ކޭ ޕާކް ރެސިޑެންސްގެ ފްލެޓްތައް ވިއްކުމުގެ ނަމުގައި ގިނަ ބައެއްގެ އަތުން ފައިސާ އަތުލި ކަމަށް ތުހުމަތުވާ ހަސަން މަމްދޫހު (މަންޑޭ) މިއަދުގެ ޝަރީއަތަށް ހާޒިރުނުވުމުން، މައްސަލައިގެ ހުކުމް ކުރުން އަންނަ ހޮނިހިރު ދުވަހު ކުރުމަށް ކުރިމިނަލް ކޯޓުން ނިންމައިފިއެވެ.
ހުޅުމާލޭގައި ތަރައްގީ ކުރަމުން އަންނަ މިކްސްޑް ޔޫސް ރެޒިޑެންޝަލް ކޮމްޕްލެކްސް، ކޭ-ޕާކް ފްލެޓުތައް މަކަރާއި ހީލަތުން ވިއްކި މައްސަލައިގައި ތުހުމަތުވާ އެ ކުންފުނީގެ މައިނޯރިޓީ ހިއްސާދާރުކަންވެސް ކުރާ މަންޑޭގެ މައްޗަށް ޕްރޮސިކިއުޓާ ޖެނެރަލް (ޕީޖީ) އޮފީހުން ވަނީ 100 އަށްވުރެ ގިނަ ދައުވާ ކުރުމަށް 23 ޑިސެމްބަރު 2023 ގައި ކްރިމިނަލް ކޯޓަށް ފޮނުވައިފައެވެ.
މަންޑޭގެ މައްޗަށް ކޮށްފައިވާ ދައުވާތަކުގެ ތެރޭގައި ހިމެނެނީ ޓެކުމުގެ 50 ދައުވާ އާއި އޮޅުވައިލުމުގެ އަމަލެއް ކުރުމުގެ 50 ދައުވާ އާއި އެނގިހުރެ ސައްހަ ނޫން ލިޔުމެއް ދިނުމުގެ ތިން ދައުވާ އަދި މަނީ ލޯންޑްރިންގެ އެއް ދައުވާއެވެ.
ކުރިމިނަލް ކޯޓުގެ މީޑިއާ އޮފިޝަލް ”ވަން“ އަށް މިއަދު ވިދާޅުވީ އެ މައްސަލައިގެ ޝަރީއަތް މިއަދަށް ތާވަލު ކުރި ނަމަވެސް މަންޑޭ ކޯޓަށް ހާޒިރުވެފައިނުވާ ކަމަށެވެ. އެހެންވެ މިއަދު ކުރިއަށްދަނީ އެ މައްސަލައިގައި ދެން ދައުވާ އުފުލާފައިވާ ޖައިޝަންގެ މައްސަލަ ކަމަށެވެ.
މި މައްސަލަ ބައްލަވާ ގާޒީ އަލީ ނަދީމް ވިދާޅުވީ މަންޑޭގެ ފަރާތުން މިއަދުގެ ޝަރީއަތް ކެންސަލް ކޮށްދިނުމަށް އެދުނު ކަމަށާއި ނަމަވެސް ކޯޓުން ނިންމީ ޝަރީއަތް ބޭއްވުމަށްކަމަށް ގާޒީ ވިދާޅުވިއެވެ.
މަންޑޭ، ޝަރީއަތަށް ހާޒިރުވެފައިނުވާތީ އޮންނަ އުސޫލުގެ ތެރެއިން އޭނާއާމެދު ފިޔަވަޅު އަޅާނެ ކަމަށް ގާޒީ ވިދާޅުވިއެވެ.
މި މައްސަލައިގައި 23 ޖޫން 2025 ބޭއްވި އަޑުއެހުމުގައި މަންޑޭ ޝަރީއަތަށް ހާޒިރިނުވާތީ އޭނާ ޝަރީއަތް ނިމެންދެން ބަންދުކުރަން ގާޒީ އަމުރު ކުރެއްވިއެވެ. އެ ދުވަހުގެ އަޑުއެހުމަށް މަންޑޭ ހާޒިރުކޮށްފައިވަނީ ފުލުހުންގެ ބެލުމުގެ ދަށުންނެވެ.
