ދެކުނު އޭޝިއާގެ ގައުމުތަކަށް ބޭއްވި ފުރަތަމަ ސާފް ފުޓްސަލް ޗެމްޕިއަންޝިޕްގެ ފިރިހެން ޑިވިޝަނުގައި މިއަދު ކުޅުނު މެޗުގައި ފަހަތުންއަރައި 3-1 އިން ބޫޓާން ބަލިކޮށް ރާއްޖޭން ލީގު ޗެމްޕިއަންކަން ކަށަވަރުކޮށްފިއެވެ.
މި މުބާރާތުގެ ލީގު ޗެމްޕިއަންކަން ރާއްޖޭން ކަށަވަރުކުރީ ބާކީ އެއް މެޗު އޮއްވަ އެވެ. ރާއްޖޭން ވަނީ މިހާތަނަށް ކުޅުނު ފަސް މެޗުވެސް ކާމިޔާބުކޮށްފައެވެ. ފުރަތަމަ މެޗުގައި ޕާކިސްތާން އަތުން 7-1 އިން މޮޅުވިއިރު، ބަންގްލަދޭޝް އަތުން މޮޅުވީ 6-1 އިންނެވެ. އެއަށްފަހު، އިންޑިއާ 5-0 އިން ބަލިކުރިއިރު، ނޭޕާލް އަތުން މޮޅުވީ 2-1 އިންނެވެ. އެއަށްފަހު، މިއަދުގެ މެޗުގައި ބޫޓާންގެ މައްޗަށް ކުރިހޯދީ 3-1 އިންނެވެ.
މި ނަތީޖާއާއެކު، ލީގުގެ އެއްވަނައިގައި ރާއްޖެ އުޅެނީ ސައްތައިން ސައްތައިގެ ރެކޯޑަކާއެކު ފަސް މެޗުން 15 ޕޮއިންޓް ހޯދައިގެންނެވެ. ދެވަނައިގައި އުޅޭ ޕާކިސްތާނަށް ފަސް މެޗުން ލިބިފައިވަނީ 10 ޕޮއިންޓެވެ. ތިންވަނައިގައި ނޭޕާލް އުޅެނީ ފަސް މެޗުން 8 ޕޮއިންޓް ހަމަކޮށްގެންނެވެ. ބަންގްލަދޭޝް ހަތަރުވަނައިގައި އޮތީ ހަ މެޗުން ހަތް ޕޮއިންޓާއެކު އެވެ.
ބެންކޮކްގެ ނޮންތަބުރީގައި އިންޑޯ ސްޓޭޑިއަމްގައި ކުޅުނު މެޗު ފެށިގެން ރާއްޖޭން ކުރަމުންދިޔަ އެޓޭކުތައް ހުއްޓުވުމުގައި ބޫޓާނުން ކާމިޔާބުކުރަމުންދިޔައިރު، ކުރީން ލީޑުނެގީ ވެސް އެ ޓީމުންނެވެ.
މެޗުގެ 12 ވަނަ މިނެޓުގައި ބޫޓާނަށް މި ލަނޑުޖަހައިދިނީ ޖިގްމޭ ޝުލްޓްރިމް އެވެ. މިއީ ރާއްޖޭގެ ކުޅުންތެރިން އެޓޭކެއްގައި ކުރިއަށްއަރައި ތިއްބާ ލިބުނު ފުރުޞަތެއްގައި ބޫޓާނުން ކައުންޓާގައި ޖެހި ގޯލެކެވެ. މި ލަނޑުޖެހިއިރު ރާއްޖޭގެ ކުޅުންތެރިއެއް ކަމަށްވާ، އަހުމަދު ހަމީދު (އައްމަޑޭ) އޮތީ އަނިޔާވެގެން ދަނޑުބޭރުގައެވެ.
ފުރަތަމަ ހާފު ނިމެން މިނެޓަކަށްވެފައިވަނިކޮށް، ރާއްޖެ އަށް އެއްވަރުކޮށްދިނީ ޢަބްދުﷲ ޖުނައިދު (ޖޭންނެ) އެވެ. މިއީ އޭރިޔާބޭރުން ފޮނުވާލި ބާރު ހަމަލާއަކުން ޖޭންނެ ކާމިޔާބުކުރި ރީތި ގޯލެކެވެ. މި ގޯލާއެކު މެޗުގެ ފުރަތަމަ ހާފު ނިމުނީ ދެ ޓީމު 1-1 އިން އެއްވަރުވެގެންނެވެ.
