ދިވެހި ފިލްމު ”ކަމަނަ“ އަށް އިންޑިއާގެ ފަސް ވަނަ ކަރުނާޓަކާ އިންޓަނޭޝަނަލް ފިލްމު ފެސްޓިވަލް (ކޭއައިއެފްއެފް)ގެ ޝަރަފުވެރި ތިން ކެޓަގަރީއަކުން އެވޯޑު ލިބިއްޖެއެވެ.
އެ ފެސްޓިވަލްގައި ”ކަމަނަ“ އަށް ލިބިފައިވާ އެވޯޑްތަކަކީ އެންމެ މޮޅު ޑައިރެކްޓަރު، އެންމެ މޮޅު އަންހެން އެކްޓަރު އަދި އެންމެ މޮޅު ފިރިހެން އެކްޓަރުގެ އެވޯޑެވެ.
އަބްދުﷲ މުއާޒް މީސްމީޑީއާގައި ކޮށްފައިވާ ޕޯސްޓެއްގައި ބުނެފައި ވަނީ މިއީ ހަމައެކަނި ލިބުނު އެވޯޑެއް ނޫން ކަމަށާއި މިއީ ލިބުނު ވަރަށް ބޮޑު ފަހުރެއް ކަމަށެވެ.
މުއާ އިތުރަށް ބުނެފައި ވަނީ އެ ކާމިޔާބީ އަކީ މުޅި ޓީމަށް ލިބުނު ކާމިޔާބީއެއް ކަމަށާއި އަދި ލިބުނު ކާމިޔާބީ އަށް ޓީމުގެ ހުރިހާ މެމްބަރުންނަށް ވަނީ ޝުކުރު އަދާކޮށްފައެވެ.
”ކަމަނަ“ ފިލްމަކީ ހަގީގީ ހާދިސާއެއްގެ މައްޗަށް ބިނާކޮށް ކުޅެފައިވާ ފިލްމެކެވެ. އެ ފިލްމުގައި ދައްކުވައިދެނީ އުފާވެރި ދިރިއުޅުމެއް އުޅެމުންދިޔަ ދެމަފިރިއެއްގެ ދިރިއުޅުމަށް އައި ތޫފާނެއްގެ ވާހަކައެވެ. އެ ފިލްމުގަިއ ގެވެށި އަނިޔާގެ ޝިކާރައަކަށް ވެގެންދިޔަ އަންހެނެއްގެ ހިތްދަތި ހަޔާތުގެ މަންޒަރުތައް ފެނިގެންދެއެވެ.
މި ފިލްމުގެ އެންމެ ހާއްސަ ކަަމެއްގެ ގޮތުގައި ފާހަގަކޮށްލެވެެނީ ރިމްޝާގެ ރޯލަށް ބަތަލާ މަރިޔަމް އައްޒަގެ ހަށިގަނޑަށް ގެންނަން ޖެހުނު ބަދަލެވެ. އަދި މިއީ އައްޒަގެ ފިލްމީ ކެރިއަރުގަަައި އޭނާ ފެނިފައި ނުވާފަދަ ރޯލެއްކަން ފާހަަގަކޮށްލެވެއެވެ.
ފިލްމުގެ ޕްރޮޑިސަރުންނަކީ ކާމިޔާބު ފިލްމު ”ލޯބިވެވިއްޖެ“ ގެ ޕްރޮޑިއުސަރ ޝާނިޒް އަލީ އަދި ހުސެން މުނައްވަރެވެ. ރިޝްފާ އަބްދުލްސަމަދުގެ ވާހަކައަކަށް މަހުދީ އަހުމަދު ސްކްރީން ޕްލޭ ލިޔެފައިވާ މި ފިލްމުގެ ޑައިރެކްޓަރަކީ ވެސް މުނައްވަރެވެ.
މިއީ މަހުދީގެ ސްކްރީން ޕްލޭގެ މައްޗަށް މުނައްވަރު ޑައިރެކްޓްކުރާ ތިންވަނަ ފިލްމްކަން ފާހަގަކޮށްލެވެއެވެ. މުނައްވަރު ވަނީ މީގެ ކުރިން މަހުދީގެ ”ސަޒާ“ އަދި ”ދިލަކަނި“ ޑައިރެކްޓްކޮށްފައެވެ.