ގާޒީ އެއިރު ވިދާޅުވެފައިވަނީ މަންޑޭގެ ފަރާތުން އެ ދުވަހު މެޑިކަލް ފޯމުތަކެއް ލިބިފައިވީ ނަމަވެސް ޝަރީއަތުން ނިންމީ އެ ލިޔުންތައް ބަލައިނުގަތުމަށް ކަމަށެވެ. ސަބަބަކީ ކޯޓަށް ހާޒިރު ނުވެވޭނެ ފަދަ ބައްޔެއް މަންޑޭގެ ކިބައިގައި ހުރިކަން އެ ލިޔުންތަކުގައި ބަޔާންކޮށްފައި ނުވާތީ ކަމަށެވެ.
ގާޒީ ވިދާޅުވެފައިވަނީ މަންޑޭ ބަލިވެގެން ކަމަށް ބުނެ ކޯޓަށް ހާޒިރު ނުވި ދުވަހު، އަޑުއެހުން ކެންސަލްވިކަން އަންގަން ހެކިވެރިންނަށް ގުޅުމުން، މަންޑޭ ދަރިފުޅު ބަލައި ސްކޫލް ދޮށާާއި އަދި ކެފޭތަކާއި ރެސްޓޯރެންޓުތަކުން އެ ދުވަހު ފެނުނު ކަމަށް ހެކިވެރިން ކޯޓަށް މައުލޫމާތު ދީފައިވާ ކަމަށެވެ.
އެހެންވެ މަންޑޭ ޝަރީއަތް ނިމެންދެން ބަންދުގައި ބަހައްޓަން އަމުރުކުރާ ކަމަށް ގާޒީ ވިދާޅުވެފައިވެއެވެ.
އެ އަމުރާ ގުޅިގެން މަންޑޭ ވަނީ އޭނާ ކޯޓަށް ދެން ހާޒިރުވާނެ ކަމަށާއި އަދި ”އެއް ޗާންސް“ ދިނުމަށް އެދޭ ކަމަށް ބުނެފައެވެ. މަންޑޭ ބުނެފައިވަނީ ސްކޫލް ދޮށަށް ދަރިފުޅު ބަލައިދާން ޖެހެނީ އެކަން ކުރާނެ އެހެން މީހަކު ނެތުމުން ބަލިވިޔަސް އެ ނޫން ގޮތެއް ނެތުމުން ކަމަށެވެ. އޭނާގެ ކަންފަތް މިހާރުވެސް ހުރީ ބައްވެފައި ކަމަށާއި ރަނގަޅަށް އަޑު ނުއިވޭކަމަށް މަންޑޭ ބުނެފައިވެއެވެ.
ދެން ކޯޓުން އަންގާ ކޮންމެ ދުވަހަކު ކޯޓަށް ހާޒިރުވާނެކަމަށް މަންޑޭ ބުނެފައިވެއެވެ. ނަމަވެސް ގާޒީ ވިދާޅުވެފައިވަނީ ސްކޫލް ދޮށަށް ދެވޭނަމަ ކޯޓަށްވެސް ހާޒިރު ވެވޭނެ ކަމަށާއި ޝަރީއަތް ނިމެންދެން މަންޑޭ ބަންދުކުރުމަށް އަމުރުކުރާ ކަމަށެވެ.
ކުރިމިނަލް ކޯޓުގައި އެ ފަހުން 25 ޖޫން 2025 ބޭއްވި އަޑުއެހުމުގައި މަންޑޭގެ ވަކީލު މުހައްމަދު ސަލީމް ވިދާޅުވެފައިވަނީ މަންޑޭއަކީ ތިން ކުދިންގެ ބައްޕައެއް ކަމަށެވެ. އެހެންވެ އެކަމަށް ރިއާޔަތްކޮށް މަންޑޭ ކަފާލާތުގެ ދަށުން މިނިވަންކޮށްދިނުމަށް އެދޭ ކަމަށެވެ.
ނަމަވެސް ގާޒީ ވިދާޅުވެފައިވަނީ އެއްވެސް މީހަކު ބަންދުގައި ބަހައްޓަން ބޭނުން ނުވާ ކަމަށާއި މަންޑޭ ބަންދުކުރަން ޖެހުނީ އޭނާގެ ފަރާތުން ކޯޓަށް އެއްބާރުލުން ލިބެމުން ނުދިޔުމުގެ ސަބަބުން ކަމަށެވެ. ގާޒީ ވިދާޅުވެފައިވަނީ ދައުލަތުން މި މައްސަލައިގައި ހުށަހަޅާފައިވާ ހެކިންގެ ހެކިބަސް ނަގައި ނުނިމެނީސް މަންޑޭން ޝަރީއަތް ނިމެންދެން ބަންދުކުރުމަށް ކޮށްފައިވާ އަމުރަށް ބަދަލެއް ގެންނަން ނުވިސްނަވާ ކަމަށެވެ.
