ރާއްޖޭގައި މަސައްކަތް ކުރާ ބިދޭސީންގެ މައުލޫމާތު އެއްކުރުމަށް ބަޔޯމެޓްރިކްސް ދޭން ސަރުކާރުން ދިން މުއްދަތު ހަމަވި އިރުވެސް، އެ މައުލޫމާތު ދީފައި ނުވާ 509 ބިދޭސީއަކު މިހާތަނަށް ޑީޕޯޓުކޮށްލާފައިވާ ކަމަށް ދާހިލީ ސަލާމަތާއި ފަންނިއްޔާތާއި ބެހޭ ވަޒީރު އަލީ އިހްސާން ވިދާޅުވެއްޖެއެވެ.
ދާހިލީ ވުޒާރާގެ ދަށުން ހިންގާ ތަންފީޒީ އިދާރާތަކުން އިސްކަންދަރު ކޮށީގައި މިއަދު ބޭއްވި ނޫސްވެރިންގެ ބައްދަލުވުމެއްގައި މައުލޫމާތުދެއްވަމުން ވަޒީރު ވިދާޅުވީ މިދިޔަ ނޮވެންބަރު މަހުގެ 15 އިން ފެށިގެން މިއަދާ ހަމައަށް، މިހާތަނަށް ފިންގަޕްރިންޓް ނުދީ ރާއްޖޭގައި އުޅެމުން އައި ބިދޭސީންގެ ތެރެއިން 509 ބިދޭސީން އިމިގްރޭޝަނުގެ ބެލުމުގެ ދަށަށް ގެންގޮސް، ޑީޕޯޓުކޮށްފައިވާ ކަމަށެވެ. އެއާއެކު، މި ދެ އަހަރުގެ ތެރޭގައި ޑީޕޯޓުކުރި ބިދޭސީންގެ އަދަދު 9،695 އަށް އަރާފައިވާ ކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ ރާއްޖޭގައި އުޅޭ ބިދޭސީންނަކީ އެމީހުންގެ މައުލޫމާތު ސަރުކާރަށް އެނގޭ އަދި ޒިންމާވާނެ ބަޔަކު ތިބި މީހުންނަށް ހަދަން ސަރުކާރުން ހިންގާ ”ކުރަނގި“ އޮޕަރޭޝަން 2027 ވަނަ އަހަރުގެ މެއި މަހުގެ އެއްވަނަ ދުވަހާ ހަމައަށް ކުރިއަށްގެންދާނެ ކަމަށެވެ. އަދި އެއަށްފަހު ރާއްޖޭގައި ގަވާއިދާ ހިލާފަށް އުޅޭ ހުރިހާ ބިދޭސީން ހިފައި ހައްޔަރުކޮށް ޑީޕޯޓުކުރުމުގެ ބޮޑު އޮޕަރޭޝަނެއް ކުރިއަށްގެންދާނެ ކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ ރާއްޖޭގައި އުޅޭ ބިދޭސީންނަކީ ގަވާއިދާ އެއްގޮތަށް އުޅޭ ބިދޭސީންކަން ކަށަވަރުކުރުމަށް ހިންގާ އޮޕަރޭޝަނުގެ ފަހު ފިޔަވަހި ފަށާނީ އަންނަ އަހަރު ކަމަށެވެ. އެ ފިޔަވަހި ނިމޭއިރު، ރާއްޖޭގައި އުޅޭ ހުރިހާ ބިދޭސީންގެ މައުލޫމާތު ސަރުކާރަށް އެނގޭނެ ކަމަށާއި، އެމީހުންނަށް ޒިންމާވާނެ ވެރިފަރާތްތައް ވެސް ތިބިކަން ޔަގީންކުރެވޭނެ ކަމަށެވެ.
ބިދޭސީންގެ މައުލޫމާތު އެއްކުރުމަށް ސަރުކާރުން ކުރަމުން އަންނަ މަސައްކަތުން، މިހާތަނަށް 202،000 މީހުންގެ މައުލޫމާތު އެއްކޮށްފައިވާކަމަށް ވަޒީރު ވިދާޅުވިއެވެ. އަދި ސަރުކާރުން އަމާޒު ހިފާފައިވާ މުއްދަތަށްވުރެ ވެސް އަވަހަށް މި މަސައްކަތް ނިންމާލެވޭނެ ކަމުގެ އުއްމީދު އެބަ އޮންނެވި ކަމަށް ވަޒީރު ވިދާޅުވިއެވެ.
މީގެ އިތުރުން، ބިދޭސީންނަށް ސައްހަ ވޯކް ޕާމިޓެއް ހޯދުމަށް ތިން މަހުގެ މުއްދަތެއް ދިނުމަށް ނިންމާފައިވާ ކަމަށްވެސް ވަޒީރު ވިދާޅުވިއެވެ.
ގަވާއިދާ ހިލާފަށް އުޅޭ ބިދޭސީން ދެނެގަނެ، ބިދޭސިން ގަވާއިދަށް ފެއްތުމަށް ގިނަ މަސައްކަތްތަކެއް ސަރުކާރުން ކުރަމުން އަންނައިރު، ސަރުކާރުގެ އަމާޒަކީ، ގަވައިދާ ހިލާފަށް އުޅޭ ބިދޭސީންގެ މައްސަލަ، ދައުރުގެ ފުރަތަމަ ތިން އަހަރު ތެރޭ ހައްލު ކުރުމެވެ.
