ބޮޑު ކަންނެލީގެ މަސްވެރިންނަށް ދިމާވެފައިވާ ތެލުގެ ދަތިކަމަށް ހައްލެއް ހޯއްދަވައިދެއްވުމުގެ ގޮތުން، އަގުހެޔޮކޮށް ތެޔޮ ފޯރުކޮށްދިނުމަށް ސަރުކާރުން ޤާއިމުކުރި ފުރަތަމަ އެސްޓީއޯ ފިއުލް ޝެޑް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ރ. ދުވާފަރުގައި ހުޅުއްވައިދެއްވައިފިއެވެ.
ރައީސް ދުވާފަރަށް ކުރައްވަމުން ގެންދަވާ ދަތުރުފުޅުގެ ތެރެއިން މިކަމަށްޓަކައި ބޭއްވި ޚާއްސަ ރަސްމިއްޔާތެއްގައި މި ޝެޑް ހުޅުއްވައިދެއްވުމާއެކު، މަސްވެރިންނަށް “އެސްޓީއޯ ރޭޓު” ގައި ތެޔޮ ލިބޭނެ މަގު މިވަނީ ފަހިވެފައެވެ.
ބޮޑު ކަންނެލީގެ މަސްވެރިންގެ އޮތް ކަންބޮޑުވުންތަކަށް ހައްލެއް ހޯއްދަވައިދެއްވުމުގެ ގޮތުން، އަގުހެޔޮކޮށް ތެޔޮ ލިބޭނެ މަގު ފަހިކުރުމަށް ސަރުކާރުން ވަނީ ގިނަ މަސައްކަތްތަކެއް ފަށްޓަވާފައެވެ. ރާއްޖޭގެ ކޮންމެ އަތޮޅަކުން ހެޔޮ އަގުގައި، އެސްޓީއޯ ރޭޓުގައި ތެޔޮ ލިބޭނެ އިންތިޒާމު ހަމަޖެއްސުމަށްޓަކައި ވަސީލަތްތައް ޤާއިމުކުރުމަކީ މި ސަރުކާރުގެ މުހިންމު ވަޢުދެކެވެ. މި މަސައްކަތުގެ ދަށުން ފުރަތަމަ ފިއުލް ޝެޑް ދުވާފަރުގައި ޤާއިމުކުރެވި، މިއަދުން ފެށިގެން އެ ޚިދުމަތް ދިނުމަށް ވަނީ ފަށާފައެވެ.
ސަރުކާރުގެ އަމާޒަކީ އަންނަ އަހަރުގެ މާރިޗު މަހުގެ ނިޔަލަށް ރާއްޖޭގެ ކޮންމެ އަތޮޅެއްގައި، މަދުވެގެން އެއް ރަށުގައި އެސްޓީއޯ ރޭޓުގައި ތެޔޮ ލިބޭނެ އިންތިޒާމު ހަމަޖެއްސުމެވެ. މީގެ ސަބަބުން މަސްވެރިންނަށް އެމީހުންގެ މަސައްކަތަށް ބޭނުންވާ ތެޔޮ، ފަސޭހަކަމާއި އަގުހެޔޮކަމާއެކު ލިބޭނެ މަގު ފަހިވެގެންދާނެއެވެ. މިކަމުގެ ސަބަބުން މަސްވެރިކަމުގެ ހަރަދު ކުޑަވެ، މަސްވެރިންގެ އާމްދަނީ އިތުރުވާނެ ކަމަށް ސަރުކާރުން ވިދާޅުވެއެވެ.
މަސްވެރިކަމުގެ ސިނާޢަތަކީ މި ސަރުކާރުން އެންމެ އިސްކަންދެއްވާ އެއް ދާއިރާއެވެ. މި ދާއިރާއިން ރައްޔިތުންނަށް ވެވަޑައިގެންފައިވާ ގިނަ ވަޢުދުތަކެއް ސަރުކާރުން ގެންދަވަނީ ފުއްދަވައިދެއްވަމުންނެވެ. އެގޮތުން، މިދިޔަ އަހަރުގެ ޑިސެންބަރު މަހުން ފެށިގެން މަސްވެރިންނަށް ނުދައްކާ ހުރި ފައިސާ ދައްކާ ޚަލާސްކޮށް، މިހާރު 48 ގަޑިއިރު ތެރޭގައި މަސްވެރިންނަށް ފައިސާ ދޫކުރުމުގެ އިންތިޒާމު ވަނީ ހަމަޖައްސާފައެވެ.
މަސްވެރިކަމުގެ ސިނާޢަތް ކުރިއެރުވުމަށްޓަކައި، ކުރިއަށް އޮތްތަނުގައި މަސްވެރިން ބޭނުންވާ ހުރިހާ ވަސީލަތްތަކެއް ޤާއިމުކުރެވިގެންދާނެ ކަމަށް ސަރުކާރުން ވިދާޅުވެއެވެ. މިކަމުގެ ތެރެއިން، މަސް ގަންނަ މަރުކަޒުތަކާއި، މަސް ރައްކާކުރާނެ ކާރުޚާނާތައް އިތުރުކުރުމުގެ މަސައްކަތްތައް ހިމެނެއެވެ. މިފަދަ މަޝްރޫޢުތަކުގެ ސަބަބުން، ދިވެހި މަސްވެރިންނަށް އިތުރު ފަސޭހަތަކެއް ލިބި، ސިނާޢަތް އިތުރަށް ހަރުދަނާވެގެންދާނެއެވެ.