ގާޒީ ވިދާޅުވީ މި މައްސަލައިގައި ހިމެނޭ ހެކިވެރިންނަކީ އެ މީހުންނަށް ލިބުނު ބޮޑު ގެއްލުމުގެ ސަބަބުން އެ މައްސަލައަށް އިންސާފު ހޯދަން މަސައްކަތް ކުރަމުން އަންނަ ބައެއް ކަމަށެވެ. އެހެންވެ ދެން މަންޑޭގެ ބަންދާ ގުޅިގެން ވާހަކަ ނުދެކެވޭނެކަމަށް ގާޒީ ވިދާޅުވެފައިވެއެވެ.
އެފަހުން މިއަހަރުގެ ޖުލައިމަހުގެ ތިންވަނަ ދުވަހު ބޭއްވި ޝަރީއަތުގައި މަންޑޭ ބަންދު ދޫކުރުމަށް ގާޒީވަނީ އަމުރުކުރައްވައިފައެވެ. މަންޑޭ ބަންދުން ދޫކޮށްލާފައިވަނީ ޝަރުތުތަކަކާއެކުގައެވެ. އެ ޝަރުތުތަކުގެ ތެރޭގައި އަޑުއެހުންތަކަށް ހާޒިރުވުމާއި ޝަރީއަތަށް އެއްބާރުލުންދިނުން ހިމެނެއެވެ.
ގާޒީ ވިދާޅުވެފައިވަނީ ޝަރުތުތަކާ އެއްގޮތަށް މަންޑޭ އަމަލުތައް ނުބަހައްޓާ ނަމަ، އަލުން ޝަރީއަތް ނިމެންދެން ބަންދުކުރާނެ ކަމަށެެވެ.
ޕީޖީ އޮފީހުން 23 ޑިސެމްބަރު 2023 ބުނެފައިވަނީ މަންޑޭގެ މައްޗަށް މީހަކަށް ކަމެއް އޮޅުވައިލުމުގެ ނިޔަތުގައި އެނގިހުރެ ސައްހަ ނޫން ލިޔުމެއް ދިނުމުގެ ކުށުގެ ދައުވާތައް ކޮށްފައިވަނީ ހަންބޯ ކޮމްޕެނީ ޕްރައިވެޓް ލިމިޓެޑްގެ 95 ޕަސަންޓު ހިއްސާދާރު، ޖިން ޝިހޫގެ ހުއްދަ ނެތި، އޭނާގެ ނަމުގައި ސައްހަ ނޫން ސޮއިކޮށްފައިވާ ލިޔުންތަކެއް ބޭންކް އޮފް މޯލްޑިވްސް (ބީއެމްއެލް)އަށް ހުށަހަޅާފައިވާތީ ކަމަށެވެ.
ޓެކުމާއި ޓެކުމުގައި ބައިވެރިވުމުގެ ކުށުގެ ދައުވާތައް މަންޑޭގެ މައްޗަށް ކޮށްފައިވަނީ ކޭ-ޕާކް ރެޒިޑެންސްގެ ނަމުގައި ހުޅުމާލޭގައި 110 އެޕާޓްމަންޓް ހިމެނޭ ރެޒިޑެންޝަލް ކޮމްޕްލެކްސްއެއް އިމާރާތްކުރުމަށް ފަށައި، އެ ޕްރޮޖެކެޓް ހިންގާކަން އާންމުކޮށް އިއުލާނުކޮށް، އާންމުންނަށް މި އެޕާޓްމަންޓްތައް ވިއްކި އިރު، އެއް އެޕާޓްމަންޓެއް އެކަކަށްވުރެ ގިނަ މީހުންނަށް ވިއްކައި، އެމީހުންގެ އަތުން ފައިސާ ޓަކައިގަނެފައިވާތީ ކަމަށް ޕީޖީ އޮފީހުން ބުނެފައިވެއެވެ.
