިވިއަންގެ މެނޭޖިންގް ޑިރެކްޓަރު އިބްރާހިމް އިޔާސް ވިދާޅުވީ، އެއާ އިންޑިއާއާ އެކު ހެދި މި އެގްރީމެންޓްގެ ސަބަބުން ރާއްޖޭގެ އަތޮޅުތަކަށް ދަތުރުކުރާ ފަސިންޖަރުންނަށް ރަނގަޅު ހިދުމަތްތައް ދިނުމަށް މޯލްޑިވިއަންއިން ކުރާ މަސައްކަތަށް އިތުރު ކުރިއެރުން ލިބޭނެ ކަމަށެވެ.
އިޔާސް އިތުރަށް ވިދާޅުވީ، ޓޫރިޒަމް ދާއިރާއަށް ވެސް މިއީ ވަރަށް ބޮޑު ކުރިއެރުމެއް ކަމަށާއި، މި އެއްބަސްވުމުގެ ސަބަބުން ރާއްޖޭގެ ޓޫރިޒަމަށް އިތުރު ފައިދާތަކެއް ލިބިގެންދާނެ ކަމަށް އޭނާ އުންމީދު ކުރައްވާ ކަމަށެވެ. އެއަރ އިންޑިއާގެ ޗީފް ކޮމާޝަލް އޮފިސަރު ނިފުން އަގަރްވާލް ވިދާޅުވީ، އެ އެއާލައިން އިން އަންނަ ފަރާތްތަކަށް ރާއްޖޭގެ ޑޮމެސްޓިކް ދަތުރުތަކާ ދިމާކޮށް ފްލައިޓްތައް ބުކް ކުރުމުގެ ފުރުސަތު މިހާރު ލިބިގެންދާނެ ކަމަށެވެ. އަދި މިކަމުގެ ސަބަބުން ރާއްޖޭގެ އެކި އެކި މަންޒިލުތައް ބަލާލުމުގެ ފުރުސަތުވެސް ފަސޭހަވާނެކަމަށް އޭނާ ފާހަގަކުރެއްވިއެވެ.
މޯލްޑިވިއަން އިން އަންނަނީ ބޭރުގެ ގިނަ އެއާލައިންތަކާ އެކު މިފަދަ ކަނެކްޓިވިޓީ އެގްރީމެންޓްތައް ހަދަމުންނެވެ. މިފަދަ އެގްރިމެންޓްތަކާއެކު، އިންޓަނޭޝަނަލް އެއާލައިންތަކުން ރާއްޖެއަށް އަންނަ ފަރާތްތަކަށް ފަސޭހަކަމާ އެކު ރާއްޖޭގެ އެކި ކަންކޮޅުތަކަށް ޑޮމެސްޓިކް ދަތުރުތައް ކުރެވޭނެއެވެ. މިއީ ރާއްޖޭގެ ޓޫރިޒަމް ދާއިރާއަށް އިތުރު ކުރިއެރުންތައް ހޯދައިދިނުމަށް ކުރާ މަސައްކަތްތަކުގެ މުހިންމު ބައެކެވެ.
