ޗައިނާގެ ހިލޭ އެހީގެ ދަށުން ވިލިމާލޭގައި ތަރައްގީކުރާ ހޮސްޕިޓަލް މަޝްރޫއުގެ އިމްޕްލިމެންޓޭޝަން އެއްބަސްވުމުގައި ސޮއިކޮށްފިއެވެ.
މި އެއްބަސްވުމުގައި ސޮއިކުރުމުގެ ރަސްމިއްޔާތު ކުރިއަށް ގޮސްފައިވަނީ އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާގައެވެ.
މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ އިމާރާތްކުރުމާއިބެހޭ ވަޒީރު ޑރ. އަބްދުﷲ މުއްތަލިބްއެވެ. އަދި ޗައިނާ ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ޗައިނާ އެމްބަސީގެ ކައުންސެލާ ޒެންގް ޒޫއެވެ.
ވިލިމާލޭގައި މިހާރު ހިދުމަތް ދޭ ހޮސްޕިޓަލު ތަޅާލައި އެތަނުގައި 100 އެނދުގެ އައު ހޮސްޕިޓަލެއް ތަރައްގީ ކުރުމަށް ސަރުކާރުން ނިންމާފައިވާއިރު މި ހޮސްޕިޓަލުގެ އިމާރާތާއި ވަސީލަތް ގާއިމު ކުރުމުގެ ހުރިހާ މަސައްކަތެއް ކުރާނީ ޗައިނާ ސަރުކާރުން ކަމަށް ވުޒާރާއިން ބުންޏެވެ.
ވިލިމާލެ ހޮސްޕިޓަލުގެ ހިދުމަތް ވަގުތީ އިމާރާތަށް ބަދަލު ކުރުމާއި ގުޅޭ ގޮތުން މާލެ ސިޓީ ގުރޫޕް އޮފް ހޮސްޕިޓަލްސްއިން ބުނީ މި ހިދުމަތް ބަދަލުކުރާ އިމާރާތުގެ ކުރެހުންތައް މިހާރު ނިމިފައިވާ ކަމަށެވެ.
ޗައިނާ ސަރުކާރުގެ އެހީއާއެކު ވިލިމާލޭގައި ތަރައްގީކުރާ ހޮސްޕިޓަލުގައި ދެ އިމާރާތެއް ހުންނައިރު އައުޓް ޕޭޝަންޓް، އިންޕޭޝަންޓް، އިމާޖެންސީ، ޑައިގްނޯސްޓިކް، އައިސީޔޫ އަދި ހީމޯޑައިލިސިސްގެ ފަރުވާ ދިނުމަށް ހާއްސަ އެނދުތަކެއްވެސް ހުންނާނެ ކަމަށް ސަރުކާރުން ބުނެފައިވެއެވެ.