އޮޅުވާލުމުގެ ދައުވާކޮށްފައިވަނީ އެއް އެޕާޓްމަންޓެއް އެކަކަށްވުރެ ގިނަ މީހުންނަށް ވިއްކި އިރު، އެކަން އެޕާޓްމަންޓް ގަތް މީހުންނަށް އޮޅުވާލާފައިވާތީ ކަމަށެވެ.
މަނީ ލޯންޑްރިން އާއި މަނީ ލޯންޑާކުރުމަށް އެހީތެރިވުމުގެ ކުށުގެ ދައުވާ މަންޑޭގެ މައްޗަށް ކުރީ ކޭ-ޕާކް ރެޒިޑެންސްއިން އެޕާޓްމަންޓް ގަތުމަށް ބޭނުންވާ ފަރާތްތަކާއި ހަންބޯ ކޮމްޕެނީ ޕްރައިވެޓް ލިމިޓެޑްއާ ދެމެދު ސޮއިކުރާ އެއްބަސްވުންތަކުގައި އެ އެއްބަސްވުންތަކުގެ ދަށުން ފައިސާ ދައްކާނީ ނަގުދު ފައިސާއިން ނުވަތަ ހަންބޯ ކޮމްޕެނީ ޕްރައިވެޓް ލިމިޓެޑްގެ ނަމުގައި ބީއެމްއެލްގައި ހުޅުވި ބޭންކް އެކައުންޓަށްކަމަށް ބަޔާންކޮށް، ކޭ-ޕާކް ރެޒިޑެންސްގެ އެއް އެޕާޓްމަންޓް އެކަކަށްވުރެ ގިނަ މީހުންނަށް ވިއްކައި، އެ މީހުންގެ އަތުން އެޕާޓްމަންޓަށާއި، ކާރު-ޕާކިންއަށް ކަމަށް ބުނެ ގިނަ އަދަދެއްގެ ފައިސާ އަތުލައި، ކޭ-ޕާކް ރެޒިޑެންސްއިން އެޕާޓްމަންޓް ވިއްކާކަމަށް ބުނެ އެކި މީހުންނާއެކު އެއްބަސްވިގޮތަށް އެކަން ކޮށްނުދީ، ހަންބޯ ކޮމްޕެނީ ޕްރައިވެޓް ލިމިޓެޑްގެ ނަމުގައި ބީއެމްއެލްގައި ހުޅުވާފައިވާ އެކައުންޓަށް އެކި ފަރާތްތަކުން އެޕާޓްމަންޓް ގަތުމަށް ފޮނުވާފައިވާ ފައިސާއާއި، ގޮތް ނޭނގޭ އެކި ގޮތްގޮތަށާއި، ނަގުދު ފައިސާ ޑިޕޮސިޓް ކޮށްގެން އެ އެކައުންޓަށް ޖަމާކޮށްފައިވާ ފައިސާއާ އެއްކޮށްގެން އެ އެކައުންޓް މަންޑޭ ބޭނުންކުރަމުން އައިސް، އެ އެކައުންޓްގައިވާ ފައިސާއިން ހުޅުމާލޭގައި އެފް.ޑަބްލިއު ކޮންސްޓްރަކްޝަން ޕްރައިވެޓް ލިމިޓެޑުން ތަރައްގީކޮށްފައިވާ އެފް.ޑަބްލިއު ރެޒިޑެންސްގެ އެޕާޓްމަންޓެއް ގަނެފައިވުމުން ކަމަށް ޕީޖީ އޮފީހުން ބުނެފައިވެއެވެ.
އެ ދައުވާތައް ސާބިތުވެއްޖެނަމަ މަންޑޭގެ މައްޗަށް 40 އަހަރަށް ވުރެ ދިގު ޖަލު ހުކުމެއް އަންނާނެ ކަމަށް ޕީޖީން ބުނެފައިވެއެވެ.
މި މައްސަލައާ ގުޅިގެން މަންޑޭގެ މުދާތައް މުއްދަތެއް ނެތް ގޮތަށް ފުލުހުންނާއި ހަވާލުކުރުމަށްވެސް މީގެ ކުރިންވަނީ އަމުރުކޮށްފައެވެ. ގާޒީ އެ އަމުރުކުރެއްވީ 14 ނޮވެމްބަރު 2024 ގައެވެ.
