ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން މި އަހަރުގެ ތެރޭގައި ޖުމްލަ 12،000 ހައުސިން ޔުނިޓެއްގެ މަސައްކަތް ފެށުމަށް އަމާޒު ހިފާފައިވާ ކަމަށް އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. އަބްދުﷲ މުއްތަލިބް ވިދާޅުވެއްޖެއެވެ.
ވަޒީރު މިފަދައިން ވިދާޅުވީ ޕީއެސްއެމްގެ ”ރާއްޖެ މިއަދު“ ޕްރޮގްރާމްގައި ވާހަކަދައްކަވަމުންނެވެ.
ވަޒީރު ވިދާޅުވީ ބީއެމްއެލްއާ ހަވާލުކޮށްގެން ކުރިއަށްގެންދާ މަޝްރޫއުގެ އަމަލީ މަސައްކަތް މި މަހުގެ ތެރޭގައި ފަށަން ހަމަޖެހިފައިވާ ކަމަށެވެ. އަދި އޭގެ ތެރެއިން 3،300 ހައުސިން ޔުނިޓް އަޅަން ސަރުކާރުން ނިންމާފައިވާ ކަމަށް ވަޒީރު ވިދާޅުވިއެވެ.
މި މަޝްރޫއުގެ ދަށުން ވިލިމާލޭގައި 312 ޔުނިޓް، ހުޅުމާލެ ފޭސް 1 ގައި 546 ޔުނިޓް އަދި ހުޅުމާލެ ފޭސް 3 ގައި 2،414 ޔުނިޓް ތަރައްގީކުރުމަށް ހަމަޖެހިފައިވާއިރު ސަރުކާރުން ބޭންކުތަކުގެ އެހީގައި މި މަސައްކަތް ކުރަން ޖެހުނީ އިގްތިސާދީ ހާލަތު ހުރިގޮތުން ބޭރުގެ ލޯނު ހޯދުމުގައި ހުރި ދަތިތަކާ ހުރެކަމަށް ވަޒީރު ވިދާޅުވިއެވެ. އަދި މި މަޝްރޫއުގެ ދަށުން އިމާރާތްކުރާ ފްލެޓްތައް ދެ އަހަރު ދުވަހުގެ ތެރޭގައި ނިންމައި، މީހުންނަށް ދިރިއުޅެން ފެށޭނެ ކަމަށް ވަޒީރު ވަނީ ފާހަގަކުރައްވާފައެވެ.
ސަރުކާރުގެ ސޯޝަލް ހައުސިން ޕޮލިސީ ބިނާވެފައި އޮންނާނީ އާއިލާތަކަށް ރައްކާތެރިކަމާއި ކަރާމާތްތެރި ދިރިއުޅުމެއް ހޯދައިދިނުމުގެ މައްޗަށް ކަން ފާހަގަކުރައްވާ ވަޒީރު ވިދާޅުވީ މި ސިޔާސަތުގެ ދަށުން އާއިލީ ބޯހިޔާވަހިކަމަށް އިސްކަންދިނުމަކީ ވަކި ބަޔަކު ބާކީކުރުން ނޫން ކަމަށެވެ.
ވަޒީރު ވިދާޅުވީ އެއީ ދައުލަތުގެ ހުރި މަދު ވަސީލަތްތައް އެންމެ ބޮޑަށް ބޭނުންޖެހިފައިވާ ފަރާތްތަކަށް ހާއްސަކުރުން ކަމަށެވެ.
ދެމަފިރިއަކަށް ދެ ތަނެއް ލިބޭނެ ގޮތަށް އޮތުމުގެ ބަދަލުގައި، އާއިލާއެއްގެ ދިރިއުޅުމުގެ ހާލަތަށް ބަލައި، އެންމެ ބޭނުންޖެހިފައިވާ ފަރާތްތަކަށް އިސްކަންދެވޭނެ ކަމަށާއި ފްލެޓްތައް ހާއްސަކުރެވެނީ ވަގުތުން ވަގުތަށް ބޯހިޔާވަހިކަން ބޭނުންވާ ފަރާތްތަކަށް ކަމަށް ވަޒީރު ވިދާޅުވިއެވެ. އަދި ބިން ދޫކުރެވެނީ އަންނަން އޮތް ޖީލުތަކަށްވެސް އެ ރައްކާތެރިކަން ކަށަވަރުކޮށްދިނުމަށް ކަމަށްވެސް އެމަނިކުފާނު ހާމަކުރެއްވިއެވެ.
ވަޒީރު ވިދާޅުވީ އިންޑިއާގެ ލައިން އޮފް ކްރެޑިޓްގެ ދަށުން ގުޅިފަޅުގައި 4،000 ޔުނިޓް ތަރައްގީ ކުރުމުގެ އަމަލީ މަސައްކަތް އަހަރުގެ މެދު ތެރޭގައި ފެށޭނެ ކަމަށެވެ. އަދި މީގެ އިތުރުން ޗައިނާ ސަރުކާރުގެ އެހީގައި 500 ޔުނިޓް އަދި ސައުދީ ފަންޑުގެ އެހީގައި ހުޅުމާލޭގައި 400 ޔުނިޓް ތަރައްގީކުރުމުގެ މަސައްކަތްވެސް ދަނީ ކުރިއަށްކަން ވަޒީރު ވަނީ ފާހަގަކުރައްވާފއެވެ.
