އީރާނުގައި ސަރުކާރާއި ދެކޮޅަށް ކުރަމުންދާ މުޒާހަރާތައް ކޮންޓްރޯލްކޮށްފިއެވެ.
އެ ގައުމުގައި މުޒާހަރާތައް ފެށުނީ މިދިޔަ ޑިސެމްބަރު މަހުގެ 28 ވަނަ ދުވަހު އީރާނުގެ ރިޔާލްގެ އަގު ވަރަށް ބޮޑަށް ދަށަށް ދިއުމާއި ގުޅިގެން އީރާނުގެ ގްރޭންޑް ބާޒާރުގެ ފިހާރަތައް ބަންދު ކުރުމުންނެވެ. އަދި ގައުމުގެ އިގްތިސާދި ހާލަތު ދަށް ކަމަށް ބުނެ، މުޅި ގައުމުގައި މުޒާހަރާ ކުރަން ފެށިއެވެ.
އީރާނުގެ ދައުލަތުގެ މީޑިއާއިން ބުނާ ގޮތުގައި ހަމަނުޖެހުންތަކުގައި މިހާތަނަށް 109 ސިފައިން މަރުވެފައިވާ އިރު، މަރުވި މީހުންގެ އަދަދެއް އީރާނުގެ ކަމާބެހޭ އިދާރާތަކުން އަދި ކަށަވަރު ކޮށްފައެއް ނުވެއެވެ.
ތެހެރާނުގައި ހުންނަ ބޭރުގެ ޑިޕްލޮމެޓުންނާ ވާހަކަ ދައްކަވަމުން އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވީ، އެ ގައުމުގެ ހާލަތު މިހާރު އޮތީ މުޅިން ކޮންޓްރޯލް ކުރެވިފައި ކަމަށެވެ.
އަރަގްޗީ ވިދާޅުވީ މުޒާހަރާތައް ހޫނުވި އެމެރިކާގެ ރައީސް ޑޮނަލްޑް ޓްރަމްޕް އޭގެ ތެރެއަށް ވަދެ ނުފޫޒު ފޯރުވަން ބަހަނާ ދެއްކުމުން ކަމަށެވެ.
އީރާނުގެ ފާރސް ނިއުސް އޭޖެންސީން ރިޕޯޓުކޮށްފައިވާ ގޮތުގައި އީރާނުގެ ވެރިރަށް ތެހެރާންގެ ނަވްވާބް އަދި ސާދަތު އަބާދުގެ އަވަށްތަކުގައި ރޭ މުޒާހަރާތަކަށް ނުކުމެފައި ވަނީ”ލިމިޓެޑް” ބައެއް ކަމަށެވެ.
މުޒާހަރާގެ ބައިވެރިން ވަނީ ހަފްޝެޖާން އާއި ޖުންކާން ސިޓީއަށް ވެސް އެއްވެފައެވެ. މީގެ އިތުރުން ރަޒާވީ ޚުރާސަން ޕްރޮވިންސްގެ ތައިބާދު ކައުންޓީގައި ވެސް މުޒާހަރާ ކުރިއެވެ.
އެ ނޫހުން ބުނިގޮތުގައި ސަލާމަތީ ބާރުތަކުން ވަނީ މުޒާހަރާތައް ރޫޅާލައިފައެވެ. އަދި އެ ގައުމުގެ އެހެން ސިޓީތަކާއި ޕްރޮވިންސްތައް ވެސް އޮތީ ހަމަހިމޭންވެފައި ކަމަށް ވެސް ބުނެފައި ވެއެވެ.
