މުމްބާއީގައި ހިނގި ނުރައްކާތެރި ކާރު އެކްސިޑެންޓެއްގައި ބޮލީވުޑްގެ މަޝްހޫރު ފަންނާނު ނޯރާ ފަތޭހީއަށް އަނިޔާވެއްޖެއެވެ.
މި ހާދިސާ ހިނގާފައިވަނީ މަސްތުގެ ހާލުގައި ހުރި މީހަކު ދުއްވި އުޅަނދެއް ނޯރާ ދަތުރުކުރަމުންދިޔަ ކާރުގައި ޖެހިގެން ކަމަށް ރިޕޯޓުތައް ބުނެއެވެ. މި އެކްސިޑެންޓު ހިނގީ ރަސްމީ މަސައްކަތެއްގައި އޭނާ ދަތުރުކުރަމުން ދަނިކޮށެވެ.
މުމްބާއީގެ ފުލުހުން މައުލޫމާތު ދިން ގޮތުގައި، މި މައްސަލައިގައި ތުހުމަތުކުރެވޭ ޑްރައިވަރު ހައްޔަރުކޮށް، ބެލިބެލުމުން އޭނާ ހުރީ މަސްތުގެ ހާލަތުގައިކަން ވަނީ ކަށަވަރުވެފައެވެ. އެކްސިޑެންޓުގެ ސަބަބުން ނޯރާގެ ކާރުގެ ކުރީކޮޅަށް ބޮޑެތި ގެއްލުންތަކެއް ލިބުނުއިރު، ނޯރާގެ ބޮލަށާއި ހަށިގަނޑުގެ އެހެން ބައިތަކަށް އެކިވަރުގެ އަނިޔާތައް ލިބިފައިވާ ކަމަށް ޚަބަރުތައް ބުނެއެވެ. ނަމަވެސް އެއީ ފުރާނައަށް ނުރައްކާވާވަރުގެ ސީރިއަސް އަނިޔާތަކެއް ނޫން ކަމަށް ފުލުހުން ބުނެއެވެ.
މި ހާދިސާއާ ގުޅިގެން ސޯޝަލް މީޑިއާ މެދުވެރިކޮށް ނޯރާ ބުނެފައިވަނީ، މިއީ ވަރަށް ބިރުވެރި ތަޖުރިބާއެއް ކަމަށާއި ނަމަވެސް ބޮޑު އަނިޔާއެއް ނުވެ ސަލާމަތްވީތީ ޝުކުރުކުރާ ކަމަށެވެ. އަދި އޭނާއަށް ލިބުނު އަނިޔާތަކަށް ފަރުވާ ހޯދުމަށްފަހު ހޮސްޕިޓަލުން ދޫކޮށްލާފައިވާ ކަމަށާއި، މަސްތުގެ ހާލުގައި ވެހިކަލް ދުއްވުމަކީ ބޮޑު ކުށެއްކަން އެންމެންނަށް ހަނދާންކޮށްދޭ ކަމަށް ވެސް ނޯރާ ވަނީ ބުނެފައެވެ.
