”މޯލްޑިވްސް ކަލްޗަރ އެންޑް ފުޑް ފެސްޓިވަލް“ ފަށައިފިއެވެ.
މިއީ މިއަހަރު ފަތުރުވެރިކަމުގެ ދާއިރާއިން ހާސިލްކޮށްފައިވާ ކާމިޔާބީތައް ފާހަގަކުރުމަށާއި އައު އަހަރަށް މަރުހަބާ ކިޔުމަށް ވިޒިޓް މޯލްޑިވްސް ކޯޕަރޭޝަނާއި، އެންވަޔަރްމެންޓް މިނިސްޓްރީއާއި ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) ގުޅިގެން އިންތިޒާމުކުރި ހަރަކާތެކެވެ.
ހުޅުމާލެ ސެންޓްރަލް ޕާކުގައި ކުރިއަށްގެންދާ މި ފެސްޓިވަލް ޖަނަވަރީ 1 ވަނަ ދުވަހުގެ ނިޔަލަށް ކުރިއަށްދާއިރު، އައު އަހަރާ ގުޅުވައިގެން ތަފާތު ހަރަކާތްތަކެއް ކުރިއަށް ގެންދިއުމަށް ވަނީ ހަމަޖެހިފައެވެ. އަދި ކާބޯތަކެތީގެ ތަފާތު ބާވަތްތައް ލިބޭނެ ފުޑް ސްޓޯލްތަކެއް ވެސް ވަނީ ބަހައްޓާފައެވެ.
މީގެއިތުރުން އެކި އުމުރުފުރާގެ ކުދިންނަށް އަމާޒުކޮށްގެން އެކި ކުޅިވަރުތަކާއި ކުޑަކުދިން ގަޔާވާނެ ސްޓޯލްތަކާއި ބައެއް އިތުރު ހަރަކާތްތައް ވެސް މި ފެސްޓިވަލުގެ ތެރޭގައި ހިމަނައިގެން ކުރިއަށްގެންދާނެއެވެ. އަދި ޑްރޯން ޝޯވއާއި ހަވާ އެރުވުމުގެ ހަރަކާތްތަކާއި، ރާއްޖޭގެ މުއްސަނދި ސަޤާފަތް ދައްކުވައިދޭ ތަފާތު ހަރަކާތްތައް ވެސް ފެންނާނެއެވެ.
