ށ. ނަރުދޫން ދިރިއުޅުމަށްޓަކައި ބަންޑާރަ ގޯތި ދޫކުރުމަށް ނިންމައި، އެކަމަށް އެދި ފޯމު ހުށަހެޅުމުގެ ފުރުޞަތު އެ ރަށު ކައުންސިލުން މިއަދު ހުޅުވާލައިފިއެވެ.
ނަރުދޫ ކައުންސިލުން ހާމަކޮށްފައިވާ ގޮތުގައި މިފަހަރު ދޫކުރުމަށް ހަމަޖެހިފައިވަނީ 2500 އަކަފޫޓުގެ 25 ގޯއްޗެވެ. މި ގޯތިތައް ދޫކުރުމަށް ހަމަޖެހިފައިވަނީ އެ ރަށުގެ ލޭންޑް ޔޫސް ޕްލޭންގައި ގޯތި ދޫކުރުމަށް ޚާއްޞަކޮށްފައިވާ ސަރަޙައްދުތަކުންނެވެ.
ގޯއްޗަށް އެދޭ ފޯމު ދޫކުރުމާއި ބަލައިގަތުން ކުރިއަށްދާނީ 2026 ޖަނަވަރީ 11 އިން ފެށިގެން 2026 ޖަނަވަރީ 29 ގެ ނިޔަލަށެވެ.
ފޯމު ހުށަހެޅޭނީ ރަސްމީ ބަންދުނޫން ކޮންމެ ދުވަހަކު ހެނދުނު 9:30 އިން މެންދުރު 13:30 އާ ދެމެދު ނަރުދޫ ކައުންސިލް އިދާރާގެ ކައުންޓަރުންނެވެ. ގޯއްޗަށް އެދޭ ފޯމުވެސް ލިބެން ހުންނާނީ އެ އިދާރާއިންނެވެ.
މި ކަމާ ގުޅޭގޮތުން ކައުންސިލުން ކުރި އިޢުލާނާއެކު، ގޯތި ދޫކުރުމާބެހޭ އުޞޫލާއި، ގޯތި ދޫކުރާ ސަރަޙައްދު އެނގޭނޭ ޗާޓުގެ އިތުރުން ބޯހިޔާވަހިކަމެއް ދޫކޮށްލުމަށް ވެވޭ އެއްބަސްވުމާއި ތަރިކަ އިޤުރާރު ފަދަ ލިޔުންތައް ވަނީ ޢާންމުކޮށްފައެވެ.
މި އުޞޫލުތަކަށް ރިޢާޔަތްކޮށް ޝަރުޠު ހަމަވާ ފަރާތްތަކުން ފޯމު ހުށަހެޅުމަށް ކައުންސިލުން އެދެއެވެ.
މި މަޝްރޫޢާ ގުޅޭ އިތުރު މަޢުލޫމާތު ސާފުކުރަން ބޭނުންވާ ފަރާތްތަކުން ނަރުދޫ ކައުންސިލްގެ ނަންބަރު 6540682 އަށް ގުޅުއްވުމަށް އެ އިދާރާއިން ވަނީ އިރުޝާދު ދީފައެވެ.
