ދުނިޔޭގެ އެއްވެސް ގައުމަކީ “ދުނިޔޭގެ ފަނޑިޔާރު” ނުވަތަ “ދުނިޔޭގެ ފުލުހުން” ކަމަށް ބަލައިނުގަނެވޭނެ ކަމަށް ޗައިނާގެ ހާރިޖީ ވަޒީރު ވަންގް ޔީ ވިދާޅުވެއްޖެއެވެ.
އޭނާ މިފަދައިން ވިދާޅުވީ ވެނެޒުއޭލާގެ ރައީސް ނިކޮލަސް މަޑޫރޯ އެމެރިކާއިން ހައްޔަރުކުރުމާ ގުޅިގެންނެވެ.
ބައިނަލްއަގުވާމީ ގާނޫނުތަކުގެ ދަށުން ކޮންމެ ގައުމެއްގެ ސިޔާދަތާއި ރައްކާތެރިކަން ހިމާޔަތްވާންޖެހޭނެ ކަމަށް ފާހަގަކުރައްވައި، އުމުރުން 63 އަހަރުގެ މަޑޫރޯ ކަނުބަނދެގެން އެމެރިކާއަށް ގެންދިޔަ ގެންދިއުމަށް ޗައިނާއިން ވަނީ ވަރަށް ބޮޑަށް ފާޑުކިޔާފައެވެ.
އެމެރިކާގެ ނިއު ޔޯކްގެ ޖަލެއްގައި މަޑޫރޯ ބަންދުކޮށްފައިވާއިރު، ވެނެޒުއޭލާގެ ސަރުކާރު ވަގުތީގޮތުން ހިންގާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުމަކީ ޗައިނާ އާއި ވެނެޒުއޭލާއާ ދެމެދު އޮތް 50 އަހަރުވީ ގާތް ގުޅުމަށް ކުރިމަތިވި ބޮޑު ގޮންޖެހުމެއްކަމަށް ޗައިނާގެ ހާރިޖީ ވަޒީރު ވިދާޅުވިއެވެ. އޭނާ އިތުރަށް ވިދާޅުވީ މިއީ އެ ގައުމަށް ލިބުނު ބޮޑު ގެއްލުމެއް ކަމަށާއި، ވެނެޒުއޭލާގެ އިތުބާރު ހިފޭ ރަހުމަތްތެރިއެއްގެ ގޮތުގައި ދެމިއޮންނަން ބޭނުންވާ ކަމަށެވެ.
އެމެރިކާއިން ވެނެޒުއޭލާއާ ދެކޮޅަށް ދަތިކުރުމުގެ ފިޔަވަޅުތައް އަޅާފައިވީ ނަމަވެސް، ޗައިނާއިން ވަނީ ވޭތުވެދިޔަ އަހަރުތަކުގައި އެ ގައުމަށް އިގްތިސާދީ ގޮތުން ބޮޑެތި އެހީތަކެއް ފޯރުކޮށްދީފައެވެ. އެގޮތުން 2024 ވަނަ އަހަރު 1.6 ބިލިއަން ޑޮލަރުގެ މުދާ ޗައިނާއިން ގަނެފައިވާއިރު، އޭގެ ތެރޭގައި ގިނައީ ސާފުނުކުރާ ތެލެވެ. އަދި 2018 ވަނަ އަހަރު ޗައިނާއިން ވަނީ ވެނެޒުއޭލާގައި 4.6 ބިލިއަން ޑޮލަރުގެ އިންވެސްޓްމަންޓްތައް ވެސް ކުރިއަށް ގެންގޮސްފައެވެ.
